Sunday, November 15, 2015

Blowing the Whistle on the Wolves By Larry Brown (Burmese)

တောခွေးများအပေါ် တံပိုးမှုတ်ခြင်း

Dr. Larry Brown
 “ထို့ကြောင့် သင်တို့သည် ကိုယ်ကို သတိနှင့် ကြည့်ရှုကြလော့။ ဘုရားသခင်သည် မိမိအသွေးနှင့်ဝယ်တော်မူသော အသင်းတော်ကို လုပ်ကျွေးစေခြင်းငှါ၊ သန့်ရှင်းသော ဝိညာဉ်တော်သည် သင်တို့ကို အအုပ်အချုပ်ခန့်ထားတော်မူသော သိုးစုတစုလုံးကို သတိနှင့် ကြည့်ရှုကြလော့။ အကြောင်းမူကား ငါမရှိသည်နောက်၊ ကြမ်းတမ်းသော တောခွေးတို့သည် သိုးများကို မသနားဘဲ သင်တို့အထဲသို့ ဝင်မည်ကို၎င်း၊ တပည့်တော်များကို သွေးဆောင်ခြင်းငှါ၊ မှားသောစကားကို ပြောတတ်သောလူတို့သည် သင်တို့အထဲ၌ ပေါ်လာမည်ကို၎င်း ငါသိ၏။ ထို့ကြောင့် စောင့်ရှောက်၍ နေကြလော့။ ငါသည် သုံးနှစ်ပတ်လုံး နေ့ညမပြတ် လူအပေါင်းတို့ကို မျက်ရည်နှင့်တကွ ဆုံးမ၍နေကြာင်းကို အောက်မေ့ကြလော့။” --- တမန်၂၀း၂၈-၃၁ ။

တောခွေးတွေဟာ အန္တရာယ်ရှိတယ်။ တောခွေးတွေကို ရှောင်ဖို့ဆိုရင် တောခွေးတွေကို မှတ်တတ်ဖို့ လိုတယ်။ “ညီအကိုတို့၊ သင်တို့ခံရပြီးသော ဆုံးမဩဝါဒနှင့် ဆန့်ကျင်ဘက်ဖြစ်သော သင်းခွဲခြင်း၊ မှားယွင်းခြင်းအကြောင်းကို ပြုတတ်သော သူတို့ကို မှတ်၍ရှောင်ကြလော့ ဟု ငါသတိပေး၏။” ရောမ ၁၆း၁၇

“ဤစာ၌ ငါတို့ရေးထားသော ပညတ်စကားကို တစုံတယောက်သောသူသည် နားမထောင်ဘဲနေလျှင်၊ ထိုသူကို မှတ်ကြလော့။ ရှက်ကြောက်စေခြင်းငှါ အပေါင်းအဘော် မလုပ်ကြနှင့်။” ၂သက် ၃း၁၄ ။

တောခွေးတွေကို မှတ်ရတာခက်ပါတယ်။ ဘုရားသခင်ရဲ့ နှုတ်ကတ်တော်ကို ကိုင်စွဲပြီး မြင်သာထင်သာရှိအောင်၊ မှတ်သားလို့ရအောင် ကျွန်တော်ကြိုးစားပြီး ဆွဲထုတ်ပြပါမယ်။

ဒီတရားဒေသနာဟာ တောခွေးသတ်တဲ့ ဒေသနာတော့ မဟုတ်ပါဘူး။ တောခွေးစိတ်ရှိတဲ့ လူတယောက် အသင်းတော်မှာ ပါဝင်လာတာကို ဘယ်လိုမှ တားလို့မရနိုင်ပါဘူး။ ဒါပေမယ့် တောခွေးလို့တော့ မှတ်ထားနိုင်တယ်။ တောခွေးဆိုတာ ဘယ်လိုလူလဲဆိုတာ အားလုံးသိအောင် လူေ့ရှ ဆွဲထုတ်ပြနိုင်ရင်တော့ ပြဿနာတွေ သိပ်ရှိတော့မှာ မဟုတ်ပါဘူး။ တောခွေးတွေဟာ အရေခြုံ ဟန်ဆောင်တတ်တယ်။ ပုန်းနေတတ်တယ်။ တောခွေးတွေဟာ ပုံပြင်ထဲက တောခွေးလိုပါပဲ။ ပုံပြင်ထဲမှာ မိန်းကလေးက သစ်ပင် ခပ်ငယ်ငယ်ရဲ့ နောက်မှာကွယ်နေတယ်။ အဖွားအိမ်သွားမယ့် လမ်းမှာ တောခွေးတကောင်ရှိတာကို သိထားတယ်။ မသွားရဲတော့ဘူး။ ဒါပေမယ့် တောခွေးက ဟန်ဆောင်ရုပ်ပြောင်းထားတယ်။

အဲဒီတော့ ဒီနေ့ ကျွန်တော်တို့လည်း မြင်သာထင်သာရှိအောင် တောခွေးတွေကို ေ့ရှဆွဲထုတ်လိုက်ကြစို့။

ကျမ်းစာက တောခွေးသုံးမျိုးအကြောင်း ပြောထားပါတယ်။ ဇေဖနိ ၃း၃ မှာ ညဉ့်၌ လှည့်လည်သော တောခွေးများ (evening wolves - ညဦးယံတောခွေးများ) မဿဲရး၁၅ မှာ ကြမ်းတမ်း၊ ဆာလောင်သော တောခွေး- ravenous wolves တမန်တော် ၂၁း၂၉ မှာ grievous  ကြမ်းတမ်းသော တောခွေးများဖြစ်ပါတယ်။

ဇေဖနိ ၃း၃ က ညဦးယံ တောခွေးများဟာ နားလည်ရခက်တဲ့ ယုဒရှကာယုတ်- တွေပါပဲ။ ကိုယ့်ကို အနိုင်လှဲသွားနိုင်သူတွေပါပဲ။ ချောင်မှာထိုင်ပြီး အကြံထုတ် ကမောက်ကမတွေလုပ် စိတ်ပုပ်တဲ့သူပါဘဲ။ ကိုယ့့်ကို ဒုက္ခပေးပေမယ့် အမှုတော်ကိုတော့ သူက ဖျက်မပစ်နိုင်ဘူး။ အဲဒီ ဖျက်လိုဖျက်ဆီးလူဟာ ကိုယ်နဲ့ အနီးကပ်လျှောက်လှမ်းနေသူပါ။ ကိုယ်နဲ့ ရင်းနှီးပြီး ကိုယ့်ကို ဖနောင့်နဲ့ ပေါက်မယ့်သူပါ။ ယုဒဟာ အတွင်းလူတယောက်ပါ။

မဿဲ ရး၁၅ မှာ ဖျက်စီးတတ်တဲ့ ကြမ်းတမ်းဆာလောင်တဲ့ တောခွေးတွေအကြောင်း ပြောထားပါတယ်။

အခု စည်းဝေးကြီးမှာ ကျွန်တော်တို့ရဲ့ အဓိကအကြောင်းအရာက သက်သေခံ ဝိညာဉ်ရယူခြင်းနှင့် နိုးထမှုအတွက်ပါဘဲ။ ဒီမှာ ကြိုးစားခံယူပြီး အသင်းတော်ပြန်၊ ငိုယိုဆုတောင်း တအိမ်ဝင်တအိမ်ထွက် ကြိုးစားသက်သေခံတာတွေကို အားကုန်အင်ကုန် လုပ်ပေမယ့်လည်း၊ အဲဒီ ကြမ်းတမ်းတဲ့တောခွေး ဆာလောင်တဲ့၊ ဖျက်ဆီးတတ်တဲ့ တောခွေးတွေကို မှတ်မထားရင်၊ လုပ်သမျှ အလကားဖြစ်ကုန်မယ်။ ကြိုးစားထားသမျှကို တောခွေးတွေက အကုန်ဆုတ်ဖြဲပစ်မှာပဲ။

တမန်  ၂၀း၂၉ မှာ အကြီးအကျယ် ဝမ်းနည်းစေအောင်လုပ်မယ့် တောခွေးတွေအကြောင်း ပြောထားပါတယ်။

ဘုရားဝတ်မှာ မွေ့လျော်တဲ့ မိတ်ဆွေ သင်းအုပ်တယောက်က- သူနဲ့ သူ့ဇနီးက ကျွန်တော်နဲ့ ကျွန်တော့ဇနီးဆီကို လာပြီး စကားပြောနိုင်မယ့်အချိန်ကို သိချင်တယ်လို့ ဖုန်းနဲ့ တောင်းဆိုလာတယ်။ သူတို့ တံခါးဝကို ဖြတ်လာချိန်မှာပဲ သူ့ဇနီးဟာ အတော်စိတ်မကောင်း ဖြစ်နေမှန်း မြင်သာနေတယ်။

အသင်းတော်မှာ သူကြိုးစားလုပ်နေသမျှကို တိုက်ခိုက်နေတဲ့ ဉာဏ်များတဲ့ လူတယောက် ဦးဆောင်တဲ့ အုပ်စုတစုကြောင့် သူခံရတဲ့ဒုက္ခတွေ အခြေအတင်ဖြစ်လာတဲ့အကြောင်း ပြောပြလာတယ်။ သူက “ကျွန်တော် သက်သေခံပြီး ဝိညာဉ်ရယူနေတဲ့အထိ လူသစ်တွေ ပါဝင်လာတဲ့အထိ သူတို့ပျော်နေပါသေးတယ်။ ပြောပါဦးဆရာ ကျွန်တော်သက်သေခံတာကို မလုပ်စေချင်ကြပဲ- ဘာကြောင့် သင်းအုပ်လို့ ကျွန်တော့ကို ခေါ်နေကြသေးလဲ” လို့ ပြောပါတယ်။

သူက ဆက်ပြီးတော့ “ဆရာ ကျွန်တော်လုပ်နိုင်သမျှ အကောင်းဆုံးတိုက်ခဲ့ပါပြီ။ ဒါပေမယ့် ဒီညနေရောက်တော့ ကျွန်တော့ဇနီး သူက (သူ့ဇနီးက ခေါင်းငိုက်စိုက်ကျပြီး မျက်ရည်တွေ ကျနေတယ်။) --- သေနတ်ကိုယူပြီး သူ့ကိုယ်သူ သတ်သေဖို့ ကြိုးစားပါတော့တယ်။ တခုခုတော့ လုပ်ရတော့မယ်ဆိုတာ ကျွန်တော်သိလိုက်ပါပြီဆရာ” - သူက အသက်တောင်မရှူနိုင်ဘဲ “ဒါပေမယ့် ကျွန်တော် ဘာလုပ်ရမယ်ဆိုတာ မသိဘူးဆရာ” လို့ ပြောဖူးပါတယ်။

အခြေအနေက အစစအရာရာ ထူးခြားနေတယ်။ အမှုတော်အတွက်ဆို ဘယ်သူမဆို အချိန်အတော်အတန် အောင့်အီးသည်းခံကြဖို့ လိုတာမှန်တယ်။ ပြဿနာဖြစ်ချိန်မှာ ရှောင်ထွက်တာ၊ ပြေးထွက်တာ မလုပ်သင့်ပါဘူး။ ဒါပေမယ့် အခုကိစ္စမှာတော့ ကျွန်တော်က “ငါ့ညီရာ မင်းအဲဒီအသင်းတော်ကို ဦးမဆောင်ခင်ကတည်းက ငါ့ကို တိုင်ပင်ခဲ့ရင်ကောင်းမှာ၊ အဲဒီအသင်းတော်က လူတွေဟာ လူကောင်း ၂ယောက်၊ ၃ယောက်ကို ဖျက်စီးပစ်လိုက်ကြပြီးပြီကွ၊ ငါ့ဇနီးကိုတော့ အဲဒီအသင်းတော်အတွက် မစတေးလိုက်နိုင်ဘူးကွာ။ မင်းလည်း အကောင်းဆုံး ကြိုးစားလုပ်ခဲ့ပြီဘဲ။ သူတို့က သင်းအုပ်လုပ်ခွင့်မပေးရင် ငါတော့ ငါ့ဇနီးနဲ့ ငါ့မိသားစုကိုခေါ်ပြီး၊ ငါ့မြင်း ငါခိုင်းပြီး၊ မိုးကုပ်စက်ဝိုင်းအထိ စီးသွားလိုက်မှာပဲ။ ဒီအသင်းတော်ကို မင်းလက်လွှတ်လိုက်ရရင် တခြားအသင်းတော်တခု ရနိုင်တာပဲ။ မင်းဇနီးနဲ့ သားသမီးတွေကိုတော့ ခါးသည်းတဲ့ဒုက္ခတွေ ဆက်မကြံုပါစေနဲ့တော့” လို့ ပြောလိုက်ပါတယ်။

ငှက်ကလေးတွေ၊ ပျားကလေးတွေနဲ့ နွားတွေဟာ major key နဲ့ သီချင်းဆိုကြ ညဉ်းကြပေမယ့် တောခွေးတွေကတော့ minor key နဲ့ အူတတ်ကြတယ်လို့ လူတယောက်က ပြောဖူးပါတယ်။

တောခွေးတွေအကြောင်း လေ့လာကြည့်တော့ တောခွေးအူသံဟာ ကြောက်စရာကောင်းတဲ့ အသံ သင်းအုပ်ဆရာသိနိုင်တဲ့ အသံတမျိုးလို့ သိလာရပါတယ်။ အသင်းသားတွေက အဲဒီကြောက်လန့်စရာအသံကို မသိပေမယ့် သင်းအုပ်က ခွဲခြားတတ်တယ်။ သင်းအုပ်က ခန္ဓာ၊ နားနဲ့ ကြားတာတော့မဟုတ်ဘူး။ စိတ်ဝိညာဉ်နဲ့ ကြားတာပါ။ အဲဒီတော့ ဒီမနက်မှာ တောခွေးတွေအပေါ် ကျွန်တော် တံပိုးမှုတ်ပါမယ်။

ပထမဦးဆုံး ပြောချင်တဲ့အချက်က -----      

၁  တောခွေးတွေဟာ ဇာတိတပ်မက်မှုတွေရှိတယ်။
တောခွေး မလာစေချင်ရင် တောခွေးနားသွားပြီး အညစ်အကြေး မစွန့်ပါနဲ့။

ကျွန်တော့အိမ်က တဖက်ပိတ်လမ်းကျဉ်းလေးထဲမှာ ရှိတယ်။ နောက်ပိုင်းမှာ တောထဲက critter အကောင်ပလောင်လေးတွေ အများကြီးထွက်လာတယ်။ အိမ်နောက်ဖေး ဆင်ဝင်ပတ်လည်မှာ အများကြီးပဲ။

ကျွန်တော်က ကျွန်တော့ဇနီးကို “Honey ဒီလောက်အများကြီးတခါမှ မမြင်ဖူးဘူးကွာ” လို့ တောင် ပြောမိတော့တယ်။

ကျွန်တော်က စိုးရိမ်ကြီးတတ်တဲ့သူဆိုတော့ ညဖက်မှာ အိပ်ယာကထ ၊ လမ်းလျှောက်ပြီး   ဘုရားသခင်ထံမှာ အဖြေရှာ - ဆုတောင်းစကားပြောလေ့ရှိတယ်။ နောက်ဖေးပြတင်းပေါက်က    လှမ်းကြည့်လိုက်တော့ - တောကြောင် တကောင်ကောင် - ဝပ်နေတာ - ထိုင်နေတာကို မြင်ရတယ်။ ပထမတော့ သိပ်နားမလည်ဘူး။ ကျွန်တော့် ဇနီးက စားကြွင်းစားကျန်တွေ နောက်ဖေးဘက် - လွတ်ပစ်တာ အိမ်ကခွေးကို ချကျွေးတာကို ကျွန်တော် မသိခဲ့ဘူး။

အဲဒီ - အကောင်ပလောင်လေးတွေက . . အဲဒီအကြွင်းအကျန်တွေဆီကို လာအနံံ့ခံတယ်။ အညစ်အကြေးတွေဆီကို လာကြတယ်။ အိမ်ကခွေးက - အကုန်မစားနိုင်ဘူး။ နောက်တော့ - ကျွန်တော့်ဇနီးက - သားသမီးတွေကို မှာထားရတော့တယ်။ ကလေးတွေကလည်း အကြွင်းအကျန် အဟောင်းတွေအပေါ်မှာ - အစာသစ်ကို ထပ်ပစ်ချမပေးကြတော့ဘူး။ အင်း - ဒီလိုဆိုတော့ စနစ်တကျ ဖြစ်သွားတာပေါ့။ ဒါပေမယ့် - အညစ်အကြေးတွေကို တခြားတနေရာမှာ သွားပစ်လိုက်နိုင်ရင် . . အကောင်ပလောင်တွေ အိမ်နားမှာ ထပ်လာတော့မှာ မဟုတ်ဘူး။

အသင်းတော်မှာလည်း အညစ်အကြေးတွေကို ထိန်းတတ်ဖို့လိုတယ်။ အသွေးအသားကိစ္စ သတိထားရမယ်။ တောခွေးအိုကြီးတွေက ပန်းပွင့်တွေ ၊ မြက်ပင်တွေလို အရာမျိုး မစားဘူး။ သူတို့ရှာတာက - အသေတွေ ၊ ဇာတိအရာ ၊ အသွေးအသားအရာတွေပါ။ အသွေးအသားကို သတိထားရမယ်။ ဒါဆို- တောခွေးတွေ ဝိုင်းမနေတော့ဘူး။ အိမ်တော်ကို သန့်သန့်ရှင်းရှင်း ထားဖို့လိုတယ်။

ကျွန်တော်တို့ အသင်းတော်ဟာ လူတိုင်းကို ကြိုဆိုပါတယ်။ ဒါပေမယ့် - သံစုံသီချင်းဆိုချိန် တပင်တိုင် သီချင်းဆိုချိန်နဲ့ သင်ကြားချိန် ၊ အလှူငွေကောက်ခံချိန်တွေမှာ - ပါဝင်သူတိုင်းဟာ သခင်ယေရှုရဲ့ အသက်တာကို အတုယူဖို့လိုတယ်။

ကျွန်တော်တို့ ဆိုတဲ့ သီချင်းဟာ - သခင်ဘုရားရဲ့ ဘုန်းထင်ရှားဖို့ လိုတယ်။ ဇာတိသဘောဆန်တဲ့ - ခေတ်သစ် - ဧဝံဂေလိ - ခပ်လှုပ်လှုပ် - ခပ်ရမ်းရမ်း သီချင်းမျိုးတွေက - ဘုရားဘုန်းတော် ထင်ရှားမှာ မဟုတ်ဘူး။ ကျွန်တော့ အတွက်တော့  အချို့ဘုရားကျောင်းတွေ သွားဖို့၊ နောက်ခံ-တေးဂီတ အသံတွေကြားဖို့ဆိုတာ စိတ်ပျက်မိတယ်။ ဒီလိုတေးဂီတ - သီချင်းတွေကို အသင်တော်မှာ သတိထား- ထိန်းသိမ်းရမယ်။

ကျွန်တော်သွားဖို့ စိတ်ပျက်တဲ့ ဘုရားကျောင်းမျိုးကတော့ - သံစုံသီချင်းဆိုချိန်မှာ - အုပ်စုလိုက် ချီတက်ပြီးဝင်တဲ့  အမျိုးသမီးတွေက မလုံမခြံုဝတ်တဲ့ အသင်းတော်မျိုးပါဘဲ။ အမျိုးသမီးတွေ အဲဒီလို marching လုပ်ပြီး - ချီတက်လာတာကို မြင်ရတော့ အမျိုးသားတွေအဖို့ သင်ထားတဲ့ ကျမ်းစာနဲ့ ကျမ်းချက်တွေ - ဘယ်ဆင်ခြင် နိုင်တော့မလဲ။ အမျိုးသမီးတွေ လုံလုံခြံုခြံု ဝတ်ကြပါ။ လည်ဟိုက်ကလည်း ရှိသင့်သလောက်ပေါ့။ စကတ် ထမီကလည်း ရှိသင့်တဲ့ အရှည်လောက် ဝတ်ကြပါ။

ဒီ Gospel Light နှစ်ခြင်းအသင်းတော်မှာရှိတဲ့ သီချင်းပုံစံမျိုးကို ကျွန်တော် သဘောကျတယ်။ ဒီမှာဆိုတဲ့ သံစုံသီချင်းက အလှပြမဟုတ်ဘူး။ အလှပြ တင်ဆက်မှုတွေ ဖယ်လိုက်ပြီးတော့ အစီစဉ်တိုင်းမှာ ဘုရားသခင်အလိုတော်နဲ့ နည်းလမ််းတွေကို အခွင့်ပေးကြစို့။

၂။  တောခွေးတွေဟာ ဒုက္ခရောက်သူတွေကို သဘောကျတယ်။ ကြည့်ရှုချင်တယ်။
တောခွေးတွေကို လေ့လာကြည့်တော့ သူတို့ဟာ ကျောက်ဆောင်အစွန်နားမှာ လေးလေးကန်ကန် လမ်းလျှောက်ရင်း လူတွေ၊ အရာဝတ္ထုတွေကို အပေါ်စီးက ကြည့်ရတာကို သဘောကျကြတာ တွေ့ရတယ်။

အသင်းတော်မှာ ကြည့်လို့ရှုလို့ ရနိုင်တဲ့နေရာတွေမှာ ထိုင်ဖို့နှစ်သက်တဲ့ တောခွေးတွေကို မြင်ဖူးသလား။ သူတို့ဟာ လက်ပိုက်ပြီး နောက်ပိုင်းမှာ မတ်တပ်ရပ်ချင်ရပ်နေမယ်။ ဧည့်ကြိုအဖွဲ့ထဲမှာ ပါလိမ့်မယ်။ တခြားသူတွေအတွက် ခုံနေရာရှာပေးမယ့်အစား တရားဟောဆရာ တရားစဟောချိန်မှာ အပေါက်ဝဖက်ထွက်ပြီး တရားဟောတာမပြီးမချင်း အနားကလူတွေနဲ့ စ-နောက် နေလိမ့်မယ်။

ကလေးတွေထိန်းဖို့ ကိုယ့်အလှည့်ကျရင် ကိုယ့်အလှည့်ကျရင် သတိထားပါ။ အချို့အမျိုးသမီးတွေက ဘုရားရှိခိုးချိန်မှာမှ ကလေးထိန်းတဲ့အခန်းဖက် လာချင်ကြတယ်။ “ဘုရားသခင်နှင့် စပ်ဆိုင်သောသူသည် ဘုရားသခင်၏ စကားတော်ကို နားထောင်တတ်၏” (ယော၈း၄၇) အသေးအမွှားပြဿနာတခုခု ဖြစ်ပြီဆိုရင်တော့ အဲဒီလူမျိုးက မဟုတ်တဲ့ဘက်က ပါချင်ပြီ။   သတိထားကြစို့။

တောခွေးဟာ အုပ်စုထဲမှာ ဧရာမဘိုးအေကြီး လုပ်ချင်တယ်။ ကော်မတီထဲမှာလည်း ပါချင်တယ်။ ကျမ်းစာထဲမှာ သင်းထောက်လို့ပဲ တွေ့ရတယ်။ ကော်မတီဆိုတာမျိုးကို တခါမှမတွေ့ရ ဘူး။

ကော်မတီဆိုတာက စည်းဝေး ခဏခဏခေါ်ချင်တယ်။ သူတို့က သီချင်းဆိုဖို့တော့ မတောင်းဆိုဘူး။ တခြားသူတွေ ကြားလောက်အောင်တော့ “ဘုရားသခင်က အဆိုကောင်းတဲ့ အသံမပေးလို့ပါ။ ဘုရားသခင် အသုံးပြုခံချင်လိုက်တာ” လို့ ပြောတတ်ပါတယ်။ သူတို့နောက်လိုက် တချို့ကလည်း သူတို့သီချင်းဆိုပါဝင်ဖို့၊ ဒါမှမဟုတ် တခြားပါရမီ အစွမ်း talent တခုခုကိုပြဖို့ တောင်းဆိုတတ်ကြတယ်။

အဲဒီကော်မတီဟာ သင်းအုပ်ဆရာရဲ့ အမှုတော်လုပ်ငန်းထဲမှာပဲ လုပ်ငန်းထဲမှာပဲ လုပ်ငန်းတခု နေရာရှိချင်လာကြတယ်။ ဝိညာဉ်သဘောဆိုပြီး အပြကောင်းချင်တယ်။ “ကိုယ့်အကျိုးစီးပွါးကြောင့် သူ့မျက်နှာကို ထောက်ထားခန့်ညားတတ်သောသူ ဖြစ်ကြ၏” (ယုဒ ၁၆)

လူတယောက်ရဲ့ ပြဿနာအသေးအမွှားအကြောင်း သူတို့ကြားရပြီဆိုရင် ကူညီဖို့ အပြေးအလွှားပါဘဲ။ ကူညီတာကတော့ ကောင်းပါတယ်။ ဒါပေမယ့် သူတို့က အသင်းတော်ကို ကူမပေးမယ့် ဘိုးတော်တွေ ဖြစ်ချင်တာက ခက်တယ်။ အဗရှလုံလိုပဲ အဖေရှင်ဘုရင်ထံ လာတဲ့သူတွေကို “မင်းတို့ပြဿနာကို နားထောင်ပေးဖို့ ဘုရင့် ကိုယ်စားလှယ် လွှဲထားသူပါ။” လို့ ပြောပြီး သူတို့လက်တွေကို နမ်း၊ ငါ ဒီပြဿနာတွေကို ဖြေရှင်းနိုင်တယ်လို့” ပြောချင်သူတွေပါ။ ဒါဟာ ကြားဖြတ် ညှို့ယူတာပါပဲ။ အဗရှလုံဟာ ကူမမယ့် ဘိုးတော်လုပ်ချင်သူပါဘဲ။ ဒါမျိုးတွေကို ရှာချင်၊ ကြည့်ချင်နေတတ်သူပါပဲ။

ဒီမှာရှိတဲ့ လက်ထောက်သင်းအုပ်တွေ၊ သင်းထောက်တွေ၊ အခြားအဖွဲ့ဝင်တွေကို ကျွန်တော် ပြောချင်တာက ဘုရားသခင်က ခင်ဗျားတို့ သင်းအုပ်ကို အမှုတော်လုပ်ငန်းတခုလုပ်ဖို့ ခေါ်ထားပါတယ်။ ခင်ဗျားတို့ကိုတော့ သင်းအုပ်ရဲ့အလုပ်ကို ကူညီပြီး ဘုန်းတော်ထင်ရှားဖို့ ခေါ်တယ်။ သူ့လက်တွေ အားမလျော့အောင် ထောက်မကြရမယ်။ ကျမ်းစာမှာ မောရှေဦးဆောင်တဲ့ တိုက်ပွဲကြီးတခုအကြောင်း ပြောထားတယ်။ အာရုန်နဲ့ ဟုရလက်ကို မောရှေလက်နဲ့ ထောက်မတာ မဟုတ်ဘူး။ သူတို့လက်နဲ့သာ မောရှေလက်ကို ထောက်မရတယ်။

တောခွေးတွေကတော့ သင်းအုပ်ကို မရိုသေကြဘူး။ သင်းအုပ်အမိန့်ပေးတာကို သဘောမကျဘူး။ - ဟေဗြဲ ၁၃းရ၊ ၁၇ မှာ ….

“ဘုရားသခင်၏ နှုတ်ကပတ်တော်ကို သင်တို့အားဟောပြော၍၊ သင်တို့ကို အုပ်သောသူတို့ကို အောက်မေ့ကြလော့။ သူတို့သည် အဘယ်သို့ ကျင့်ကြံပြုမူ၍ စုတေ့သည်ကို စေ့စေ့ဆင်ခြင်လျက်၊ သူတို့၏ယုံကြည်ခြင်းကို မှီအောင်လိုက်ကြလော့။”

“သင်တို့ကို အုပ်သောသူတို့၏ စကားကိုနားထောင်၍ နှိမ့်ချလျက် နေကြလော့။ သူတို့သည် ကိုယ်တိုင်စစ်ကြောခြင်းကို ခံရသောသူကဲ့သို့၊ သင်တို့စိတ်ဝိညာဉ်၏ အကျိုးအလိုငှါ စောင့်နေကြ၏။ သင်တို့အကျိုးကို မဖြစ်စေတတ်သော ဝမ်းနည်းခြင်းမရှိ၊ ဝမ်းမြောက်ခြင်းရှိ၍ သူတို့သည် စစ်ကြောခြင်းကို ခံရမည်အကြောင်း သတိပြုလျက်နေကြလော့။”

ဒီကျမ်းပိုဒ်မျိုးကိုတော့ တောခွေးတွေ ဖတ်လေ့မရှိပါဘူး။ သင်းအုပ်ဆရာကို မရိုသေကြတဲ့ တောခွေးတွေက “တို့က လူစကားနားထောင်တာမဟုတ်ဘူး။ ဘုရားစကားနားထောင်တာ” လို့ ဆိုတတ်တယ်။ သင်းအုပ်ဆရာစကား နားမထောင်ဘဲ ဘုရားစကား နားထောင်တယ်ဆိုတာ ဟေဗြဲ ၁၃ အရ မဖြစ်နိုင်ဘူး။ ဒုတိယမွေးဖွးပြီး Born again လွတ်လပ်စွာရပ်တည်သူ Independent fundamental အခြေခံ ယုံကြည်ချက်တွေကို ခံယူရပ်တည်တဲ့သူ အနှစ်တထောင်ကာလ မတိုင်မှီ ခရစ်တော် ပြန်ကြွလာမယ်လို့ ယုံတဲ့ဆရာ premillennial preacher ရဲ့ အုပ်စိုးခြင်းကို ဝန်မခံတဲ့့သူဟာ ဘုရားစကား နားထောင်တယ်ဆိုတာ မဖြစ်နိုင်ဘူး။

မကြာသေးခင်က အသင်းတော်တပါးမှာ သင်းထောက်တယောက်က သင်းအုပ်ကို “ဆရာက တရားပဲဟောပေါ့။ လုပ်စရာရှိတာတွေတော့ ကျွန်တော်တို့ လုပ်မယ်” လို့ ပြောတယ်။ သင်းအုပ်က ကျွန်တော့ကို ပြောတာကြားရအပြီး ကျွန်တော်က အဲဒီသင်းထောက်ရဲ့ အတွေးအခေါ်ကို ပြောင်းပေးလိုက်တယ်။

ဒါက မောရှေကိုပြောတဲ့ တောလည်ရာ ၁၆း၁-၅ ထဲက လူတွေနဲ့တူပါတယ်။ “သင်းအုပ်က သိပ်နေရာယူတာပဲ။ သိပ်အာဏာရှိ၊ သိပ်တာဝန်ရှိချင်နေတာဘဲ” လို့ ပြောသလိုပါပဲ။   

တောခွေးတွေက သင်းအုပ်ကို မလေးစားဘူး။ သူတို့က ၁ပေ ၅း၁-၄ ကို ထောက်ပြပြီး သင်းအုပ်ဆိုတာ သခင်ယေရှုအောက်က လက်ထောက်သိုးထိန်းပဲ။ ၁ကော ၁၁း၁ မှာ “ငါသည် ခရစ်တော်၏ နည်းတူကျင့်သကဲ့သို့ သင်တို့သည်လည်း ငါ့နည်းတူ ကျင့်ကြလော့။” လို့ ပြတတ်ပြန်တယ်။

ဘယ်အသင်းတော်မှာမှ ဦးခေါင်းဟာ သင်းအုပ်တပါးထက် ပိုမရှိဘူး။ လက်ထောက် သင်းအုပ်ပဲဖြစ်ဖြစ်၊ သင်းအုပ်ရဲ့ လက်ထောက်ပဲဖြစ်ဖြစ် သင်းအုပ်ရဲ့အမှုတော်ကို ဘုန်းထင်ရှားစေဖို့ လေးစားဖို့ လိုတယ်။ ဒါမှ အသင်းတော် တိုးပွါးမယ်။

တောခွေးတွေက သင်းအုပ်ရဲ့အခွင့်အာဏာကို လက်မခံချင်ဘူး။ သင်းအုပ်ရဲ့ အခွင့်အာဏာ ပြရတဲ့အခါ သင်းအုပ်စကားကို လူတွေနားထောင်ပြီး သူတို့စကားကို နားမထောင်တဲ့အခါ သူတို့မှာ စိတ်အနှောင့်အယှက် ဖြစ်ရတယ်။

ကျွန်တော်တော့ တောခွေးအူသံ ကြားရတယ်။ တောခွေးတွေအပေါ်မှာ တံပိုးမှုတ်လိုက်ပြီ လို့ ထင်တယ်။ ဟုတ်တယ်မဟုတ်လား။

၃။  တောခွေးရှိသမျှဟာ ဗိုလ်လုပ်ချင်ကြတယ်။
တောခွေးရှိသမျှဟာ ဗိုလ်လုပ်ချင်ကြတယ်။ သင်းအုပ်ကို သိပ်မလေးစားဘူး။ တောခွေးခေါင်းဆောင်၊ တောခွေးဗိုလ်ကြီးအကြောင်း လေ့လာကြည့်တော့ သူရှိတဲ့အတွက် တခြားတောခွေးတွေက ဝမ်းမြောက်နေမယ်လို့ ထင်ခဲ့တာ။ တကယ်တော့ အဲဒီလိုမဟုတ်ဘူး။ အဲဒီနေရာကို တိုက်ပြီးယူခဲ့တာ။ တောခွေးအုပ်ထဲမှာ အားလုံးက ဗိုလ်လုပ်ချင်သူတွေချည်းပဲ။ ဒါပေမယ့် တောခွေးဗိုလ်ကြီးက တခြားတောခွေးတွေအားလုံးကို သူ့အနားမှာ စုစုဝေးဝေး နေစေချင်တယ်။

တောခွေးတွေက သင်းအုပ်ဆရာကို ဘုရားသခင်ရဲ့လူအဖြစ် မလေးစားချင်ဘူး။ အားလုံးက ဗိုလ်ပဲလုပ်ချင်နေတယ်။ သူပြောတာက “ဆရာနဲ့ အေးအေးဆေးဆေးတွေ့ချင်တာ--- ပြောရမှာတော့ အားနာပါတယ်ဆရာ၊ လူတွေက ကျွန်တော့ကို လာလာပြောနေတော့ ” “ဒီလိုဖြစ်လာပြီဆိုရင်တော့ ကိုယ့်အနားမှာ တောခွေးတကောင် ရောက်နေပြီသာမှတ်။”

“ဆရာ လူတွေက ကျွန်တော့ဆီလာလာပြီး--- တဲ့” တောခွေး ဟုတ်မဟုတ် သေသေချာချာ သိချင်ရင် “ဘယ်သူတွေများလဲ” လို့ ပြန်မေးလိုက်ပါ။ ပြောမပြရင် တောခွေးဆိုတာ သေချာပြီ။

“ဆရာ လူတွေက ကျွန်တော့ဆီ လာလာနေတယ်။ ကျွန်တော် ဆရာ့ကို အကူအညီ ပေးနိုင်သမျှတွေကိုတော့ ဆရာသိစေချင်တယ်။” လို့ ဆိုလာတဲ့အခါ မိတ်ဆွေသဘောမျိုး နေရာ ယူနေပါပြီ။ ဒါက အနမ်းတချက်နဲ့ အပ်နှံမယ့် ယုဒပါပဲ။

“ဆရာ့ကို သိစေချင်တာက--- ” ဆိုတဲ့ စကားအရ သင်းအုပ်ဆီကို မလာဘဲ သူ့ဆီကို သွားနေတဲ့ သူတွေရှိနေတယ်။ အဲဒီပြဿနာကို သူကိုင်တွယ်နေရတယ်ဆိုပြီး ရင်ထဲမှာ ပျော်ရွှင် ဝမ်းမြောက်နေတာပေါ့။ သင်းအုပ် မကိုင်တွယ်နိုင်တာတွေကို သူကိုင်တွယ်နိုင်တယ်ဆိုပြီး ပျော်နေတာပေါ့။

“ဒါကြောင့် ဒီလူတွေ ဘယ်သူဆိုတာ ကျွန်တော်မပြောပြနိုင်ဘူး။ သူတို့က ယုံကြည်စိတ်ချလို့ ပြောပြထားတာ” လို့ ဆိုတတ်တယ်။ ကဲ မိတ်ဆွေတို့ ခင်ဗျားဟာ ဘုရားသခင်ရဲ့ လူကို အပ်နှံသူလား၊ ဘုရားသခင်ရဲ့အသင်းတော်ကို အပ်နှံသူလား။ ဘုရားသခင်ရဲ့ အမှုတော်ကို အပ်နှံသူလား။ သိပ်ရှက်စရာကောင်းပါတယ်။

၄။ တောခွေးတွေဟာ နောက်ကွယ်မှ ကြိုးကိုင်ချယ်လှယ်ကြတယ်။
တောခွေးတွေဟာ အကွယ်အကာ နောက်ကွယ်ကနေ တိုက်ခိုက်တတ်တဲ့ သဘောရှိတယ်။ တောခွေးဗိုလ်ကြီးက ေ့ရှကနေ ခပ်သုတ်သုတ်ကလေး ပြေးနေမယ်။ သူ့ညာဖက်မှာ ပိန်ပိန်ပါးပါး တောခွေးမက ခပ်သုတ်သုတ်ပြေးလိုက်တယ်။

တောခွေးဗိုလ်ကြီးက တောက်လျှောက်ပြေးနေတယ်။ တခါတရံမှာ သူ့ခေါင်းကို ညာဖက်လှည့်လိုက်၊ နောက် ဘယ်ဖက်လှည့်လိုက် လုပ်တယ်။ တောခွေးမက ညာဖက်မှာ နေရာယူရင် သူ့ခေါင်းကို ညာဖက်လှည့်တယ်။ တောခွေးမက ဘယ်ဖက်မှာ နေရာယူရင် သူ့ခေါင်းကို ဘယ်ဖက်လှည့်တယ်။ အဲဒီတော့ လမ်းတလျှောက်လုံးမှာ ဦးဆောင်နေတာက တောခွေးဗိုလ်ကြီး မဟုတ်တော့ဘဲ သူ့ဘေးမှာ ခပ်သုတ်သုတ်ပြေးနေတဲ့ တောခွေးမလေးက အမိန့်ပေးနေသလို ဖြစ်နေတယ်။

သင်းအုပ်ကတော်ဖြစ်ရသူတွေ-- သတိထား။ အဲဒီနေရာကို ရဖို့အတွက် တောခွေးများစွာ သေခဲ့ရတယ်။ သတိမထားရင် ကိုယ့်ခင်ပွန်း သင်းအုပ်ဆရာအသက်တာ သေသွားနိုင်တယ်။

သင်းအုပ်ဆရာတယောက်အကြောင်း ကြားဖူးတယ်။ သူက နှစ်ခြင်းပေးနေတာပါ။ ပြီးတော့ ဘေးတံခါးကနေထွက်ပြီး နှစ်ခြင်းခံပြီးလို့ ထွက်လာသူတွေကို လက်ဆွဲနှုတ်ဆက်ပါတယ်။

အဲဒီမှာ သင်းထောက်တယောက်က ဆေးလိပ်သောက်နေတယ်။ သင်းအုပ်က အထိတ်တလန့်ဖြစ်ပြီး သူ့ကို “အိမ်မှာသောက်တာကတော့ ခင်ဗျားအပိုင်းပေါ့ဗျာ၊ ဘုရားကျောင်းဝမှာတော့ ရပ်မသောက်ပါနဲ့ဗျာ” လို့ ပြောလိုက်တယ်။

သင်းထောက်က စီးကရက်ကို လွင့်ပစ်လိုက်ပြီး “ဒီမှာဆရာ၊ ခင်ဗျား မရောက်ခင်ကတည်းက ကျုပ်က ဒီအသင်းတော်မှာ ရှိနေတာ။ ခင်ဗျားမရှိတဲ့ နောက်ပိုင်းမှာလည်း ကျုပ်ရှိနေချင် ရှိနေဦးမှာပဲ။ ကျုပ်သောက်ချင်တဲ့နေရာ၊ သောက်ချင်တဲ့အချိန်မှာ သောက်ရမှာပဲ” လို့ ပြောတယ်။ သင်းအုပ်က “ကောင်းပြီ၊ ဘုရားသခင် ကြည့်စီရင်ပါလိမ့်မယ်- ဟုတ်လား” လို့ ပြန်ဖြေတယ်။ ပြောတော့

“အင်း- ကောင်းတာပေါ့” လို့ ဖြေတယ်။ အဲဒီအချိန်ဟာ တနင်္ဂနွေမနက်ပါ။ သူက ကုန်တင်ကားမောင်းတဲ့လူပါ။ နောက်တနေ့ သွားရမယ့်နေရာရောက်ဖို့ နာရီအများကြီး ဆက်မောင်းရဦးမှာပါ။

တနင်္လာနေ့မနက် ၂ နာရီ ၃နာရီလောက်မှာ အဲဒီလူရဲ့မိန်းမက သင်းအုပ်ကို ဖုန်းဆက်တယ်။ ငိုပြီးတော့ “ဆရာရေ ဒုက္ခပဲ ဒုက္ခပဲ” လို့ ဆိုတယ်။

“ဘာဖြစ်လို့လဲ” ဆိုတော့ - ခရီးမသွားခင်နားဖို့ တည်းခိုခန်းတခု ရှာထားတယ်။ အိပ်ယာထဲမှာ ဆေးလိပ်သောက်နေလျက်သားနဲ့ အိပ်ပျော်သွားတယ်။ အိပ်ယာမီးလောင်ပြီး သူသေသွားတယ်။ သူသောက်ချင်တဲ့နေရာ၊ သောက်ချင်တဲ့အချိန်မှာ စီးကရက်သောက်ခဲ့သူဟာ၊ ဘုရားသခင်နဲ့မှ ထိပ်တိုက် သွားတွေ့တော့တာကိုး။

Carl Lackey - အကြောင်း ပြောစရာအများကြီး ကျွန်တော့မှာ ရှိပါတယ်။ တခါက လူတယောက်က သူ့ကို ဆန့်ကျင်ဘက်ပြုတယ်။ အဲဒီလူက အနားရောက်လာပြီး ကားပြတင်းပေါက်ကို ချကာ ဆရာ Lackey ကို ကျိန်ဆဲသွားတယ်။ ပြီးတော့ ကားဆက်မောင်းသွားကာ လမ်းဘေးမှတ်တိုင်ကျောက်ကို ကျော်ပြီး သစ်ပင်ကို ဝင်ဆောင့်ကာ သေရတယ်။

ဘုရားသခင်ရဲ့လူကို ဆန့်ကျင်ဘက်ပြုတာကို သတိပြုပါ။ နောက်ကွယ်မှ ကြိုးကိုင်၊ ချယ်လှယ်ချင်သူတွေ သတိထားပါ။

“ငါအမျက်ပျင်းထွက်လျက် သင်တို့ကို ထားဘေးဖြင့် ကွပ်မျက်မည်။ သင်တို့မယားများသည် မုဆိုးမဖြစ်၍၊ သားသမီးများသည်လည်း မိဘမရှိသောသူငယ်ဖြစ်ကြလိမ့်မည်။”          ထွက်မြောက်ရာ ၂၂း၂၄။

ဧလိရှဲရဲ့ ငယ်ထိပ်ပြောင်တာကို လှောင်ပြောင်ကြတဲ့ ကလေး ၄၂ ယောက်ကို ဝံမတွေ ထွက်လာပြီး ကိုက်ဖြတ်ပစ်တယ်။ ဘာကြောင့်လဲ ဒီအကြောင်းမတိုင်ခင် ေ့ရှအခန်းကြီးက ဣသရေလလူတွေရဲ့ စိတ်ခံစားချက်ကြောင့်ပါဘဲ။

“လူငါးကျိပ်အုပ်သော တပ်မှူးကိုစေလွှတ်၍၊ တပ်မှူးသည် တောင်ပေါ်မှာထိုင်သော ဧလိယထံသို့ ရောက်ပြီးလျှင်၊ အိုဘုရားသခင်၏လူ သင်သည် ဆင်းရမည်အကြောင်း ရှင်ဘုရင် အမိန့်တော်ရှိသည်ဟု ဆို၏။ ဧလိယကလည်း ငါသည် ဘုရားသခင်၏လူမှန်လျှင် ကောင်းကင်က မီးကျ၍ သင်နှင့် သင််၏လူငါးကျိပ်တို့ကို လောင်ပါစေ ဟု လူငါးကျိပ်အုပ်သော တပ်မှူးအား ဆိုသည့်အတိုင်း ကောင်းကင်က မီးကျ၍ သူနှင့် သူ၌ပါသော လူငါးကျိပ်တို့ကိုလောင်လေ၏” (၄ရာ ၁း၉၊ ၁၀)

ဒါမျိုးနှစ်ကြိမ် ဖြစ်ခဲ့တယ်။ တတိယတပ်မှူးကတော့ မဆိုးဘူး။ ဘုရားသခင်ရဲ့ တရားစီရင်မှုကို ဖြစ်ပေါ်လာစေတဲ့ လူတွေရဲ့စိတ်သဘောကို တွေ့မြင်ရနိုင်တယ်။

သင်းအုပ်အကြောင်းပြောရင် လေးစားစွာပြောရမယ်။ ဘယ်သူမှ အိပ်ယာထဲမှာ “အင်း-မင်းသိလား၊ သင်းအုပ်က အဲဒီလိုလုပ်တယ်။ ဒါပေမယ့် ငါတော့ အဲဒီလိုမလုပ်ချင်ဘူး” လို့တောင် စကားအားဖြင့် မပြောသင့်ဘူး။

၅။  တောခွေးက သင်းအုပ်ကို အသင်းတော်အပေါ် ဦးဆောင်ခွင့်မပြုဘူး။
ကျွန်တော့လက်ထောက် သင်းအုပ်က အရင်က သူသင်းအုပ်လုပ်ဖူးတဲ့ အသင်းတော်မှာ သာသနာပြုဆရာတယောက် စေလွှတ်စရာရှိခဲ့တယ်။ အသင်းသားတွေရဲ့ ယုံကြည်စိတ်ချမှု ရဖို့လိုသေးတယ်လို့ ပြောပြတော့ အသင်းသားတွေက “ဆရာ စစ်ဆေးပြီးပြီလား” လို့ မေးတယ်။ ပြီးတဲ့အကြောင်း ပြောပြတော့ သူတို့က “ကျွန်တော်တို့ ကြားချင်တာက ဒီစကားပဲ” ဆိုပြီး သာသနာပြုဆရာကို စေလွှတ်ဖို့ မဲပေးကြတယ်။

သင်းအုပ်က “အဲဒီ သာသနာပြုဆရာဟာ ဘုရားသခင်ရဲ့ဝတ်မှာ မွေ့လျော်သူတွေအပေါ် လူငယ်တွေက ယုံကြည်မှုမရှိအောင် ဖျက်ချနေတယ်ဆိုတာ ပရိသတ်ကို ကျွန်တော် ပြောမပြချင်ဘူး ဆရာ” လို့ ဆိုတယ်။

တောခွေးဟာ သင်းအုပ်ကို အသင်းတော်ဦးဆောင်ခွင့် မပေးချင်ဘူး။

ကျွန်တော်ကြားဖူးတဲ့ ဖြစ်ရပ်တခုကို ကြားရသလို ပြန်ပြောပြချင်တယ်။ လက်မထပ်ရသေးတဲ့ ၁၅နှစ်အရွယ် ကလေးမတယောက်ဟာ ကလေးရမယ့် အခြေအနေမှာရှိနေပြီ။ သင်းအုပ်က စိတ်ကြေကွဲနေတဲ့ မိသားစုကို ခေါ်တွေ့တယ်။ မိန်းမငယ်က ထွက်သွားပြီး ပြန်မလာဘဲ နေတော့မယ့်သဘော။ သင်းအုပ်ကတော့ သူ့အသက်ကို ကယ်ဖို့နဲ့ ဘုရားသခင်နဲ့ မှန်ကန်စွာ လျှောက်လှမ်းနိုင်ဖို့ ကူမဖို့ ကြိုးစားနေတယ်။

အဲဒီအချိန်မှာ Miss wiggle Jaw - ဒေါ်မေးခါ ရောက်လာတယ်။ “ဆရာ ဒီကိစ္စ ဘယ်လိုလုပ်မလဲ။”

“တခုခုလုပ်ဖို့ ကျွန်တော်ကြိုးစားနေပါတယ်။”

“ကောင်းပါပြီ တခုခုကို အခု မြန်မြန်လုပ်သင့်တယ်။ ဘယ်မိန်းကလေးမှ အသင်းတော်ထဲမှာ ဒီလို မဖြစ်သင့်ဘူး။ မရှိသင့်ဘူး”

“ဒီကိစ္စ ကျွန်တော်လုပ်နေပါတယ်ခင်ဗျာ။”

“ကောင်းပါပြီ ကျွန်မအထင်တော့ ဒါတော်တော်ဆိုးတဲ့ ပြဿနာပဲ --- စသည်ဖြင့် --- စသည်ဖြင့်--- ပြောသွားပါတယ်။

အဲဒီအမျိုးသမီးက နီးစပ်ရာတွေကို သွေးဆောင်တော့ နောက်လိုက်အုပ်စုလေးတခု ဖြစ်လာတယ်။ ပြီးတော့ မကြေမနပ်အသံတွေ စဖြစ်အောင် လုပ်လာတယ်။

၂ ရက်-၃ ရက်လောက် ဟောင်ပွါ-ဟောင်ပွါ ပြောပြီးနောက်မှာတော့၊ တယောက်ယောက်က ကလေးအဖေဟာ ခင်ဗျားသားဘဲလို့ ကပ်ပြောသွားပါတော့တယ်။

အဲဒီနောက်တော့ သူ့ပါးစပ် ပိတ်သွားတယ်။ သင်းအုပ်က ထုတ်ပစ်တာ၊ ဒေါသထွက်တာတွေ မဖြစ်စေချင်တော့ဘူး။ သင်းအုပ်က လူတွေကို ကူညီမစ၊ ချစ်တတ်သနားတတ် သေလုဆဲဆဲလူတွေကို ပြုစုတတ်ဖို့ပဲ ဖြစ်စေချင်လာတော့တယ်။

အသင်းသားတယောက်က သူ့အိမ်မှာ လူတစုကို ရေကူးဖို့ ခေါ်ချင်တယ်။ သူ့အိမ်မှာ ရေကူးကန်ရှိတယ်။ ဒါပေမယ့် သင်းအုပ်ဆရာက “ဘက်စကက်ဘောတော့ ဘာကြောင့် မကစားလဲ၊ ဒါမှမဟုတ် ဘောလုံးကန်ဖို့ သွားပါလား၊ ဒါမှမဟုတ် တခြားတခုခု ကစားပါလား။

ဆရာက အဲဒီလူဟာ လိင်တူဆက်ဆံသူတယောက်ဆိုတာ ၉၅% လောက် သေချာတာကို သူ့လူတွေကို ပြောမပြနိုင်ခဲ့ဘူး။ ရေကူးရင်း ကောင်လေးတွေ ဖေါက်ပြန်တပ်မက်မှုတွေ ဖြစ်လာမယ့်အရေးက ကာကွယ်ဖို့ သူကြိုးစားနေတယ်ဆိုတာ ပြောမပြနိုင်ခဲ့ဘူး။

ဒါပေမယ့် အဲဒီမှာ တောခွေးတွေ ပါလာပြီ။ တံဖိုးမှုတ်ဖို့ လိုလာပြီ။ “ကောင်းပြီ၊ ကျွန်တော် ရှင်းပြမယ််။ ယောက်ျားလေး၊ မိန်းကလေး ရောပြီး ရေကူးတာ အဝတ်အစားမဲ့ ရောနေတာ မကောင်းဘူး။ ဒါပေမယ့် အိမ်တအိမ်မှာ ယောက်ျားလေးတွေ ရေကူးကြတာတော့ ဘာမှ မကောင်းပါဘူး။

သင်းအုပ်က အသင်းတော်ကို ဦးဆောင်ပါစေ။ ပြောမပြနိုင်ပေမယ့် သူသိတာတွေ ရှိနေတယ်။ သူ့သံသယကို သူပြောလိုက်ပြီး သက်သေမပြနိုင်ရင် အသင်းတော်ကို ကွဲပြားစေသလို ဖြစ်သွားနိုင်တယ်။ အဲဒီလူက အသင်းတော်သံစုံမှာ ဝင်ဆိုနေတဲ့သူ။ ဆရာက အသင်းတော် မပျက်စီးမကွဲပြားဘဲ အဲဒီလူကို ဖယ်ထုတ်ဖို့ ကြိုးစားဖို့ စီစဉ်နေရတယ်။

သင်းအုပ်ဆရာကို အခွင့်ပေးကြပါ။ အသင်းတော်ကို သူဦးဆောင်ပါစေ။

၆။  တောခွေးရန်က ကာကွယ်ဖို့ နည်းလမ်းကောင်းတခု
တောခွေးရန်က ကာကွယ်ဖို့ သင်းအုပ်အတွက် ကာကွယ်နည်းလမ်းကောင်းတခုဟာ တောခွေးစောင့် ခွေးကောင်းကောင်းတကောင်ပါဘဲ။ ခွေးမွေးပွကလေးတွေကို ပြောတာမဟုတ်ဘူး။ ခြေယိုင်ယိုင်နဲ့ ထွက်ထွက်လာတတ်တဲ့ ခွေးမျိုးကိုသာ ဆိုလိုတယ်။ သူ့အမေက ခွေးဘီလူးမျိုး။ သူ့အဖေကိုတော့ သူမတွေ့ဖူးဘူး။ ခွေးလေခွေးလွင့်ထဲကလို့ပဲ သူကြားဖူးတယ်။ သူ့နားရွက်တဖက်က ပဲ့နေပြီ၊ သူလမ်းလျှောက်ရင် သူ့ပုခုံးတွေက နိမ့်တုံမြင့်တုံနဲ့လာတဲ့ တောခွေးစောင့် ခွေးတကောင်ပါပဲ။

သင်းအုပ်တိုင်းမှာ တောခွေးစောင့် ခွေးကောင်းကောင်းတွေ ရှိဖို့လိုတယ်။

အသင်းတော်ကြီးတခုက ကျွန်တော့မိတ်ဆွေ တရားဟောဆရာမှာ အသင်းသား ၁၅၀၀ လောက်ရှိတယ်။ သူက ၆ပေ၃လက်မလောက်ရှိတဲ့ လူတယောက်ကို သက်သေခံပြီး ရလိုက်တယ်။ ကယ်တင်ခြင်းရပြီး သိပ်မကြာခင်မှပဲဲ သူ့ဆရာက သက်သေခံဖို့ခေါ်သွားတယ်။ အဖြစ်အပျက်ကလေးကို သူ့သင်းအုပ်ဆရာ ပြောပြပုံကတော့ ….

“ကျွန်တော်တို့ သက်သေခံဖို့ တနေရာ နှစ်နေရာလောက် သွားတယ်။ ပြီးတော့ မတွေ့ရတာ ကြာပြီဖြစ်တဲ့ အသင်းသားတယောက်ရဲ့အိမ်ကို ဝင်တယ်။

“ခင်ဗျားကို မတွေ့ရတာကြာပြီနော်” လို့ ပြောတော့ အေးစက်စက်နဲ့ “အင်း ဘယ်တွေ့မလဲ” လို့ ပြောပါတယ်။

“တခုခု မှားနေလို့လားဗျာ။”   “အင်း မှားတယ်။”   “ဘာမှားလဲဗျာ။”----

“ဆရာ …… ပြောချင်တာတွေက….  ဆိုပြီး - သိပ်ကြမ်းကြမ်းတမ်းတမ်း ပြောလာတယ်။

အဲဒီလို ပြောနေတုန်း ကျွန်တော့လူသစ်က ဗလကြီးဆိုတော့ လည်တိုင်ကို ဆွဲအစ်လိုက်ပြီး ကြမ်းပြင်ပေါ် ဆွဲလှဲချလိုက်တယ်။ “မင်းအသက်ရှင်နေသေ့ရွ ငါ့ဆရာအကြောင်း ဘယ်တော့မှ မပြောနဲ့ ကြားလား” လို့ ဆိုတယ်။

သူမပြောတော့ဘူး။ ကျွန်တော့အကြောင်းတောင် မကောင်းမတွေးတော့ဘူး။- လို့ ပြောပါတယ်။

ဒီလိုအပြုအမူမျိုး ကြမ်းပြလိုက်တာကို သဘောတူသလား။ မတူပါဘူး။ ဒါပေမယ့် သင်းအုပ်ဆရာတယောက်ဟာ သူ့လူသူ အမြဲတမ်းထိန်းပေးနိုင်စွမ်း မရှိနိုင်ဘူး။

ဒီက သင်းအုပ်တွေမှာလည်း ဘုရားဝတ်မှာမွေ့လျော်တဲ့သူ ၄၊ ၅ယောက်လောက် ရှိသင့်တယ်။ မကြေမနပ် ပြဿနာလုပ်တဲ့လူတယောက်ကို စည်းဝေးခန်းမထဲကနေ မြက်ခင်းပြင်ဘက် ဆွဲထုတ်ပြီး “ဟေ့ မင်း …… တို့ဆရာအကြောင်း မကောင်းပြောနေတာ ကြားရတာ ကောင်းကောင်းမွန်မွန်ပဲ ဖြစ်ချင်တယ်နော်၊ ဒါပေမယ့် တို့ဆရာအကြောင်း မကောင်းပြောတဲ့ မင်းပါးစပ်ပိတ်ထားဖို့ ကြပ်ကြပ်သတိပေးချင်တယ်” လို့ ပြောမယ့်လူစားမျိုးတွေ လိုပါတယ်။

တရားဟောဆရာကို သဘောမကျသူတွေက “ဒီဆရာကို ဘာကြောင့်မဲပေးသလဲ- အ့ံဩတယ်ကွာ” လို့ စပြောလာတတ်တယ်။

တရားဟောဆရာဖက်မှာ ရှိသူတွေက သေသေချာချာ စေ့စေ့ပြန်ကြည့်ပြီး “အေး အံ့ဩစရာတွေ ဖြစ်လာနေတာ ကြာပြီကွ။ ဒါပေမယ့် တို့မှာ ဘုရားကို ကြောက့်ရွံတဲ့ ချစ်တဲ့ သင်းအုပ်တယောက် ရှိနေလို့တော့ စိတ်ပူစရာမလိုပါဘူးကွာ။ ဘုရားသခင်က အသင်းတော် ဦးဆောင်ဖို့ သူ့ကို တာဝန်ပေးထားတာပဲ။ အရေးကြီးတဲ့ ဩဝါဒတွေ cardinal doctrine တွေ မငြင်းရင် နောက်မိန်းမနဲ့ ဖေါက်လွဲဖေါက်ပြန်မရှိရင်၊ ငါတော့ အဲဒီဘုရားသခင်ရဲ့လူနောက်ကို လိုက်ရတာ ပျော်တယ်။ ဘုရားသခင်က တို့ကို အဲဒီလို လူတယောက်ပေးထားတဲ့အတွက် ဝမ်းမသာဘူးလား” လို့ ပြန်မေးရမှာပဲဲ။

ကိုယ့်သင်းအုပ်ဘက်မှာ မရပ်တာ ရှက်စရာပါ။ တောခွေးတွေက သင်းအုပ်ကို အသင်းတော် ဦးဆောင်ခွင့်မပေးရင် အကောင်းဆုံး ကာကွယ်မှုကတော့ တောခွေးစောင့်၊ ခွေးပါပဲဲ။

၇။  တောခွေးရဲ့ တိုက်ခိုက်မှုကြားမှာ ဘယ်လိုရပ်တည်မလဲ?
တောခွေးရဲ့ တိုက်ခိုက်မှုကြားမှာ ရပ်တည်ဖို့ အကောင်းဆုံးနည်းက ဘာလဲ- အခု ဒီပရိတ်သတ်ထဲမှာ ဒဏ်ရာရထားတဲ့သူတွေ ဆိုးဆိုးဝါးဝါးကြံုကြံုနေရသူတွေ ပါပါတယ်။

တောင်ထိပ်က သိုးအိုကြီးဟာ တောခွေးကို လွတ်အောင်မပြေးနိုင်ဘူးဆိုတာ ကျွန်တော် တွေ့လာရတယ်။ ပြန် မတိုက်ခိုက်နိုင်ဘူး။ ဒါပေမယ့် အနံ့ကိုတော့ ကောင်းကောင်းသိတယ်။ တောင်ထိပ်က သိုးအိုကြီးတွေဟာ တောခွေးနံ့ရရင် တောခွေးအခြေအနေကို စူးစမ်းကြည့်တယ်။ ကျောက်တောင်တလျောက် လျှောက်ကြည့်တယ်။ လျှိုတွေထဲ ဆင်းကြည့်တယ်။ ပြီးရင် အထက်ကို တက်ပြေးတော့တယ်။ နောက်တနေ့ဆို ပိုမြင့်တဲ့နေရာရောက်နေပြီ။ နောက်ထပ်တနေ့ဆို ပိုမြင့်မြင့် ရောက်သွားပြန်ပြီ။ အမြင့်တက်ရင်းတက်ရင်းနဲ့ နောက်ဆုံးကျောက်တောင်ထိပ်ကို ရောက်သွားတော့တယ်။

အဲဒီမှာရှိတဲ့ လေနုအေးကို တောခွေးတွေမခံနိုင်ဘူး။ သိပ်မြင့်လွန်းအားကြီးတယ်။ လေက အေးလွန်း၊ ပြင်းလွန်းတယ်။ ဒါပေမယ့် သိုးအိုကြီးတွေက သဘောကျတယ်။ သူတို့အတွက်တော့ သိပ်ကောင်းတဲ့နေရာပဲ။

အခုကနေ နောက် ၅ နှစ်လောက်ကြာရင် ဘုရားအလုပ် မလုပ်တော့မယ့် တရားဟောဆရာတွေ အထောက်အမဖြစ်ခဲ့တဲ့ သင်းအုပ်ဆရာကတော်တွေကို ကျွန်တော် ပြောနေတာပါ။ ဒီလိုဖြစ်ဖို့ မရည်ရွယ်ခဲ့ပေမယ့် ကျောမှာ ဓါးထောက်ခံနေရပြီ။ ကိုယ်ခင်ပွန်း သင်းအုပ်ဆရာရဲ့ အမှုတော်အတွက် စိုးရိမ်စိတ်တွေ ခံစားနေရပြီ။ မိတ်ဆွေဖြစ် ဟန်ဆောင်သူတွေကြောင့် အထဲမှာ ဖိစီးအားနဲ့ ကြေမွသွားရပြီ။

ဒီထက်ပိုဆိုးတာက ဆရာကတော်နဲ့ ဆရာ့ကို ချစ်တယ်လို့ ပြောတဲ့သူတွေကို မြင်ရင်း၊ စောင့်ကြည့်ရင်းနဲ့ ကိုယ့်ယောက်ျားကျောမှာ ထိုးခံရတာပါဘဲ။ ဆရာကတော်တို့ရဲ့ သားသမီး၊ ကလေးတွေ အကြောင်းဆိုပြီး သူတို့ပြောတာတွေလည်း ကြားရတယ်။ ဒါလည်း ကိုယ့်ကို တခုခုတော့ ဒုက္ခပေးတာပါပဲဲ။ ဒီစကားတွေကြောင့် ကိုယ့်မှာ ဘာအကျိုးမှမရနိုင်ဘူး။

ကိုယ့်ခင်ပွန်းဆရာက သက်သေခံ စိတ်ဝိညာဉ်ရယူဖို့ အစီစဉ်အသစ်တွေ စတင်နေလိမ့်မယ်။ ကိုယ်ကလည်း ကြိုးစားပါဝင်ရမှာပေါ့။ ဒါပေမယ့် တိုက်ပွဲကစပြီ။ ဘာလုပ်ရမှန်း သိဖို့ ခက်လာပြီ။

ကျွန်တော့အနေနဲ့ အဖြေ ဒါဇင်ဝက်လောက် ပေးချင်ပေမယ့် မပေးနိုင်ဘူး။ အဖြေတခုပဲ ပေးနိုင်တယ်။ အမြင့်ကို လှမ်းတက်ဖို့ပဲ လိုတယ်။

ကျွန်တော်ဟာ Sword စည်းဝေးကြီးကို နှစ်စဉ်အိမ်ရှင်အဖြစ် ကျင်းပနေတဲ့ ဒီအသင်းတော်ရဲ့ သင်းအုပ် Dr. Bobby Roberson ထံမှာ လက်ထောက်အဖြစ် ရနှစ်ခွဲလောက် လုပ်ဆောင်ဖူးတယ်။ လွန်ခဲ့တဲ့ နှစ်ပေါင်း ၃၀လောက်တုန်းက လက်ထောက်အဖြစ် ကျွန်တော့ကိို ခေါ်ခဲ့တာပါ။ ကျွန်တော် ဒီကိုရောက်တော့ ဆရာ့မှာ စစ်ပွဲတခုထဲက ထွက်လာတဲ့ပုံမျိုးပါ။ ကျွန်တော် ရှိတုန်းမှာလည်း နောက်တပွဲကို သူရင်ဆိုင်ရသေးတယ်။

ကျွန်တော့ကို ခေါ်တဲ့အတွက် ဆရာ့ကို လူတစုက အပြင်းအထန် ဆန့်ကျင်ကြတယ်။ ကျွန်တော် ဒီမှာနေတုန်းက  လုံးဝ အလုပ် လုပ်မရသလောက်ဘဲ။ ကြိုးစားလုပ်ချင်ပေမယ့် ဘယ်လိုလုပ်ရမလဲ ကျွန်တော်မသိခဲ့ဘူး။ ဒါပေမယ့် ကျွန်တော်ဟာ Bro. Bobby အတွက် အမြဲသစ္စာရှိခဲ့ပါတယ်။

တနေ့ သူ့အိမ်ကိုသွားခဲ့တာကို သတိရမိတယ်။ Bro. Bobby ကျွန်တော်တို့ -- ဒီလူ-- ဒီလူတွေကို ဘာကြောင့် မဲနဲ့ ပြုတ်သွားစေရတာလဲ” လို့ ပြောတော့ ….

ဆရာ့မှာ မျက်ရည်ဝဲရင်းက “အေး Larry ရေ တို့လုပ်ရင် ရနိုင်ပေမယ့် ဒီမှာရှိတဲ့ လူတချို့က နားမလည်နိုင်ဘူး။ လူကောင်းတချို့ကို စိတ်နာကျင်အောင် လုပ်နေကြပြီ။ အဲဒီလို မဖြစ်စေချင်ဘူးကွာ။ ဒီကိစ္စမှာ တချို့က ကိုယ်ဘာလုပ်နေတယ်ဆိုတာ ကိုယ်မသိကြဘူးကွ။ လူကောင်းတွေကို ဖျက်ဆီး မပစ်ချင်ဘူးကွာ” လို့ ပြန်ပြောပါတယ်။

ဒါဟာ စနေနေ့ည ညနက်ပိုင်းမှာ ဖြစ်တဲ့ကိစ္စပါ။ ကျွန်တော့ဆရာ အရမ်းစိတ်ပင်ပန်းနေပြီ။ အရင်အဆောက်အဦး ဟောင်းကြီးထဲမှာရှိတဲ့ သူ့ရုံးခန်းထဲက ထွက်လျှောက်လာတယ်။ အခု ဒီခန်းမထဲမှာ မတ်တပ်ရပ်ရင်း သူ့ကြည့်ရတာ သူ့ပုခုံးမှာ တန် ၁သန်းလောက် အလေးချိန် ထမ်းထားရပုံ ပေါက်နေတယ်။

ကျွန်တော်က Bro. Bobby ဆရာဒီပွဲမှာ တော်တော်ပင်ပန်းသွားပြီနော်” လို့ ပြောတယ်။

မျက်ရည်တွေ ပိုးပိုးပေါက်ပေါက်ကျရင်း Larry ဘုရားသခင်က ငါ့လို တောသား တရားဟောဆရာတယောက်ကို ဒီမှာ ဘာကြောင့်ထားသလဲလို့ ခဏခဏ အံ့ဩမိတယ်ကွာ။ တခါတခါ တောင်ပေါ်တက်ပြီး လူ ၁၀၀လောက် အသင်းတော်ကလေးကို ဦးဆောင်ချင်လာတယ်။ ဘယ်လောက် စိတ်သက်သာမလဲကွာ။ ဒါပေမယ့် ရှိသမျှသိုးငယ်ကလေးတွေ အားလုံးနဲ့ သူတို့ရဲ့ ေ့ရှရေးကို တွေးမိပြန်တယ်ကွာ” လို့ ပြောလာတယ်။

ဆရာဟာ ကမ္ဘာမှာ အံ့ဩစရာအကောင်းဆုံး သင်းအုပ်ပါပဲ။ Bro. Bobby အကြောင်း ကောင်းသတင်းတွေ အများကြီး ကြားဖူးကြမှာပါ။ တဝက်ကိုတောင် မှီဦးမှာ မဟုတ်ဘူး။ ကျွန်တော် ရ နှစ်ခွဲလောက် သူနဲ့ အတူ အလုပ်လုပ်ခဲ့၊ နေခဲ့ဖူးတယ်။ သူဟာ တကယ် တော်တဲ့သူပါ။

ကျွန်တော် နားလည်လိုက်တာကတော့ ဘုရားရဲ့မေတ္တာနဲ့ ကောင်းကြီးတွေကို ဝေမျှနေသူ တယောက် ဖြစ်မယ့်အစား စိတ်ညစ်သူ၊ စိတ်ဆိုးသူ ဖြစ်သွားနိုင်ပေမယ့် တခုမှ ဖြစ်မသွားခဲ့ဘူး။ တောခွေးရဲ့ တိုက်ခိုက်မှုကို ခံရချိန်မှာ သူက အမြင့်ကို တက်-တက်သွားတယ်။ အဲဒီမှာ ဝပ်နေပြီးတော့ ဘယ်သူမှ နားလည်မပေးနိုင်ပေမယ့် သခင်ယေရှု နားလည်ပေးနိုင်တာကြောင့် သခင်ဘုရားနဲ့ စကားပြောတော့တယ်။

သင်းအုပ်တွေနဲ့ သင်းအုပ်ကတော်တွေ တိုက်ပွဲမှာ ဒဏ်ရာရပြီး သေနတ်ပြောင်းဝေ့ရှမှာ ရှိနေရသူတွေကို အားပေးချင်ပါတယ်။ တောခွေးအူသံကြားရင် အထက်အရပ်ကို တက်ပါ။ ကျမ်းစာဖတ် သခင်ဘုရားနဲ့ အချိန်ယူပါ။ ဆိုးဆိုးဝါးဝါးတွေ၊ ဆိုးညစ်မိုက်မဲမှုတွေ မဖြစ်စေပါနဲ့။ ဒီနည်းနဲ့ ဘဝပျက်မသွားစေနဲ့။ ဒါတွေကြောင့် အမှုတော်အပျက်မခံပါနဲ့။ ဒီကိစ္စတွေကြောင့် တရားဟောဆရာ လူဆိုးမဖြစ်ကောင်းသလို သင်းအုပ်ကတော် ဆိုးတယ်လို့လည်း မဖြစ်စေပါနဲ့။ အထက်အရပ်ကိုသာ တက်ပါ။ အဲဒီမှာ တောခွေးတွေအတွက် တံပိုးခရာ မှုတ်လာနိုင်ပါလိမ့်မယ်။

Saturday, October 24, 2015

အေမရိကန္ေရြးေကာက္ပြဲ သမၼတေလာင္းမ်ားနဲ႔ ယံုၾကည္မႈ Presidential Candidates in 2015

Republican
ရီပတ်ဗလီကင် ၄၂ ရာနှုန်းက သူတို့ပါတီရဲ့ သမ္မတလောင်းဟာ Donald Trump ဖြစ်မယ်လို့ ထင်ကြတယ်။ ၄၃ % ကတော့ ရွေးကောက်ပွဲကြီးမှာ နိုင်ခြေ အရှိနိုင်ဆုံးသူ ဖြစ်တယ်လို့ သူ့ကို ယူဆကြတယ်။ ၁၅% က Ben Carson ။ ၁၂% က Jeb Bush လို့  ABC News ရဲ့ စစ်တမ်းက ဆိုတယ်။ Marco Rubio က နံပါတ် ၄ နေရာ ရပြီး ထောက်ခံသူ  ၅ % ရှိပါတယ်။ - The Washington Examiner

Conservative group တခုရဲ့ Christian Voting Guide က Biblical qualifications ကျမ်းစာပါ အရည်အချင်းတွေကို ကြည့်ပြီး မဲလမ်းညွှန်ရာမှာတော့ -

Arkansas ပြည်နယ်အုပ်ချုပ်ရေးမှုးဟောင်း Mike Huckabee က "A" ရပြီး၊ Donald Trump က "F" ပဲရတယ်။

ဒီစစ်တမ်းကို USA Christian Church ရဲ့ Pastor Steven Andrew က ကောက်ယူတာဖြစ်ပြီး သမ္မတဖြစ်ဖို့ ကျမ်းစာပါ အရည်အချင်းနဲ့ညီသူ ၄ ယောက်ပဲ ရှိတယ်လို့ ဆိုတယ်။ သမ္မတရားကို မြတ်နိုးမှု truthfulness ၊ လောဘကင်းမှု၊ ဘုရားပေးအခွင့်အရေးတွေကို ကာကွယ်မှု၊ ဘုရားကို ကြောက်ရွံ့ ရိုသေမှု၊ ခရစ်ယာန် ဘာသာရေးလွတ်လပ်ခွင့်ကို ကာကွယ်မှုတွေနဲ့ တိုင်းတာခဲ့တယ်။ Ted Cruz, Ben Carson, နဲ့ Rand Paul တို့က B- grade ရကြပြီး၊ Huckabee က A ရပါတယ်။

Trump, Carly Fiorina, Marco Rubio, Jeb Bush, Chris Christie, Hillary Clinton, Joe Biden, and Bernie Sanders တို့က F grade ပဲ ရကြပါတယ်။


Mike Huckabee

Mike Huckabee
 “ငွေကုန်ခံနိုင်တာ မကြည့်နဲ့။ လူကြိုက်များတာ မကြည့်နဲ့။ ဘုရားစိတ်တော်နဲ့တွေ့ဖို့ လိုတယ်။ ဘုရားစိတ်တော်နဲ့ တွေ့တဲ့သူ ဦးဆောင်မှ တိုင်းပြည် ကောင်းကြီးခံရမယ်။ Mike Huckabee ကတော့ ဒါဝိဒ်မင်းနဲ့ အနီးစပ်ဆုံးသူ ဖြစ်တယ်” လို့  Pastor Andrew က ဆိုတယ်။ Mike Huckabee ဟာ နှစ်ခြင်း သင်းအုပ်ဆရာ ဖြစ်ခဲ့ဖူးတယ်။

Ted Cruz


Ted Cruz
Evangelicals တွေကြားမှာ လူသိများတဲ့ Ted Cruz ကတော့ "လူကို ပြောင်းလဲစေနိုင်တဲ့ ခရစ်တော်ရဲ့ မေတ္တာကြောင့်သာ မဟုတ်ရင် ကျွန်တော်ဟာ အိမ်မှာ အဖေမရှိဘဲ အမေတယောက်တည်းက

ကြည့်ရှုပြုစုရင်း ကြီးပြင်းလာရသူ ဖြစ်ခဲ့မှာပဲ။" လို့ ဆိုတယ်။ သူ ငယ်ငယ်မှာ အဖေက အရက်သမား။ မိသားစုကို ပစ်ပြီး၊ အိမ်က ထွက်သွားတယ်။ တခြားပြည်နယ်ရောက်တော့ ဧဝံဂေလိတရား ကြားရပြီး၊ ကယ်တင်ခြင်းရကာ အိမ်ပြန်လာခဲ့တယ်။ အခုတော့ သူ့အဖေဟာ သင်းအုပ်ဆရာ Pastor Raphael Cruz ဖြစ်နေပြီ။

Ben Carson



Ben Carson
Ben Carson က Seventh-day Adventist တယောက်ဖြစ်ပြီး၊ အဓိက ခရစ်ယာန် အသင်းတော်များထဲမှာ ပါလေ့မရှိတဲ့ အသင်းတော်ပါ။ သုတ္တံကျမ်းကို ဖတ်ရင်း ဒေါသစိတ်ကို ထိန်းချုပ်လာနိုင်ခဲ့တယ်။ Booker T. Washington အကြောင်းစာအုပ်နဲ့ ဓမ္မဟောင်းကျမ်းထဲက ယောသပ် အကြောင်းဟာ သူ့ကို ပုံသွင်းပေးတဲ့ အကြောင်းအရာတွေလို့ ဆိုတယ်။ “Our land right now is in need of God's healing hands.”  “တို့တိုင်းပြည်ဟာ အခုအချိန်မှာ ဘုရားလက်တော်နဲ့ ကုစားဖို့ လိုနေပြီ။” လို့ ဦးနှောက်ခွဲစိတ် ဆရာဝန်ကြီးဖြစ်ခဲ့တဲ့ Dr. Ben Carson ဆိုပါတယ်။

Jeb Bush


Jeb Bush
Jeb Bush ရဲ့ ဖခင် George H.W. Bush က Episcopalian ။ မိခင် Barbara က Presbyterian ။ အကို George W. Bush က Billy Graham နဲ့ စကားပြောပြီးနောက်ပိုင်း အရင်လို အရက်မသောက်တော့ဘူးဆိုတဲ့ evangelical တယောက်ဖြစ်ပေမယ့် Jeb Bush ရဲ့ ဇနီးက Catholic ဖြစ်တော့၊ Jeb ကလည်း Catholic ပါ။

Donald Trump


Donald Trump

Republican ထဲမှာ ရှေ့ဆုံးက ပြေးနေတဲ့ Trump ဟာ ဘုရားကို ကိုးကွယ်တာ မဟုတ်ဘူး။ ငွေကို ကိုးကွယ်တာလို့ Andrew ဆိုတယ်။ Donald Trump ဟာ Presbyterian တယောက်ဖြစ်တယ်။ ဒါပေမယ့် သူက …. "ဘုရားသခင်ထံမှာ ခွင့်လွှတ်ခြင်းရဖို့ တခါမှ ဆုမတောင်းဖူးဘူး။ အမှားလုပ်မိရင် အမှန်ပြင်ဖို့ပဲ ကြိုးစားတယ်။ ဘုရားကျောင်းသွားရင်ပဲ စပျစ်ရည်သောက်တယ်။ တခြားမှာ မသောက်ဘူး။ မုန့်တဖဲ့ စားတယ်။ ဒါကခွင့်လွှတ်ခြင်း ခံရဖို့လေ။ ဒါတော့ ခဏခဏ လုပ်တယ်။" လို့ ဆိုတယ်။

Oct 15-18 အတွင်းထွက်လာတဲ့ Wall Street Journal/NBC News ရဲ့ စစ်တမ်းတွေအရ Trump ဟာ Republican တွေကြားမှာ လူကြိုက်အများဆုံးအဖြစ် ၂၅% ထောက်ခံမှုရကာ ရှေ့ဆုံးက ပြေးနေပြီး၊ Carson က ၂၂%၊ Huckabee က နောက်ဆုံးနားမှာ ၃% ပဲ ထောက်ခံမှုရပါတယ်။

Trump အနေနဲ့ Republican သမတလောင်းအဖြစ်အရွေးခံရရင် ဦးနှောက်ခွဲစိတ် ဆရာဝန်ကြီးဖြစ်ခဲ့တဲ့ Ben Carson ကို ဒုသမ္မတလောင်းအဖြစ် လက်တွဲမလားလို့ မေးရာမှာတော့
မစဉ်းစားရသေးဘူး လို့ ဆိုတယ်။

"လူတွေထင်သလို ကျွန်တော်တို့ နှစ်ယောက်က ပုံစံမကွာလှပါဘူး။ ရင်းရင်းနှီးနှီးပါပဲ။ ပုံစံချင်းတော့ မတူဘူးပေါ့။ ကျွန်တော် တော်တာရှိသလို၊ သူတော်တာတွေလည်း ရှိတယ်။" "သူ့ကို သဘောကျတယ်။ ကျွန်တော်ကိုလည်း သူသဘောကျပါတယ်။"

Democratic

Bernie Sanders


Bernie Sanders

Vermont ပြည်နယ် senator နဲ့ Democratic သမ္မတလောင်း အသက် ရ၄ နှစ်အရွယ် Bernie Sanders ကတော့ ဂျူးလူမျိုး ဖြစ်တယ်။ ဒီမိုကရက်တစ် ဆိုရှယ်လစ် တယောက် ဖြစ်တယ်။ ဘာသာရေးနဲ့ ဝေးဝေးနေလေ့ ရှိတယ်။

Deeply conservative Christian school ဖြစ်တဲ့ (ကွန်ဆာဗေးတစ် အားကြီးတဲ့ ခရစ်ယာန် ကျောင်းတကျောင်းဖြစ်တဲ့) Liberty University မှာ လာ မဲဆွယ်ရာမှာတော့ ကိုယ်ကျင့်တရား ရှိတာ၊ ရိုးသားတာ၊ သူတပါးအပေါ် ကောင်းဖို့ သင်ယူနေကြတာ ကောင်းတယ် လို့ ဆိုတယ်။ "ကိုယ်ဝန်ဖျက်တာနဲ့ ယောကျင်္ားချင်း လက်ထပ်တာတွေကတော့ ခင်ဗျားတို့ သိပ်အလေးအနက်ထားမှန်း သိပါတယ်။ ဒီနေရာမှာတော့ သဘောထားကွဲပါတယ်။ ဒါပေမယ့် တိုင်းပြည်နဲ့ ကမ္ဘာကြီးအတွက် တခြား အကြောင်းအရာတွေ ရှိသေးတယ်။ သဘောထားတွေ ကွဲလွဲပေမယ့် အတူလက်တွဲ ဖြေရှင်းကြရပါမယ်။"


Hillary Clinton


Hillary Clinton


နိုင်ငံခြားရေးဝန်ကြီးဟောင်း Hillary Clinton ကတော့ ပထမဆုံးအမျိုးသမီး အမေရိကန် သမ္မတဖြစ်ဖို့ ကြိုးစားနေသူ ဒီမိုကရက်ပါ။ သူက Methodist ပါ။ Liberal Democrat ဖြစ်ပေမယ့် ဘာသာရေးအကြောင်း လူသိရှင်ကြား ပြောတတ်တယ်။ သူ့ပါတီထဲက ဘာသာရေးအပေါ် တင်းမာသူတွေကို သဘောထားအမြင် ပြောင်းစေချင်သူ ဖြစ်တယ်။ ဒါပေမယ့် ကိုယ်ဝန်ဖျက်တာ၊ လိင်တူလက်ထပ်တာတွေကို တရားဝင်လက်ခံဖို့ ဘာသာရေးအမြင်တွေကို ပြောင်းလဲစေချင်သူလည်း ဖြစ်နေပြန်ပါတယ်။

သူ့ကို Most godless member of the Senate ဆီးနိတ်မှာ ဘုရားမဲ့အဖြစ်ဆုံး အမျိုးသမီးလို့ ဝေဖန်သူတယောက်က ဆိုတယ်။ Jerry Falwell က Hillary Clinton ဟာ "လူစီဖါက ဒီမိုကရက် သမ္မတလောင်းအဖြစ် အရွေးခံရင်တောင် သူ့လောက် conservative evangelicals  တွေနဲ့ အခြေခံထားတဲ့ Republican တွေရဲ့ ထောက်ခံမှုကို ရမှာ မဟုတ်ဘူး။" လို့ ဆိုဖူးပါတယ်။ ဘာသာရေးကို နိုင်ငံရေးအတွက် အသုံးချသူလို့ ဆိုချင်တာပါ။       ။

Friday, August 28, 2015

သွေးပေါင်ကျတယ် ဆိုတာ (၁) - Low Blood Pressure (1)

 သွေးပေါင်ကျတယ်ဆိုတာ - What is low blood pressure?

သွေးပေါင်ကျ (hypotension) တာကို လူတွေ စိုးရိမ်တတ်ကြတယ်။ တကယ်တော့ စိုးရိမ်စရာ မရှိပါဘူး။ တချို့က သာမန်ထက် သွေးပေါင်ကျနေတတ်တယ်။ ဒါကတကယ်တော့ သတင်းကောင်းပဲ။ သွေးပေါင်ကျရင် လေဖြတ်နိုင်ချေ၊ နှလုံးရောဂါ ဖြစ်နိုင်ချေ နည်းပါတယ်။ ဒါပေမယ့် သွေးပေါင်ကျတာက တခါတရံ ဒုက္ခပေးတဲ့အတွက် ဆရာဝန် (သို့) သူနာပြုဆရာမကို ပြသသင့်ပါတယ်။

ဘယ်လောက်ဆိုရင် သွေးပေါင်ချိန်ကျသလဲ? What is a low blood pressure reading?
90/60 mmHg နဲ့ သူထက်နဲနေရင် သွေးပေါင်ကျပါတယ်။
တနည်းပြောရရင် -
- အပေါ်က ၉၀ ရှိရင်၊ အောက်က ဘယ်လောက်ရှိရှိ သွေးပေါင်ကျတာ ဖြစ်နိုင်တယ်။
- အောက်က ၆၀ ထက် နဲနေရင်၊ အပေါ် ဘယ်လောက်ရှိရှိ သွေးပေါင်ကျတာ ဖြစ်နိုင်တယ်။

ဘာကြောင့် သွေးပေါင်ကျသလဲ? What causes low blood pressure?
တချို့က နဂိုကတည်းက သွေးပေါင်ချိန် နဲကြတယ်။ ဘာကြောင့်လို မပြောနိုင်ပါဘူး။
တချို့ကျန်းမာရေးအခြေအနေတွေနဲ့ သောက်တဲ့ဆေးတွေကြောင့် သွေးပေါင်ကျနိုင်ပါတယ်။

စိုးရိမ်ရသလား? Is low blood pressure dangerous?
အများအားဖြင့်တော့ စိုးရိမ်စရာ မလိုပါဘူး။ တခါတရံတော့ မူးတာ၊ သတိလစ်တာအထိ ဖြစ်တတ်တယ်။
ပုံမှန်ထက် ဆိုးဆိုးဝါးဝါး သွေးပေါင်ချိန် ရုတ်တရက် ထိုးကျသွားရင် အကြောင်းရင်း တခုခုကြောင့် ဖြစ်တဲ့အတွက် ဆရာဝန် (သို့) သူနာပြုဆရာမကို ပြသသင့်ပါတယ်။

ဘယ်လိုကုမလဲ? How is low blood pressure treated?
သွေးပေါင်ကျတဲ့သူအများစုကတော့ ကုဖို့ မလိုပါဘူး။
ဆရာဝန် (သို့) သူနာပြုဆရာမက ကုဖို့လိုတယ်လို့ ယူဆရင်တော့ သွေးကျရတဲ့အကြောင်းရင်းကို ရှာပါလိမ့်မယ်။ ရှာတွေ့တဲ့အခါ ဘယ်လိုကုမလဲဆိုတာ ဆုံးဖြတ်နိုင်ပါလိမ့်မယ်။
http://www.bloodpressureuk.org မှ ပြန်ဆိုပါတယ်။

Sunday, August 9, 2015

Morning and Evening: Charles Spurgeon 1- 32 (Burmese)


 မိုးသောက်ယံနဲ့ ညဦးယံ - Morning and Evening: Charles Spurgeon 01

Charles Spurgeon ကို Prince of Preachers တရားဟောဆရာ- မင်းသားတပါး၊ ၁၉- ရာစု တမန်တော်၊ ဝိညာဉ်ရေး စာရေးဆရာ၊ အသင်းတော်များစွာ တည်ထောင်သူ၊ ယုံကြည်ခြင်းတရားကို ကွယ်ကာသူ၊ သခင်ယေရှုခရစ်ရဲ့ ကျွန် …. စသည်ဖြင့် တင်စားကြတယ်။ မျက်မှောက်ခေတ် ဧဝံဂေလိလမ်းကြောင်းတခုကို ပြိုင်ဘက်မရှိ လင်းစေခဲ့သူလည်း ဖြစ်တယ်။ လန်ဒန်မြို့ရဲ့ အချက်အချာဖြစ်တဲ့ Metropolitan Tabernacle မှာ လူ ၅၀၀၀- ၆၀၀၀ ခန့်ကို တနင်္ဂနွေနေ့တိုင်း နှစ်ပေါင်း ၃၀- ကျော် တရားဟောခဲ့သူ ဖြစ်ပါတယ်။

ကမ္ဘာတဝှမ်းရှိ လူသန်းပေါင်းများစွာတို့ ကောင်းကြီးခံစားရဖို့ရာ သူ့တရားဒေသနာတွေနဲ့ ထုတ်ဝေခဲ့တဲ့ စာအုပ်တွေကို နိုင်ငံခြား ဘာသာစကား ဒါဇင်များစွာနဲ့ ပြန်ဆိုခဲ့ရတယ်။ နှစ်ပေါင်း ၁၀၀-ခန့်ကြာပါပြီ။ ဒါပေမယ့် အရပ်ရပ်က ခရစ်ယာန်တွေက သူ့စာအုပ်တွေကို ဖတ်ရှုနေရဆဲ ဖြစ်လို့ ……..

Spurgeon … ကား `သေသော်လည်း ယခုပင်တရားဟောသေး၏။” (ဟေဗြဲ ၁၁: ၄)

သူဟာ Calvinist တဦးဖြစ်ပြီး၊ နှုတ်ကပတ်တော်ကို ကွယ်ကာစောင့်ရှောက်သူလည်း ဖြစ်တယ်။ သူ့ခေတ်မှာ အသင်းတော်တွေကို မှောက်လှန်နေတဲ့ ….. “New Theology” ခေါ် မြွေဆိုးအဆိပ်အတောက် Liberalism ကို ရဲရဲဝံ့ဝံ့ ပြတ်သားပြတ်သား ဆန့်ကျင်ခဲ့တယ်။ အဲဒီ ဩဝါဒ ဒီရေတွေကြားထဲမှာ သူ့သခင်အတွက် သစ္စာရှိရှိ တစ်ယောက်တည်း ရပ်တည်ကာ သမ္မာတရားလမ်းမှ လွဲသွားသူတွေနဲ့ မပေါင်းဘဲ သီးခြားရပ်တည်ခဲ့တယ်။

သူက …

“ကျွန်တော်ဟာ ဘယ်သူ့ ရန်သူမှ မဟုတ်ဘူး။ ဒါပေမယ့် ထာဝရဘုရားရဲ့ နှုတ်ကပတ်တော်နဲ့ ဆန့်ကျင်တဲ့ သွန်သင်ချက်တွေ အားလုံးကိုတော့ ရန်သူပဲ။ ကျွန်တော် အဲဒါတွေနဲ့ ဘယ်တော့မှ မိတ်မဖွဲ့ဘူး။ ခင်ဗျားတို့ဆီမှာ လှိမ့်ဝင်လာနေတဲ့ အဲဒီကြောက်စရာ ဒီရေလှိုင်းတွေကို ခင်ဗျား တားဆီး ထိန်းချုပ်နိုင်ပါစေ။ ….. ”
Spurgeon စကားတွေက ဒီနေ့ခေတ်အထိ ပြတ်ပြတ်သားသား တရားဟောနေတုန်းပါပဲ။


မိုးသောက်ယံနဲ့ ညဦးယံ

1
နွမ်းလျသူကို စောင့်ကြိုနေသော- - ချမ်းသာ

“. . . . . ငါ့ထံသို့ လာကြလော့။ ငါသည် ချမ်းသာပေးမည်။“ (မဿဲ ၁၁:၂၈)
ယောရှု ၅: ၁ - ၁၂
  ဟေဗြဲ ၃: ၁၂ - ၁၉

​ဣသရေလလူတွေ တောထဲမှာ ပင်ပန်းစွာ လှည့်လည်ရချိန် လွန်သွားတဲ့အခါ . . တဲရှင်တွေ မလိုတော့ဘူး။ တောနက်တွေ မရှိတော့ဘူး။ မီးမြွေတွေနဲ့ ရန်သူတွေလည်း မတွေ့ရတော့ဘူး။ နို့နဲ့ပျားရည် စီးရာပြည်ဖြစ်တဲ့ ဂတိတော်ရှိတဲ့ ချမ်းသာထဲကို အနှစ် ၄၀- အကြာမှာ ဝင်စားရတယ်။ ဒီစာဖတ်သူများထဲက တချို့လည်း ဒီနှစ်မှာပဲ ကိုယ်တော်ရဲ့ ချမ်းသာထဲကို ဝင်စားရမယ်။ အဲဒီချမ်းသာဟာ တန်ခိုးကြီးတဲ့ကယ်တင်ရှင်ကို ယုံကြည်ခြင်းအားဖြင့် ယုံကြည်သူတိုင်းရဲ့ ဝမ်းမြောက်ဖွယ် မြော်လင့်ခြင်းပဲ မဟုတ်လား။ ဘုရားသားတွေအတွက် သိုထားတဲ့ ချမ်းသာထဲမှာ သခင်ဘုရားနဲ့ အတူနေခွင့် ဆိုတာ ကျွန်တော်တို့ အစဉ်စောင့်စားနေတဲ့ မင်္ဂလာရှိသော မြော်လင့်ခြင်းပါပဲ။

ဒါပေမယ့် ကြည်နူးစရာပြည်တော်နဲ့ ကျွန်တော်တို့ရဲ့ ကြားမှာ ယော်ဒန်မြစ်က နောက်ဆုံး ကူးဖြတ်စရာ အဆီးအတား တခုအဖြစ် ခြားထားတယ်။ ဒီအတွက် စိုးရိမ်နေသလား။ သေခြင်းထက်မက တခြားမကောင်းမှု ဒုက္ခတွေကိုပါ အောင်မြင်ဖို့ သခင်ဘုရားက ကျွန်တော်တို့ကို မကယ်တင်ခဲ့ဘဲ ဘယ်နေပါ့မလဲ။ ယုံကြည်ခြင်းမရှိတဲ့ အတွေးတွေအားလုံး မောင်းထုတ်ပစ်လိုက်စို့။ ယောဒန်လို မှောင်မိုက်အရိပ်လွှမ်းမိုးတဲ့ ချိုင့်ကို တချိန်က ကူးဖြတ်ခဲ့ကြသလို၊ ဝမ်းမြောက် ရွှင်လန်းနေကြစို့။ ကျွန်တော်တို့ဟာ သခင်ဘုရားနဲ့အတူ နေကြရတော့မှာပါ။ အဲဒီတော့မှ ဒီလောကရဲ့ ပင်ပန်းမှုတွေ၊ ဒုက္ခတွေကို နေခဲ့တော့လို့ ဝမ်းပန်းတသာ နှုတ်ဆက်ကြရတော့မှာပါ။

စာရှုသူအများစုကတော့ သခင်ဘုရားရဲ့ အမှုတော်ဆောင်ဖို့ ဒီကမ္ဘာပေါ်မှာ နေခဲ့ကြရမယ်။ အမှုတော်ဆောင်ရင်း ကောင်းကင်ချမ်းသာရဲ့ အကြိုအရသာကိုတော့ ခံစားနေရတယ်။ “ငါတို့မူကား ယုံကြည်သောသူဖြစ်၍ ဘုရားသခင်၏ ချမ်းသာထဲသို့ ဝင်ကြရ၏။” (ဟေဗြဲ ၄: ၃ ) ဝင်စားရမယ့် ကောင်းကင်ချမ်းသာရဲ့ ပထမအရစ် (first installment ) ကို ရထားပါပြီ။ အမွေရဲ့စားရန် (စရံ) ကတော့ သန့်ရှင်းသော ဝိညာဉ်တော်ဘုရား ကိုယ်တိုင်ပါဘဲ။ ဝိညာဉ်တော်ဘုရားက ဘုန်းအသရေကို ဒီအရပ်မှာကတည်းက စတင်ပေးနေပါပြီ။ ကောင်းကင်နဲ့ဆိုင်တဲ့ ကောင်းကြီး မင်္ဂလာတွေကို အခုပဲ မြည်းစမ်း ခံစားနေကြရပါပြီ။

ဘုန်းတော်ဝင်စားသွားတဲ့ သန့်ရှင်းသူတွေ ကောင်းကင်မှာ လုံခြုံစွာ ထာဝရနေရပြီဖြစ်သလို၊ ကျွန်တော်တို့လည်း ခရစ်တော်၌ လုံခြုံလျှက်ပါပဲ။ သူတို့က ခရစ်တော်နဲ့အတူ ထာဝရ အောင်ပွဲ ခံနေကြသလို၊ ကျွန်တော်တို့လည်း ဒီကမ္ကာပေါ်မှာ သခင်ဘုရားနဲ့အတူ အောင်ပွဲတွေ အစဉ်မပြတ် နွှဲနေလျှက်ပါပဲ။ သူတို့ ကိုယ်တော်ကို ဖူးတွေ့ နေရသလို၊ ကျွန်တော်တို့က ဒီမှာ ကိုယ်တော်နဲ့ တနေ့ပြီးတနေ့ လျှောက်လှမ်းနေတယ်။ ကိုယ်တော် ကတိ တည်ပါတယ်။ (မဿဲ ၂၈:၂၀) စိတ်နှလုံးနဲ့ ရင်းနှီးစွာ မိဿဟာရဖွဲ့ရတာလည်း ကောင်းကင်မှာလိုပါဘဲ။ ကောင်းကင်မှာတော့ ကယ်တင်ရှင်ကို သူတို့ ထာဝရ ချီးမွမ်းနေကြပြီ။ ကျွန်တော်တို့က . . . လျှော့ချီးမွမ်းလို့ ဖြစ်ပါ့မလား။ ချီုးမွမ်းလိုက်ရင်တော့ တောထဲမှာ လှည့်လည်နေရလို့ ပင်ပန်းနွမ်းလျတာတွေ သက်သာသွားပါလိမ့်မယ်။

2
 သခင်ဘုရား၌ ဝမ်းမြောက်ခြင်း

သီချင်း ၁:၁-၇
ဖိလိပ္ပိ ၄:၄-၉
“ ကျွန်မတို့သည် ကိုယ်တော်ကြောင့် ဝမ်းမြောက်ရွှင်လန်းကြမည်။”  ( သီချင်း ၁: ၄ )
ဘုရားသခင်၏သားမှန််သမျှက အာမင် လို့ ဝန်ခံကြပါစေ။ ဆာလံဆရာနှင့်အတူ “လာကြ။ ထာဝရဘုရားအား ရွှင်လန်းစွာသီချင်း ဆိုကြကုန်အံ့။ ငါတို့သည် ကယ်တင်ခြင်းသို့ ရောက်ရာ ကျောက်ကို ကျူးဧကုန်အံ့။” ( ဆာလံ ၉၅:၁ ) ရွေးကောက်ခံရသူ၊ ယုံကြည်သူ ဘုရားသားတွေ အနေနဲ့ ဝမ်းနည်းစိတ်ကို နေရာမပေးဘဲ၊ ဘုရားသခင်ရဲ့ နာမတော်ကို ယုံကြည်စိတ်ချတဲ့ အလံကိုသာ တလူလူလွှင့်ထားကြမယ်။ မျှော်လင့်ခြင်းမရှိတဲ့သူတွေ ကြုံရတဲ့ ဒုက္ခကြောင့် ညည်းသလို မညည်းဘဲ ၊ သက်သာခြင်းအမျိုးမျိုးတို့ရဲ့ ဘုရားသခင်ကိုပဲ ချီးမွမ်းနေမယ်။
ယုံကြည်သူတွေဟာ ဆုကျေးဇူးတွေ ပေးသနားတော်မူတဲ့ သန့်ရှင်းသောဝိညာဉ်တော်ဘုရား ကျိန်းဝပ်ရာ ဗိမာန်တော်တွေ ဖြစ်တယ်။ ကယ်တင်ရှင်ရဲ့ နာမတော်ကို ကောင်းကြီးပေးပြီး၊ ဝတ်ပြုမြဲ ပြုနေမယ်။ သခင်ယေရှုဘုရားဟာ ကျွန်တော်တို့ရဲ့ စိတ်ရွှင်လန်းခြင်းသရဖူကို ဆောင်းတော်မူရမယ်။ ရှေ့တော်မှာ ညဉ်းညူပြီး  ကိုယ်တော်ကို မကဲ့ရဲ့ဘူး။ ဂတိတော်က  … “ ငါသည်လည်း ကပ်ကမ္ဘာ ကုန်သည်တိုင်အောင် သင်တို့နှင့်အတူ အစဉ်မပြတ်ရှိသည်။” ( မဿဲ ၂၈: ၂၀ ) သခင်ဘုရား ရွေးနှုတ်ထားတဲ့သူတွေ ….. “အစဉ်မပြတ် ဝမ်းမြောက်ခြင်း ရှိကြလော့” လို့ အမိန့်တော်ရှိပါတယ်။ ထာဝရ ကျေးဇူးတော် ချီးမွမ်းရာသီချင်းတွေ သီဆိုကျူးဧရမယ့်နေ့ဟာ  မဝေးတော့ဘူး။ ယေရုရှလင်မြို့သစ်မရောက်မှီ ယခုမှစပြီး၊ ချီးမွမ်းကျင့် ကျင့်ထားနှင့်ကြပါစို့။
“ …. ကိုယ်တော်ကြောင့် ဝမ်းမြောက်ရွှင်လန်းကြမည်။”  ဒီလောကမှာ အသက်ရှင်စဉ် သခင်ဘုရား၌ ဝမ်းမြောက်နေတဲ့ စိတ်ကို ထိန်းချုပ်ထားဖို့ လိုသလား။ ကျေးဇူးတရားအောက်ရှိ သားတွေလို “နာဒုပင်၊ ဟင်္နာတော၊ ကြံပင်၊ သစ်ကြပိုးပင်”  တို့ထက် သာတဲ့၊ အဘိုးထိုက်တဲ့ ကိုယ်တော်ကို မရှာဘဲနေသလား။ (သီချင်း ၄: ၁၃၊၁၄ ) မခြားမလပ် ချီးမွမ်းပြီး၊ ဝမ်းမြောက်နေရမယ် မဟုတ်လား။ ထာဝရ စောင့်စားခံစားထိုက်တဲ့ “အလုံးစုံ”  ကို သခင်ယေရှုအားဖြင့် ရတယ် မဟုတ်လား။ ကိုယ်တော်ဟာ ကောင်းမြတ်တဲ့ အရာအလုံးစုံတို့ရဲ့ မူလဖြစ်တယ်။ ကောင်းကြီးမင်္ဂလာ ရှိသမျှတို့ရဲ့ စမ်းရေတွင်းလည်း ဖြစ်တယ်။ ကျွန်တော်တို့ ထာဝရ ခံစားရာ အဖို့လည်း ဖြစ်တော်မူတယ်။ ဒီနှစ် တနှစ်လုံး နေ့တိုင်း ကိုယ်တော့်ကြောင့် ရွှင်လန်းဝမ်းမြောက်ကြပါစို့။
ဆုတောင်း ။          ။  ကိုယ်တော်၌ အစဉ်ဝမ်းမြောက်နေမယ့်အကြောင်း ၊ ကိုယ်တော်ရဲ့ ကြီးမြတ်ခြင်းတွေကို ပြတော်မူပါ ထာဝရဘုရား။

3
 ဆုတောင်းပဌာနာပြုခြင်းအမှု (ကို) အမြဲပြု၍- -
ဆာလံ ၅၅: ၁ - ၁၇ ကောလောသဲ ၄: ၂
“စိတ်ဝိညာဉ်ကား စေတနာရှိငြားသော်လည်း၊ ကိုယ်မူကား အားနည်းသည်။” (မာကု ၁၄:  ၃၈) သမ္မာကျမ်းစာထဲမှာ ဆုတောင်းခြင်းဖို့ အထောက်အကူပြုတဲ့ အဖြစ်အပျက်တွေ၊ ဆုတောင်းဖို့ အားပေးတဲ့ တရားစကားတွေ၊ ဘုရားရဲ့ ဂတိတော်တွေ စသည်ဖြင့် အကျယ်တဝင့် ပါပါတယ်။ ကျမ်းစာအုပ်ကို ဖွင့်ကြည့်ရင် ကမ္ကာ ၄: ၂၆ မှာ “…. ထိုကာလ၌ ထာဝရဘုရား၏ နာမတော်ကို အမှီပြု၍ ကိုးကွယ်စပြုကြလေ၏။”  “Then began men to call upon the name of the Lord.”  လို့ စတင် တွေ့ရတယ်။ ဆုတောင်းသူတွေကိုလည်း သမ္မာကျမ်းစာထဲမှာ နေရာတိုင်း အမှတ်မထင် တွေ့ရတတ်တယ်။ ယဗုတ်ချောင်းနားမှာ နပမ်းလုံးပြီး ဆုတောင်းတဲ့ ယာကုပ် (က ၃၂: ၂၄ -၃၀)၊ ပြုတင်း တံခါးဖွင့်ပြီး တနေ့ သုံးကြိမ် ဆုတောင်းတဲ့ ဒံယေလ (ဒံ ၆: ၁၀ - ၁၁)၊ ထာဝရဘုရားကို စိတ်နှလုံးအကြွင်းမဲ့ အော်ဟစ်တဲ့၊ က္ကုသရေလအမျိုး၌ ချိုမြိန်စွာ သီချင်းဆိုတဲ့ ဒါဝိဒ်။ ဒိပြင် ဧလိယက ကရမေလတောင်ထိပ်မှာ၊ ပေါလုနဲ့ သိလတို့က အချုပ်ခန်းထဲမှာ ဆုတောင်းခဲ့တယ်။

ဂတိတော်များစွာနှင့် အမိန့်တော်များစွာ ဘုရားသခင် ပေးသနားထားတယ်။ ဘာကြောင့်လဲ။ ဆုတောင်းဖို့ လိုတယ်၊ အရေးကြီးတယ်ဆိုတာကို သွန်သင်ချင်လို့ ဖြစ်တယ်။ နှုတ်ကပတ်တော်ထဲမှာ ထင်ရှားစွာ ပြုတော်မူသမျှဟာ ကျွန်တော်တို့ အသက်တာမှာလည်း အထင်အရှားဖြစ်စေလိုတာ သေချာတယ်။ ဆုတောင်းခြင်းအကြောင်း အများကြီး မိန့်တော်မူ ထားတာဟာ ဆုတောင်းဖို့ သိပ်လိုအပ်လို့ ဖြစ်တယ်။ ကောင်းကင်မရောက်မှီအထိ မခြားမလပ် ဆုတောင်းနေဖို့ ဝိညာဉ်ရေးမှာ အထူးလိုအပ်ပါတယ်။ ဆုတောင်းစရာအကြောင်း မရှိဘဲ ဖြစ်နေသလား။ ကိုယ်ဆင်းရဲတာ ကိုယ်မသိဘဲ နေမှာ စိုးရိမ်စရာ ကောင်းပါတယ်။ ဘုရားသခင်ထံမှာ အသနားခံစရာ မရှိဘဲ ဖြစ်နေသလား။ ကိုယ့်သနားစရာအဖြစ်ကို ဘုရားသခင်ပြတော်မူပါစေ။ ဆုမတောင်းတဲ့သူဟာ ခရစ်တော်ကို မရတဲ့သူပါ။ ဆုတောင်းခြင်းဟာ ယုံကြည်သူ ကလေးငယ်ရဲ့ စကား မပီကလာ ပြောတဲ့အသံ ဖြစ်သလို၊ ခရစ်ယာန်စစ်သူရဲရဲ့ ကြွေးကြော်သံလည်း ဖြစ်တယ်။ သခင်ယေရှုထံပါး ဝပ်တွားနေတဲ့ သေလုဆဲ သန့်ရှင်းသူရဲ့ အော်ဟစ် ငိုကြွေးသံလည်း ဖြစ်တယ်။ ဆုတောင်းခြင်းဟာ စစ်မှန်တဲ့ ယုံကြည်သူရဲ့ ခွန်အား၊ ဂုဏ်အသရေနဲ့ သက်သာခြင်း ဖြစ်သလို၊ အသက်ရှူခြင်းနဲ့ စကားဝှက်လည်း ဖြစ်တယ်။ ဘုရားသားမှန်ရင် ဆုတောင်းရင်း ခမည်းတော် မျက်နှာကို နေ့တိုင်း ရှာပါ။ အသက်တာမှာ သန့်ရှင်းခြင်း၊ နှိမ့်ချခြင်း၊ စိတ်အားကြီးခြင်းနဲ့ သည်းခံခြင်း ရှိဖို့ ကျေးဇူးတော် ပလ္လင်ရင်းကို တိုးဝင်၊ ဆုတောင်းလိုက်ပါ။ဆင်ခြင်ရန်။         ။ မခြားမလပ် ဆုတောင်းတဲ့အခါ. . . . မပြတ်မလပ် ကောင်းကြီး ပေးတော်မူပါတယ်။

4
 ခွန်အားရဲ့ လျှို့ဝှက်ချက်
ဟေရှာယ ၄၀: ၂၆- ၄၁: ၄။  ၂ကော ၁၂: ၉-၁၀ ။
“ငါ့ကျေးဇူးသည် သင့်အဖို့ လောက်ပေ၏။”
ကမ္ဘာပေါ်ရှိ အရာဟူသမျှ အသစ်ပြုပြင်ဖို့ လိုအပ်ပါတယ်။ ဖန်ဆင်းထားတဲ့အရာမှန်သမျှ ကိုယ်ပိုင် ရပ်တည် ရှင်သန်နိုင်စွမ်း မရှိဘူး။ အဝတ်အတွက် မပူရ၊ ဒုက္ခကြောင့် အသက်မတိုရတဲ့ သစ်ပင်များပင်လျှင်၊ မြေဆီလွှာမှ အဟာရစုပ်ယူပြီး ကောင်းကင်မိုးရေအားဖြင့် လန်းဆန်းလာရပြန်တယ်။ ကြာရှည် ကြီးထွားပေမယ့်လည်း၊ တနေ့တော့ သက်တမ်း ကုန်ဆုံးကြရတယ်။
လူအသက်ဟာ ဘုရားသခင်ထံက အသစ်ပြုပြင်မခံရဘဲ မတည်နိုင်ဘူး။ တနေ့ ကိုယ်ခန္ဓာ ပျက်စီးမယ်။ မမြင်ရတဲ့ အတွင်း စိတ်ဝိညာဉ်ကတော့ နှုတ်ကပတ်တော် အစာစားခြင်း၊ တရားဒေသနာ ကြားနာခြင်း၊ ဆင်ခြင် အောက်မေ့ခြင်း အားဖြင့်သာ တည်နေနိုင်တယ်။ ဒါက ဘုရားပေးတဲ့ ကျေးဇူးတော်နည်းလမ်းပါပဲ။ ဒီနည်းကို စွန့်ပယ်ထားရင် ဝိညာဉ် ဆင်းရဲမယ်။ အသင်းတော်ဟာ ဝိညာဉ် ပိန်လှီအားပြတ်၊ ချိနဲ့နေမှာလည်း အံ့ဩစရာ မဟုတ်ဘူးပေါ့။
သန့်ရှင်းသူတို့ နိုးထကြစို့။ နှုတ်ကပတ်တော် နေ့စဉ် မလေ့လာ။ နေ့စဉ် ဆုမတောင်းဘဲ အသစ်ပြုပြင်လာမှာ မဟုတ်ဘူး။ အားအင်လည်း ပြည့်မလာနိုင်ဘူး။ ဝိညာဉ် အားနည်းနေတာဟာ ပင်ကိုယ်ဗီဇကြောင့် မဟုတ်ဘူး။ ကိုယ်တိုင် ဂရုမစိုက်လို့ပါ။ သန့်ရှင်းသောဝိညာဉ်တော်ဘုရားရဲ့ အသစ်ပြုပြင်ခြင်းမခံရဘဲ၊ မရဏာနိုင်ငံ တန်ခိုးကို ဖျက်ချိုးနိုင်မှာ မဟုတ်ဘူး။ အဖဘုရား စိတ်နာကျင်တဲ့ အချိန်ကာလကိုလည်း ရင်ဆိုင်ရဲမှာ မဟုတ်ဘူး။
အို၊ သစ်ပင်ငယ်၊ လာမယ့် လွေပွေသရမ်းဒဏ်ကို ကြံ့ကြံ့ခံနိုင်ဖို့ရာ သင့်အမြစ်တွေကို ကျောက်ပေါ်မှာ စွဲမြဲစွာ ကုပ်တွယ်ထားပြီလား။ အိုသင်းဘော
ငယ်၊ အသက်တာရဲ့ ပြင်းထန်တဲ့ မုန်တိုင်းတွေကြားမှာ ဘေးကင်းဖို့ရာ ကျောက်ဆူးကို ကျောက်ပေါ်မှာ စွဲမြဲထားပြီလား။ ခွန်အားဆိုတာ ကိုယ့်ထံက မလာ။ ဗီဇကြောင့်လည်း မဟုတ်ပါ။ ထာဝရဘုရားထံမှသာ ရပါတယ်။ ကိုယ်တော်တပါးတည်းသာ ခွန်အားနဲ့ အသက် ဖြစ်တယ်။ ကိုယ်တော်တပါးတည်းသာ နေ့တိုင်း အသစ်ပြုပြင် ပေးနိုင်ပါတယ်။
 ဆင်ခြင်ရန် ။           ။ “ထာဝရဘုရားကို မြော်လင့်သောသူတို့မူကား အားပြည့်ကြလိမ့်မည်။” -ဟေရှာယ ၄၀း၃၁

5
 အလုံးစုံတို့၌ အလုံးစုံဖြစ်တော်မူသော ယေရှုခရစ်တော်
ဟေရှာယ ၄၉: ၅ - ၁၂  ဧဖက် ၁: ၁၅ - ၁၃
ယုံကြည်သူတိုင်းကို ဘုရားသခင်ပေးတဲ့ အကောင်းဆုံးလက်ဆောင်ဟာ ယေရှုခရစ်တော် ကိုယ်တိုင်ပါပဲ။ သခင် ခရစ်တော်အားဖြင့် ရရှိသမျှကို ရေတွက်လို့ ရနိုင်မလား။  “အကြောင်းမူကား၊ ဘုရားသခင်၏ ဇာတိအဖြစ်တော်၏ ပြည့်စုံခြင်းအပေါင်းသည် ခရစ်တော်၌ ကိုယ်ထင်ရှား၍ ကျိန်းဝပ်တော်မူ၏။” ( ကော ၂: ၉) ခဏဆင်ခြင်ကြည့်ပါ။ ယုံကြည်သူတွေမှာ ခရစ်တော်အားဖြင့် ရထားတဲ့ စစ်မကုန်၊ ပြောလို့မမှီတဲ့ ကောင်းကြီးမင်္ဂလာများစွာ ရှိပါတယ်။ ဧမာနွေလဖြစ်တော်မူသော ခရစ်တော်၌ ရှိသမျှကို သင် ပိုင်ဆိုင်တယ်။ ကောင်းမှုကုသိုလ်ကြောင့် မဟုတ်ဘူး။ ခရစ်တော်ပိုင်သမျှ အရာအလုံးစုံတို့ကို ထာဝရပိုင်ဆိုင်ရဖို့ ဘုရားသခင် သနားလို့၊ ကျေးဇူးပြုတော်မူလို့ ဖြစ်တယ်။
“အလုံးစုံ” ဆိုတာကို ရေတွက်ကြည့်ကြပါစို့။ “တန်ခိုးတော်” ကို ဆင်ခြင်ကြည့်ပါ။ “ကောင်းကင်ဘုံ၌၎င်း၊ မြေကြီးပေါ်၌၎င်း၊ စီရင်ပိုင်သော အခွင့်တန်ခိုးရှိသမျှတို့ကို ငါခံရပြီ။”  (မဿဲ ၂၈: ၁၈) အဲဒီတန်ခိုးဟာ သင့်အတွက် ဖြစ်ပါတယ်။ သင့်ကို ခွန်အားနဲ့ ပြည့်စုံစေပြီး၊ အခက်အခဲတွေကို အောင်မြင် ကျော်လွှားစေမယ်။ စုံစမ်းနှောက်ယှက်ခြင်း တွေကို အောင်မြင်စေပြီး၊ ဘုရားသခင်နဲ့အတူ တည်ကြည်စွာ လျှောက်လှမ်းစေကာ အိမ်တော်သို့တိုင် ပို့ဆောင်မယ့် တန်ခိုးတော် ဖြစ်တယ်။ မေတ္တာတော်ကို ဆင်ခြင်ကြည့်ပါ။ အနန္တ မေတ္တာတော်ကို အသင့်ပြင်ထားတဲ့ ကျွန်တော်တို့ စိတ်နှလုံးထဲသို့ သွန်းလောင်းတော်မူတဲ့အခါ၊ သင်က “မေတ္တာတော်ဟာ ငါ့အတွက်ပါ” ဟု ပြောမှာပါ။ အဲဒီနောက် - သင့်ထံမှ အခြားသူတွေထံ ကိုယ်တော်မေတ္တာ စီးထွက်နေပါလိမ့်မယ်။
တရားတော်မူခြင်းကိုလည်း ဆင်ခြင်ကြည့်ပါဦး။ ဒီလောက် မြင့်မြတ်လှတဲ့ ဂုဏ်တော်ဟာ သင့်အတွက် ဖြစ်ပါ့မလား။ မဖြစ်နိုင်ဘူးထင်ရပေမယ့် ကျေးဇူးတော်ကြောင့် သင့်အတွက် ဖြစ်ပါတယ်။ တရားတော်မူတဲ့ အဘဘုရားဟာ သင့်ကို လုံခြုံစိတ်ချစေမယ့် ဂတိတော်ရှိသမျှကို တည်စေတော်မူမယ်။  “စုံလင်သောလူသား” အဖြစ် သခင်ယေရှုမှာ ရှိခဲ့သမျှဟာ သင့်အတွက် ဖြစ်တယ်။ ခမည်းတော် လက်ခံတော်မူတဲ့အတွက် သင့်ကိုယ်စားလှယ်အဖြစ် ရှေ့တော်မှာ ရပ်ခဲ့တယ်။ ချစ်သောစာရှုသူ၊ ခရစ်တော်ကို ဘုရားသခင် လက်ခံခြင်းဟာ သင့်ကို လက်ခံခြင်းပဲ ဖြစ်တယ်။ ချစ်တော်မူသော သားတော်အပေါ်၌ တည်နေတဲ့ ခမည်းတော်ရဲ့ မေတ္တာဟာ သင့်အပေါ်မှာလည်း ယခုပင် တည်နေပါတယ်။ ခရစ်တော်ပြုခဲ့သမျှဟာ သင့်အတွက် ဖြစ်သလို၊ ကျွန်တော့်အတွက်လည်း ဖြစ်ပါတယ်။ ကိုယ်တော်ရဲ့ စုံလင်တဲ့ ဖြောင့်မတ်ခြင်းဟာ “ယုံကြည်သောအားဖြင့် ကျေးဇူးတော်ကြောင့်” သင့်အပေါ်မှာ တည်လာပါတယ်။ ကိုယ်တော်ဟာ အလုံးစုံတို့၌ ကျွန်တော်တို့ရဲ့ အလုံးစုံဖြစ်တော်မူပါတယ်။ (အရာရာမှာ ကိုယ်တော်ကြောင့် ပြည့်စုံသွားပါတယ်။)

6
 ထာဝရဘုရား ကြွတော်မူရာလမ်းကို ပြင်ကြလော့ . .
 “ဘုန်းကြီးသောရှင်ဘုရင် ဝင်တော်မူမည်။”
(ဆာလံ ၂၄:၉  )   ဟေရှာယ  ၄: ၁-၁၁။       လု  ၃: ၃-၁၈
ထာဝရဘုရားအတွက် လမ်းခရီးတော်ပြင်ဆင်ဖို့ နှစ်ခြင်းဆရာယောဟန်က တောမှာ ဟစ်ကြော်ခဲ့တယ်။ ဒီနေ့ခေတ် လူတွေရဲ့စိတ်နှလုံးတွေကို ဘယ်လိုပြင်ဆင်မလဲ။ ကျွန်တော့စိတ်နှလုံး ခြောက်သွေ့လွင်ပြင်ကို ဥပမာအနေနဲ့ ပြင်ဆင်ပြပါမယ်။
 ( ၁) ချိုင့်ဝှမ်းရာရှိသမျှကို ဖို့ရမယ်။
ဘုရားသခင်နဲ့ပတ်သက်လို့ သိမ်ငယ်၊ နိမ့်ကျနေတဲ့ အတွေးတွေကို ဖျက်စီးပစ်ရမယ်။ သံသယနဲ့ စိတ်ပျက် အားလျော့တာတွေကို ဖယ်ရှားပစ်ရမယ်။ အတ္တနှင့် ဇာတိပကတိ အလိုဆန္ဒတွေကိုလည်း စွန့်လွှတ်ရမယ်။ ဒီလို မှောင်မိုက် နက်ရှိုင်းတဲ့ ချိုင့်ဝှမ်းတွေတလျှောက်မှာ ထာဝရဘုရားအတွက် ပြင်ဆင်ထားတဲ့ တင့်တယ်တဲ့ လမ်းကလေး ပေါ်လာရမယ်။
 ( ၂ ) တောင်ကြီးတောင်ငယ်ရှိသမျှကို ဖြိုရမယ်။
ကိုယ်ကိုကိုယ် အထင်ကြီး၊ ကိုယ်ဖြောင့်မတ်တာကို ဝါကြွားနေတာတွေ နှိမ့်ချလိုက်ပြီး၊ ရှင်ဘုရင် ကြွရာ မင်းလမ်းအဖြစ် ညီညာစေရမယ်။ ကြီးမြတ်တော်မူတဲ့ ရှင်ဘုရင်ဟာ မာနထောင်လွှားသူ၊ ဘဝင်မြင့်နေသူတွေကို သနားမှာ မဟုတ်ဘူး။ သခင်ဘုရား ချီးကျူးမှာက စိတ်နှိမ့်ချသူနဲ့ စိတ်နူးညံ့သိမ်မွေ့သူတွေသာ ဖြစ်တယ်။ စိတ်မသာ ညဉ်းတွား လာတတ်ဖို့ ကိုယ်တော် ညှိညွှတ်ပေးပါလိမ့်မယ်။ ဒါပေမယ့် စိတ်နေမြင့်သူတွေကိုတော့ ထာဝရဘုရား ရွံရှာတော်မူပါတယ်။
 ( ၃ ) ကောက်တဲ့လမ်းတွေ ဖြောင့်ရမယ်။
လှိုင်းခတ်လို့ လှုပ်ရှားသလို ကွေ့ကောက်တတ်တဲ့စိတ်ဟာ ဘုရားသခင်အတွက် ရှင်းလင်း ဖြောင့်တန်း နေရမယ်။ တကယ် သန့်ရှင်းတဲ့ အသက်တာဖြစ်ပါစေ။ စိတ်နှစ်ခွရှိသူဟာ သမ္မာတရားရဲ့ ဘုရားသခင်ကို တကယ် မသိကျွမ်းပါဘူး။ သတိပြုပါ။ ဝိညာဉ်အရာအားလုံးကို သိမြင်တော်မူတဲ့ ဘုရားသခင်ရှေ့မှောက်မှာလို အရာရာမှာ ရိုးသား မှန်ကန်ဖို့ ကြိုးစားပါ။
 ( ၄ ) ကြမ်းတမ်းတဲ့လမ်းတွေလည်း သုတ်သင်ပြင်ဆင်ရမယ်။
အပြင်ဖက်က ခလုပ်ခသင်းတွေကို ရှင်းလင်းပစ်ရမယ်။ ပုန်ကန်ခြင်း ဆူးပင်၊ တောရိုင်းပင်တွေကို ဆွဲနှုတ်ပစ်ရမယ်။ သခင်ဘုရားဟာ သန့်ရှင်းသူတို့နဲ့ ကြွလာတဲ့အခါ ကျွန်တော်တို့ကို ချီးမွမ်းမယ်။ ရွေးနှုတ်ခြင်း ကျေးဇူးတော်ကြောင့် အသင့်ဖြစ်နေတဲ့ သင့်စိတ်နှလုံးထဲမှ လမ်းကလေးကို ကိုယ်တော် တွေ့မြင်ပါစေ။ သင့်စိတ်ဝိညာဉ် ထာဝရ ကောင်းကြီးခံစားဖို့ အောင်မြင်ခြင်း ဘုန်းအသရေနှင့်တကွ ကိုယ်တော် ဝင်ရောက်လာပါစေသော။
 မေးခွန်း ။            ။ သင့်စိတ်နှလုံး အသင့်ဖြစ်နေပါပြီလား။
 ဆင်ခြင်ရန်။         ။  ရှင်ဘုရင်ကြွလာလုနီးပြီ။

7
 ကျေးဇူးတော်၌၎င်း၊ သိကျွမ်းခြင်း၌၎င်း၊ ကြီးပွားကြလော့ - -
ဆာလံ  ၄၂။   ၂ပေ ၃: ၁၀ - ၁၈

“ကျေးဇူးတော်၌ ကြီးပွားကြလော့။” ကျေးဇူးတမျိုးတည်း မဟုတ်ဘူး။ ရှိသမျှ ကျေးဇူးတော်တွေမှာ ကြီးပွားရမယ်။ အရေးကြီးဆုံး ကျေးဇူးတော်ဖြစ်တဲ့ “ယုံကြည်ခြင်း” မှာ ကြီးပွားပါ။ ဘုရားသခင်ရဲ့ ဂတိတော်တွေကို ယုံကြည်သထက် ပိုမို ယုံကြည်စွဲလန်းပါ။ ယုံကြည်ခြင်းကို ရိုးရိုးသားသား တည်တည်ကြည်ကြည် တိုးပွားပါစေ။
ချစ်ခြင်းမေတ္တာမှာလည်း ကြီးပွားပါ။ မေတ္တာစိတ် တိုးပွားရင်း၊ အားကြီးရင်း စိတ်ပါကိုယ်ရောက် ချစ်ရင်း၊ ပြောသမျှ ဆိုသမျှ၊ တွေးသမျှမှာ မေတ္တာနဲ့ အလှဆင်ဖို့ ဆုတောင်းပါ။ ဒီလိုပဲ၊ နှိမ့်ချခြင်းမှာလည်း တိုးပွားပါ။ အနိမ့်ဆုံး နေရာကိုသာ ရှာပါ။ ကိုယ် ဘာမှ မဟုတ်ဖူးလို့၊ တိုး၊ တိုး နားလည်လာပါစေ။ နှိမ့်ချခြင်းနဲ့ အောက်ဖက် ကြီးပွားသလို၊ ဆုတောင်းခြင်း၊ မိတ်သဟာရဖွဲ့ခြင်းနဲ့ ဘုရားသခင်ထံပါး ချဉ်းကပ်ခြင်းရင်း အထက်ကိုလည်း ကြီးပွားရပါမယ်။
ဝိညာဉ် ကြီးထွားတာကို ဒီလောက်နဲ့ ရပ်မထားပါနဲ့။ ကယ်တင်ရှင် သခင်ယေရှုခရစ်ကို သိကျွမ်းခြင်းမှာလည်း ကြီးပွားရဦးမယ်။ ကယ်တင်ရှင်ကို သိကျွမ်းခြင်း မကြီးပွားတဲ့သူဟာ ကောင်းကြီးမင်္ဂလာများစွာ ဆုံးရှုံးသူဖြစ်ပါတယ်။ ကိုယ်တော်ကို သိကျွမ်းခြင်းမှာ တိုးပွားသူဟာ စစ်မှန်တဲ့ ပျော်ရွှင်မှုတွေ တိုးလာသူလည်း ဖြစ်တယ်။ ခရစ်တော်ကို သိကျွမ်းဖို့ စိတ်မစွဲလန်းသူဟာ ကိုယ်ကိုကိုယ် ဆင်းရဲစေတဲ့သူပဲ ဖြစ်တယ်။ တမန်တော် ပေါလုက . . “သခင်ယေရှုခရစ်ကို သိသော ပညာသည် အဘယ်မျှလောက်မြတ်သည်ကို ထောက်၍၊ ခပ်သိမ်းသောအရာတို့ကို ရှုံးစေသောအရာကဲ့သို့ ငါထင်မှတ်၏။” လို့ ဆိုခဲ့ပါတယ်။ ( ဖိလိပ္ပိ ၃: ၈ - ၁၀)
ကဲ၊ သခင်ယေရှုကို သင် ဘယ်လောက် ချစ်သလဲ။ ကိုယ်တော်ကို တကယ်ချစ်ရင် ရေစီးသောချောင်းကို တောင့်တတဲ့ သမင်ဒရယ်လို ဖြစ်လာလိမ့်မယ်။ ဝိညာဉ် အာသာပြေစေတဲ့ သိကျွမ်းခြင်းကို တငုံမျှ သောက်ကြည့်ရုံနဲ့ ပို ဆာငတ် တောင့်တလာလိမ့်မယ်။ ကိုယ်တော်မေတ္တာကို နက်နက်နဲနဲ တမ်းတလာမယ်။ စစ်မှန်တဲ့ မေတ္တာက . . . . . . .
“ကိုယ်တော်နှင့်နီးစေပါ၊ ကျွန်ုပ်ဘုရား” လို့ အစဉ် အော်ဟစ်နေပါလိမ့်မယ်။ ကိုယ်တော်ကို သောက်လေလေ ထပ်သောက်ချင်လေလေ ဖြစ်လာမယ်။ ကိုယ်တော်အနားမှာ ရှိနေတာကို သိရတာဟာ ကောင်းကင်ဘုံပါပဲ။ သင် ကြီးပွား နေသလား။ ရွေ့လျော့နေသလား။ ကားတိုင်နဲ့ အစဉ်နီးဖို့ရာ၊ ကိုယ်တော်မစဖို့ ဆုတောင်းရင်း ကိုယ်တော်ရဲ့ အဘိုးထိုက်လှတဲ့  မေတ္တာတော်ဟာ သင့်စိတ်နှလုံးထဲမှာ စိမ့်ဝင် ပျံ့နှံ့ပါစေသော။ အဲဒီအခါ သင်ကြီးပွားဖို့ ကိုယ်တော် ဘယ်လို မ,စ မယ်ဆိုတာ စောင့်ကြည့်လိုက်ပါလေ။
ဆုတောင်း။          ။ အသက်သခင် ဘုရားရှင်၊ အသက်တာ ကြီးပွားဖို့ သန့်ရှင်းသောဝိညာဉ်တော်အားဖြင့် တန်ခိုးနဲ့ ပြည့်စေတော်မူပါ။

8
 အိုထာဝရဘုရား၊ ကိုယ်တော်သည်အကြွင်းမဲ့ သိတော်မူ၏။ 
“အိုဘုရားသခင်၊ အကျွန်ုပ်ကို စစ်ကြော၍၊ အကျွနု်ပ်၏နှလုံးကို သိမှတ်တော်မူပါ။” ဆာလံ  ၁၃၉: ၂၃ ။
ကမ္ဘာ ၄၂: ၁-၈။  ဆာလံ  ၁၃၉ ။
ကယ်တင်ရှင်ကို သိကျွမ််ဖို့ ကြိုးစားတဲ့အခါ ကိုယ်တော်ကို လုံးဝမသိရသေးခင်ကတည်းက  ကိုယ်တော်က ကျွန်တော်တို့ကို သိနေနှင့်ပြီဆိုတာသတိပြုရပါမယ်။
“မစုံလင်သေးသော အကျွနု်ပ်၏အလုံးအထွေးကိုလည်း ကိုယ်တော်သည် ကြည့်ရှု့၍မြင်တော်မူပြီ။ ထိုအရာတို့ကိုပြုပြင်၍ တစ်စုံတစ်ခုမျှ မရှိမှီကာလတွင် ကိုယ်တော်၏စာရင်း၌ အကုန်အစဉ်မှတ်သားလျှက်ရှိပါ၏။” (ဆာလံ  ၁၃၉: ၁၆ )
ဒီလောကမှာ ကျွန်တော်တို့နေရာမရမှီကတည်းက ကိုယ်တော့် စိတ်နှလုံးတော်ထဲမှာ နေရာရခဲ့ပြီ။ ကိုယ်တော်နဲ့ ရန်သူဖြစ်နေတဲ့အချိန်မှာပဲ ကျွန်တော်တို့ရဲ့သနားစရာ ရူးသွပ်မိုက်မဲမှုတွေကို ကိုယ်တော် မြင်တော်မူခဲ့ပြီ။ ဒါဟာ မ,စဖို့ ကိုယ်တော်ကြွမလာမှီက မြော်လင့်ချက်မဲ့ ပျောက်ဆုံးနေတဲ့ ကျွန်တော်တို့ ဘဝအခြေအနေပါ။
ကိုယ်တော်ကို မရှာတတ်ခင်ကတည်းက ကျွန်တော်တို့ရဲ့ လိုအပ်မှုကို ကိုယ်တော် သိနေခဲ့တာကိုက နက်နဲတဲ့ ဘုရားမေတ္တာပေါ်လွင်လှပါတယ်။ ကိုယ်တော်ဟာ ကျွန်တော်တို့အတွက် “ကောင်းကင်ကလာတဲ့ ယောသပ်”အဖြစ် အမြဲခွင့်လွှတ်ပြီး၊ကျေးဇူးပြုဖို့ ကြွလာတော်မူခဲ့တယ်။ ကျွန်တော်တို့ကို “ညီတော်” များအဖြစ်- ချစ်ခဲ့၊ ကြင်နာယုယခဲ့တယ်။ ယာကုပ်သားတွေလိုပဲ ကျွန်တော်တို့က “ယောသပ်”ကို မေတ္တာမရှိကြ။ မနာလိုစိတ်နဲ့ရန်ရှာကြတယ်။ ကိုယ်တော်ကတော့ မကုန်ဆုံးနိုင်တဲ့ မေတ္တာကိုခံစားရသူတွေအဖြစ်သာ မြင်တော်မူတယ်။ စားပွဲနားမှာရှိတဲ့ သားတွေကို ကိုယ်တော်သိသလို၊ ဝက်ကျောင်းနေရတဲ့ ပျောက်သောသားကိုလည်း ကိုယ်တော်သိခဲ့တယ်။“သခင်ဘုရားသည် မိမိလူတို့ကို သိကျွမ်းတော်မူ၏” ဆိုတဲ့ ကျမ်းစကား လိုပါပဲ။ “အဘသည်သားတို့ကို သနားစုံမက်သည်နည်းတူ …”ကိုယ်တော်က ကျွန်တော်တို့ကို စုံမက်တော်မူပါတယ်။ ဆာလံ ၁၀၃: ၁၃
ဘုရားသခင်ကို ဆန့်ကျင်၊ ကျူးလွန်ခဲ့တဲ့ မရေမတွက်နိုင်အောင် ကြီးမားများပြားလှတဲ့ အပြစ်ဒုစရိုက်တွေကို နားလည်မိလာတဲ့အခါ ဘုရားသခင်ရဲ့ရွေးနှုတ်တော်မူခြင်းကျေးဇူးကို အံ့ဩမိတယ်။ ဆန့်ကျင်ခဲ့တုန်းက ကိုယ်တော်ကို စိတ်နှလုံးထဲ ဝင်ခွင့်မပေး။ ကျေးဇူးစကားကိုလည်း မကိုးစားခဲ့။ မေတ္တာနဲ့ ခေါ်တာကို ပစ်ပယ်ကာပုန်ကန်နေခဲ့တယ်။ ကိုယ်တော်ကတော့ ဘယ်တော့မှ မစွန့်ပစ်ဘဲ၊ အစဉ်သည်းခံလျှက်၊ နူးညံ့သိမ်မွေ့စွာ ကြွလာတော်မူခဲ့တယ်။ စိတ်ပျက်စရာ၊ ဆိုးယုတ်တဲ့ အခြေအနေက ကယ်တင်ကာ ဘုရားမိသားစုထဲမှာ သားအဖြစ် ပါဝင်ခွင့်ပေးတဲ့ ဘုရားသခင်ကို ကျေးဇူးတင်စရာပါ။ ကိုယ်တော်ကို သိကျွမ်းဖို့ ရှာဖွေနေတုန်းမှာပဲ၊ ကိုယ်တော်က အားလုံးကို သိထားပြီးသားဖြစ်တယ်။ ကိုယ်တော်သာမသိခဲ့လျှင် ကျွန်တော်တို့ ဒီနေ့ ဘယ်နေရာ ရောက်နေမလဲ။ ကျေးဇူးတော်ဟာ ထပ်ခါထပ်ခါ ချီးမွမ်းစရာကောင်းပါတယ်။ ကိုယ်တော်ကြွလာတဲ့နေ့မှာ ကျွန်တော်တို့ နာမည်တွေကို ကိုယ်တော် ဝန်ခံတော်မူလိမ့်မယ်။ ကျေးဇူးတော်ချီးမွမ်းကြစို့။ ဘုရားသခင်က ကျွန်တော်တို့အကြောင်း အကုန်လုံး သိနေတယ်။ ဘုရားသခင် ဘယ်တော့မှ မမေ့တတ်ဘူး။
ဆင်ခြင်ရန် ။ ။  ယခု ဘုရားသခင်ကို မသိလိုတဲ့သူကို ကိုယ်တော်ကြွလာတဲ့အခါ  “သင်တို့ကို ငါအလျဉ်းမသိ” လို့ မိန့်တော်မူပါလိမ့်မယ်။

9
 အလင်းသည် မှောင်မိုက်နှင့် အဘယ်သို့ဆက်ဆံ နိုင်သနည်း။
          ကမ္ဘာ ၁: ၁ - ၅   ၂ ကော ၆: ၁၄ - ၁၈။
ကမ္ဘာပေါ်မှာ အလင်းမရှိရင် အသက်မရှင်နိုင်ပါ။ ရှောလမုန်မင်းကြီးက “အကယ်စင်စစ် အလင်းသည် ချို၏၊ နေရောင်ခြည်ကိုမြင်၍ ပျော်ပါးစရာရှိ၏။” လို့ ဆိုပါတယ်။ ( ဒေ ၁၁: ရ) ဧဝံဂေလိ အလင်းရောင်ဆိုရင် ပိုပြီးတော့ အဖိုးထိုက်မှာပါ။ အဲဒီတရားအလင်းသာလျှင် စိတ်ဝိညာဉ် လိုအပ်သမျှကို ဖြည့်စွမ်းပေးပြီး၊ထာဝရနဲ့ဆိုင်တဲ့အရာတွေကို ဖွင့်ပြပေးနိုင်တယ်။ သန့်ရှင်းသော ဝိညာဉ်တော်အားဖြင့် ဝိညာဉ်အလင်းပေးတဲ့အခါ သားတော်မြတ်ယေရှုခရစ်၌ ဘုရားသခင်ရဲ့ ဘုန်းတော်ကို တွေ့မြင်လာရတယ်။ မြော်လင့်ချက်မဲ့၊ ကယ်သူမဲ့ကာ ပျောက်လွင့်နေပြီး၊ အပြစ်ကြောင့် ပျက်စီးယိုယွင်းတယ်လို့၊  ကိုယ်ကိုကိုယ် မြင်တတ်လာတယ်။ အဲဒီအခါ ဘုရားသခင် ဘိသိက် ပေးထားတဲ့သူ၊ “ကျေးဇူးတော်နှင့်၎င်း၊ သစ္စာတော်နှင့်၎င်း၊ ပြည့်စုံသောသူ”  (ယော ၁:  ၁၄) မြော်ကြည့်စရာအသက်အဖြစ် ယဇ်ပူဇော်ပေးခဲ့သူ (ယော ၃: ၁၄ - ၁၆) ကယ်တင်ရှင်ကို တွေ့မြင်လာတယ်။ ဒီလောကရဲ့ အလင်းဖြစ်တဲ့ ကယ်တင်ရှင် သခင်ယေရှုထံ ဧဝံဂေလိအလင်းဖြင့် ဆွဲယူတော်မူတဲ့ ဘုရားသခင်ရဲ့ ကျေးဇူးတော်ကို ချီးမွမ်းကြပါစေသော။
အလင်းနဲ့အတူ ကွဲပြားမှုပါလာလေ့ရှိတယ်။ အလင်းဟာ အမှောင်နဲ့ ဆက်ဆံလို့ မရ။ ဖန်ဆင်းရှင်ဘုရားက အစအဦးကတည်းက ခွဲခြားထားပြီဖြစ်လို့ မရောလိုက်ပါနဲ့။ အလင်းရဲ့သားဟာ မှောင်မိုက်သားနဲ့ မိတ်မဖွဲ့ရ၊ သူတို့အကျင့်၊ ခံယူချက်၊ မှားယွင်းမှုတွေကို လိုက်မကျင့်ရ။ နေ့ရဲ့သားဆိုတာ သမ္မာသတိရှိတယ်။ ရိုးသားစွာ အစဉ်အမြဲ စောင့်နေမယ်။ သခင်ဘုရားရဲ့ အမှုတော်ကို အားယူပြီး၊ သစ္စာရှိစွာလုပ်ဆောင်ရမယ်။ အများ လက်မခံနိုင်ရင် နေပါစေ။ ကျွန်တော်တို့ကတော့ မှောင်မိုက်အကျင့်နဲ့ ဆက်ဆံမှာ မဟုတ်ပါ။
သခင်ယေရှုရဲ့ စစ်မှန်တဲ့ အသင်းတော်ဖြစ်ရင်- မှားယွင်းတဲ့ အယူတွေ၊ ခံယူချက်တွေ၊ အဲဒီအမှားတွေကို ဟောပြောသွန်သင်သူ (သို့) အလျှော့အတင်းပြုလုပ်နေတဲ့ ခရစ်ယာန်တွေ၊ အသင်းတော်တွေနဲ့ လွတ်လွတ်ကင်းကင်း သီးခြားနေလေ့ရှိတယ်။ ကြားနားခြင်း၊ သွန်သင်ခြင်း၊ မိဿဟာယဖွဲ့ခြင်း၊ အလုပ်လုပ်ခြင်းနဲ့ စီရင်ဆုံးဖြတ်ရာမှာ၊ သမ္မာတရားနဲ့ မိစ္ဆာအယူ၊ အလင်းနဲ့ အမှောင်ကို စေ့စေ့ပိုင်းခြားလေ့လာရမယ်။ ကမ္ဘာတည်စကတည်းက ဘုရားသခင် စည်းကမ်းထားတယ် မဟုတ်လား။ ကပ်ကာလအဆုံးဖြစ်တဲ့ ယခုအချိန်မှာ သခင်ဘုရားရဲ့ အစေခံတွေ လေးလေးစားစား လိုက်နာသင့်တယ် မဟုတ်လား။
ဆင်ခြင်ရန်။     ။ သစ္စာရှိတဲ့ စစ်မှန်တဲ့ ယုံကြည်သူများဟာ “ဂိုဏ်းပေါင်းစုံလှုပ်ရှားမှု” Ecumenical Movement မှောင်မိုက်ကို ဘယ်တော့မှ နှစ်သက်လက်ခံဟန်ပြမှာ မဟုတ်ပါ။

10
 သင်၏အလင်းကို မြင်တော်မူသော ဘုရားသခင်
                            ကမ္ဘာ  ၁: ၁-၅ ။ ဧဖက် ၅: ၁-၁၄
                    ထာဝရဘုရားမှာ အလင်းကိုကြည့်ဖို့ ထူးခြားတဲ့ အံ့ဩဖွယ်မျက်စိရှိတော်မူတယ်။ ဖန်ဆင်းစမှာပဲ “ထိုအလင်းကောင်းသည်ကို ဘုရားသခင် . . . . ” မြင်တော်မူတယ်။
အသက်တာ ပြောင်းလဲချိန်မှာ ကိုယ်တော်ရဲ့အလင်းကို ပေးတယ်။ ပြီးတော့ အဲဒီအလင်းကို စိတ်ဝင်တစား ကြည့်တော်မူတယ်။ ကိုယ်တိုင်ဖန်ဆင်းတဲ့ လက်ရာတော်ဖြစ်လို့သာ မဟုတ်ဘူး။ ဘုရားသခင်ဟာ အလင်းဖြစ်လို့၊ ကိုယ်တော့်လို ဖြစ်လို့၊ အဲဒီအလင်းကို နှစ်သက်တော်မူတာပါ။ ပြုစရှိတဲ့ အဲဒီကျေးဇူးတော်ကို ဘုရားသခင်က မျက်စိတော်နဲ့ ကြင်နာစွာ ကြည့်နေတော်မူကြောင်း သိရတာ မင်္ဂလာရှိပါတယ်။ ကျွန်တော်တို့ရဲ့ မြေအိုးများထဲမှာ ထည့်ထားတဲ့ ဘဏ္ဏာကို ကိုယ်တော် ဘယ်တော့မှ မျက်ချေပြတ်ခံတော်မမူပါဘူး။ (၂ကော ၄: ရ)
ကျွန်တော်တို့က အလင်းကို တခါတရံ မမြင်နိုင်ဘူး။ ဒါပေမယ့် ဘုရားသခင်ကတော့ အစဉ်အမြဲ မြင်တော်မူတယ်။ အမြင်အားဖြင့်လည်း ကျွန်တော်တို့ထက် ကောင်းမြတ်လှတယ်။ ဘုရားသားဖြစ်ပြီလို့ ကိုယ်တိုင် သိရခြင်းဟာ စိတ်သက်သာစရာ ကောင်းတယ်။။ ဒါပေမယ့် ကျွန်တော်တို့ ကယ်တင်ခြင်းရပြီလို့ ဘုရားသခင် သိနေခြင်းက ပိုပြီး အရေးကြီးပါတယ်။ “သခင်ဘုရားသည် မိမိလူတို့ကို သိကျွမ်းတော်မူ၏။” (၂တိ ၂: ၁၉) ချစ်သောယုံကြည်သူ၊ ကိုယ့်မိုက်ပြစ်တွေအတွက် ဝမ်းနည်း၊ ဗီဇ အပြစ်တချို့ကြောင့် ညဉ်းတွားကာ သက်ပြင်း ချကောင်းချနေပါလိမ့်မယ်။ ဒါပေမယ့် သင့်စိတ်နှလုံးထဲမှာ သွင်းထားတဲ့ အလင်းကို ထာဝရဘုရား မြင်တော်မူတယ်။ အဲဒီအလင်းကို ကြည့်နေတဲ့ ကိုယ်တော်ရဲ့ ကျေးဇူးတော်မျက်လုံးတွေကို သင့်စိတ်ဝိညာဉ်မှာ ဖုံးလွှမ်းနေတဲ့ တိမ်ညိုတိမ်ရိပ်တွေက မကွယ်စေနိုင်ဘူး။ ခံစားချက်တွေထက် စိတ်နှလုံးနဲ့ သခင်ယေရှုကိုသာ မြော်ကြည့်နေကြစို့။
သင်ဟာ စိတ်မသာညဉ်းတွားခြင်းထဲမှာ နစ်မြုပ်ပြီး၊ စိတ်ပျက်နေကောင်း နေလိမ့်မယ်။ ဒါပေမယ့် စိတ်ဝိညာဉ်က ထာဝရဘုရားကို တမ်းတရင်း၊ ကိုယ်တော် ဆောင်ရွက်ပြီးစီးခဲ့တဲ့ အမှုတော်အပေါ်မှာ နားခိုမယ်ဆိုရင် ဘုရားသခင်က အလင်းကို မြင်တော်မူတယ်။ မြင်ရုံမက သင့်အထဲမှာ မြဲမြံစေတော်မူမယ်။ ဒါဟာ ကိုယ်ကိုကိုယ် စိုးရိမ်တကြီး၊ ကာကွယ် စောင့်ထိန်းနေရသူတွေ၊ အဲဒီလို ကာကွယ်ဖို့လည်း မတတ်နိုင်တဲ့အဖြစ်ကို တွေ့ကြုံခံစား နေသူတွေအတွက် အဖိုးထိုက်လှတဲ့ ဆင်ခြင်စရာတခုပါ။ ဒီလို ခံစားနေရချိန်မှာ ကယ်တင်ရှင်ကို မြော်ကြည့်ပါ။ ကျေးဇူးတော်ကြောင့် မြဲမြံတဲ့ အလင်းဟာ တနေ့မှာ တောက်ပလွန်းတဲ့ နေ့လည်ခင်းလိုဖြစ်ပြီး၊ ဘုန်းအသရေနဲ့ ကြွယ်ဝလာမယ်။ သင့်အထဲမှာ တည်တဲ့ ကိုယ်တော်ရဲ့ အလင်းဟာ ထာဝရနေ့ရက်ကာလရဲ့ ရောင်နီဦးလည်းဖြစ်တယ်။ “သင်တို့တွင် ကောင်းသောအမှုကို ပြုစ ပြုတော်မူသောသူသည် ယေရှုခရစ်၏ နေ့ရက်တိုင်အောင် ပြီးစီးလျှက် ပြုတော်မူမည်။” (ဖိလိပ္ပိ ၁: ၆)
ဆင်ခြင်ရန် ။                 ။ သခင်ဘုရား မိန့်တော်မူတာက . . .  “ကောင်းကင်ဘုံ၌ရှိတော်မူသော သင်တို့အဘ၏ ဂုဏ်တော်ကို ချီးမွမ်းစေခြင်းငှါ၊ သူတပါးရှေ့၌ သင်တို့အလင်းကို လင်းစေကြလော့။” - မဿဲ ၅: ၁၆။

11
သတိနှင့် ကြည့်ရှုတော်မူသောကြောင့်. . .
“အရာရာ၌ ကျေးဇူးတော်ကို ချီးမွမ်းခြင်းနှင့်တကွ၊ ဆုတောင်းပဌာနာပြုသောအားဖြင့် . . .။” (ဖိလိပ္ပိ ၄: ၆) ဆာလံ ၂၇။
“ဘုရားသခင် ငါ့ကို သတိနဲ့ စောင့်ကြည့်နေတယ်” လို့ ပြောလိုက်တာဟာ ဝမ်းနည်းနေတာတွေကို ပျောက်လွင့်စေတဲ့ ပျော်စရာ နည်းတနည်းပါ။ ခရစ်ယာန်မိတ်ဆွေ- အမြဲ စူးစိုက် သတိထားနေတဲ့ အသက်တာမျိုးနဲ့၊ ကိုယ့် ဘာသာတရားကို မရှုတ်ချလိုက်ပါနဲ့။ အခုပဲ၊ ကိုယ်တော်ထံ လာပါ။ ဝန်ထုပ်တွေ ချထားပါ။ လေးလံတဲ့ ဝန်ထုပ်တွေ ပိပြီး၊  ချိနဲ့ကာ လျှောက်နေရသလား။ ဒီဝန်ထုပ်တွေက ကိုယ်တော်အတွက်တော့ မြူမှုန်လောက်ပဲ ရှိတယ်။ ကိုယ့်အားလေးနဲ့ ကြိုးစား ရုန်းကန်နေဦးမလား။

အို…. ဒုက္ခလူသား၊ သည်းခံပါ။ ဘုရားသခင်ရဲ့ မစခြင်း ကျေးဇူးတော် သင့်ထံက လွန်မသွားသေးဘူး။ စာငှက်ကလေးကို အစာကျွေးတော်မူတဲ့သူဟာ သင်မှာ လိုနေတာတွေကို ဖြည့်စွမ်းပေးမယ်။ စိတ်ပျက် အားမငယ်နဲ့။ ကိုယ်တော်ကိုပဲ မြှော်လင့်ပါ။ ဒုက္ခပင်လယ်ကို ယုံကြည်ခြင်းသင်္ဘောနဲ့ ဖြတ်ပါ။ ကိုယ်တော်ပါရင် မုန်တိုင်းကြားမှာလည်း ပြုံးပန်း ဆင်နိုင်မှာပါ။ လေနဲ့ ပင်လယ်ကို ဆုံးမတဲ့ အသံတော်ကို နားထောင်ကြည့်ပါ . . . . . . “တိတ်ဆိတ်ငြိမ်ဝပ်စွာနေ . . . . . “။ ”သင့်ကို သတိနှင့် ကြည့်ရှုတော်မူသောကြောင့်၊ သင်တို့၌ စိုးရိမ်ခြင်းအမှု ရှိသမျှတို့ကို ကိုယ်တော်၌ အပ်နှံကြလော့။”

ကိုယ်ဟာ ဘုရားသခင်ရဲ့ အိမ်တော်သားဖြစ်တာကို သတိရပါ။ ဒဏ်ရာကို စည်းပေးရင်း၊ စိတ်အနာကို ကျက်စေမယ်။ တွေ့ရတဲ့ ဒုက္ခဆင်းရဲတွေကြောင့် ကျေးဇူးတော်ကို သံသယ မဖြစ်နဲ့။ ကြည်နူးဖွယ်အချိန်တွေမှာ ကိုယ့်ကို ကိုယ်တော်ချစ်သလို၊ ဒုက္ခရောက်နေချိန်မှာလည်း ချစ်နေတယ်ဆိုတာ ယုံကြည်ပါ။ ကိုယ်တော် ဘယ်တော့မှ မပြောင်းလဲပါ။ စိုးရိမ်စိတ်နဲ့ ရုန်းကန်နေဦးမလား။ ဘုရားသခင်ရဲ့ မစခြင်းကို စွန့်ပယ်ထားရင် အသက်တာ ငြိမ်သက်မှာ မဟုတ်ဘူး။

ဘုရားသခင် သတိနဲ့ ကြည့်ရှု နေပါတယ်။ စိုးရိမ်သောကတွေနဲ့ ပြည့်နေဦးမလား။ အသက်ဝိညာဉ်အတွက် ကိုယ်တော်ကို ကိုးစားနိုင်ရင်၊ ကိုယ်ခန္ဓာအတွက် ဘာကြောင့် ကိုးစားလို့ မရဘဲ ဘယ်နေမလဲ။ ဝန်ထုပ်တွေ ထမ်းဖို့ ကိုယ်တော် ဘယ်တော့မှ မငြင်းဘူး။ ဒီဝန်ထုပ်တွေကြောင့် ကိုယ်တော် အားလျော့မသွားဘူး။ ချစ်သောစာရှုသူ၊ စိုးရိမ်ပူပန်တာတွေ စွန့်ပစ်လိုက်ပါ။ သောကတွေကို ဂရုဏာရှင်ဘုရားသခင်ရဲ့ လက်တော်ထဲမှာ အပ်နှံကြစို့။
ဆင်ခြင်ရန်။             ။ စာငှက်တွေကို သတိနဲ့ ကြည့်ရှုတော်မူသော သူဟာ ကျွန်တော်တို့ကိုလည်း သတိနဲ့ ကြည့်ရှုနေတော်မူမှာ မလွဲပါ။
 12
 ထာဝရဘုရား၏ လက်တော်                   
“ကြည့်ရှုလော့။ ထာဝရဘုရားသည် မကယ်တင်နိုင်အောင် လက်တော်တို့သည်မဟုတ်။”  (ဟေရှာ ၅၉: ၁)
ယေဇကျေလ    ၃၃: ၂၁-၂၂။ ဟေဗြဲ ၁၂: ၅-၁၁ ။
ထာဝရဘုရားရဲ့ လက်တော်က ကောင်းမြတ်ပါတယ်။ လက်တော်တင်ပြီး၊ ဆုံးမတဲ့အခါဖြစ်စေ၊ ခွန်အားနဲ့ ပြည့်စုံစေတဲ့အခါဖြစ်စေ၊ ကိုယ်တော်လက်တော်ဟာ ကောင်းကြီးပေးတဲ့ လက်သာဖြစ်တယ်။ ညအချိန်တွေမှာ လှံတံတော်နဲ့ အကြည့်အရှု့ ကြွတယ်။ စိတ်ပျက်အားလျော့သူ၊ ပုန်ကန်သူ မဖြစ်စေနဲ့။ “နောက်မှ ငြိမ်သက်ခြင်းနှင့် စပ်ဆိုင်သော ဖြောင့်မတ်ခြင်းအကျိုးကို ခံရကြ၏။” ( ဟေဗြဲ ၁၂: ၁၁ ) လို့ သိထားပြီး၊ ဝမ်းမြောက်စွာ ဝန်ခံသူ၊ ကောင်းကျိုးမြော်ရင်း ကြိုးစားဆောင်ရွက်သူဖြစ်ပါစေ။
ထာဝရဘုရားရဲ့ လက်တော်ဟာ စိတ်ဝိညာဉ်ကို အားပြည့်စေဖို့၊ ထာဝရကာလနဲ့ ဆိုင်တဲ့ အရာတွေကိုသာ မြော်ကြည့်တတ်စေဖို့၊ မကြာခဏ ထောက်မလေ့ရှိတယ်။ လက်တော်နဲ့ ကျေးဇူးပြုခြင်းကို ခံစားရစေသော။ ကျိန်းဝပ်တော်မူတဲ့ သန့်ရှင်းသောဝိညာဉ်တော်နဲ့ ကိုယ်တော်ရဲ့ တန်ခိုးတော်ဟာ ရွှေလင်းတအတောင်နဲ့ ချီသလို၊ စိတ်ဝိညာဉ်ကို ကောင်းကင်အရပ်ဆီ ပို့ဆောင်ပေးတယ်။ လောကီဝမ်းနည်းခြင်းတွေကို ချေဖျက်ပြီး၊ ကောင်းကင်နဲ့ ဆိုင်တဲ့ ဝမ်းမြောက်ခြင်းနဲ့ ပြည့်စေတယ်။ ဝိညာဉ်တော်အားဖြင့် မမြင်နိုင်တဲ့အရာတွေ ထင်ရှားလာတဲ့အခါ၊ မျက်မြင်ရအရာတွေရဲ့ ကြီးစိုးနိုင်စွမ်းလည်း ပျောက်ကွယ်သွားတယ်။ အားနည်းတဲ့ သိုးရှိသမျှအတွက် သိုးထိန်းရှင်ရဲ့ လက်တော်က ကောင်းမြတ်လှပါတယ်။
တဦးချင်းဝတ်ပြုနေချိန် Quiet Time တွေဟာ ဘုရားနဲ့ မိတ်ဆွေဖွဲ့တဲ့ နှစ်သက်စရာ အချိန်တွေ အမြဲ ဖြစ်ပါစေသော။ စိတ်ဓါတ်ကျနေ၊ ဒေါသထွက်နေ၊ ယုံကြည်ခြင်း အားနည်းနေတာတွေကို ထင်ထင်ရှားရှား သိမြင်ခံစား လာရတယ်။ ဒီအရာတွေ ပျောက်ကင်းဖို့ လက်တော်ကို ကျွန်တော့်အပေါ်မှာ တင်စေချင်တယ်။ လောကကိုဖန်ဆင်းခဲ့တဲ့ ကိုယ်တော်ရဲ့ လက်တော်ဟာ ကျွန်တော်စိတ်နှလုံးကို အသစ်ပြန်လည် ဖန်ဆင်းနိုင်တယ်။ ကမ္ဘာကို ကြည့်ရှု့ ထောက်ပံ့နေတဲ့ အနန္တတန်ခိုးနဲ့ ပြည့်စုံတဲ့ လက်တော်သည် မောပန်းအားငယ်နေတဲ့ ဝိညာဉ်ကို ကြည့်လို့ မဝ ဖြစ်နိုင်တယ်။  ကယ်တင်ရှင်ရဲ့ လက်တော်ဟာ ထိုထက်မက သာ၍ ပြုပါစေသော။
မေတ္တာလက်တော်ဟာ တချိန်ပြီး တချိန် လမ်းပြပို့ဆောင်နေကြောင်း၊ ဘာလို့ မခံစားမိဘဲနေမလဲ။ အို င့ါဝိညာဉ်၊ ကိုယ်တော်ကိုသာ မြော်ကြည့်ရင်း၊ စိုရိမ်စိတ် ရှိသမျှကို ပျောက်လွင့်စေ။ ရှင်ပြန် ထမြောက်တဲ့အရှင်ကို မြော်ကြည့်ပါ။ ကိုယ်တော် ထာဝရ အသက်ရှင်တော်မူတယ်။ သင့်လက်ကို သံရိုက်ရာရှိတဲ့ ကိုယ်တော့် လက်တော်ထဲမှာ ထည့်ထားပါ။ ကိုယ်တော်က . . . . “ငါ၏ ငြိမ်သက်ခြင်းကို သင်တို့၌ ငါထားခဲ့၏။ ထာဝရအသက်ကိုလည်း ငါပေး၏။ ထိုသိုးတို့သည် ပျက်စီးခြင်းနှင့် အစဉ်မပျက်ကင်းလွှတ်ကြလိမ့်မည်။ အဘယ်သူမျှ ထိုသိုးတို့ကို ငါ့လက်မှ မနှုတ်မယူရာ။”  (ယော ၁၄: ၂၇။ ၁၀: ၂၈)
ဆင်ခြင်ရန် ။          ။  “အိုထာဝရဘုရား။ အကျွနု်ပ်၏ နေ့ရက်ကာလများသည် ကိုယ်တော်လက်ထဲ၌ ရှိကြပါ၏။”

13
"For me to live is Christ." Phil. 1: 21
…… အသက်ရှင်သည့်အရာမှာ ခရစ်တော်ဖြစ်၏ …..
“သေလျှင်မူကား သာ၍အကျိုးရှိ၏။” (ဖိ ၁:  ၂၁)
ဆာလံ ၁၆။ ဖိလိပ္ပိ ၁: ၂၁ - ၂၉။
ယုံကြည်သူဟာ ခရစ်တော်အတွက် အမြဲတမ်း အသက်ရှင်နေခဲ့တာ မဟုတ်ပါ။ သန့်ရှင်းသော ဝိညာဉ်တော် ဘုရားက သူ့အပြစ်ကိုဖော်ပြပြီး၊ ကယ်တင်ရှင်ရဲ့ အသွေးတော်ကို ကိုးစား၊ ကိုယ်တော်ရဲ့ အသက်သစ်ကို ရပြီးချိန်မှစ၍သာ ခရစ်တော်အတွက် အသက်ရှင်စပြုလာတယ်။ ခရစ်တော်အတွက် အသက်ရှင်စပြုခြင်းဟာ အသစ်မွေးဖွားချိန်မှာ စတယ်။ အဲဒီအချိန်ကို စစ်မှန်တဲ့ ဘုရားသားတိုင်း တွေ့ကြုံရပြီး၊ ဘုရားသားဖြစ်ကြောင်း သက်သေတခုလည်း ဖြစ်တယ်။ မိတ်ဆွေ အဲဒီလို တွေ့ကြုံရပြီလား။
ယုံကြည်သူအတွက် သခင်ယေရှုသာလျှင် အဘိုးအထိုက်ဆုံး ဖြစ်တယ်။ ကိုယ်တော်ဟာ “အလွန် အဘိုး ထိုက်သော ပုလဲ” (မဿ ၁၃: ၄၆) “လူတသောင်းတို့တွင် အထွဋ္ဋ်အမြတ်” (သီချင်း ၅: ၁၀) “ငါ့ဝိညာဉ်ချစ်သောသူ” ဖြစ်တယ်။ အသက်သစ်ဟာ ကိုယ်တော်ထံက လာပြီး၊ ကိုယ်တော်ပိုင်တဲ့အတွက် ဘုန်းတော် ထင်ရှားဖို့သာ အသက်ရှင်ရမယ်။ ပြောလို့ မမှီတဲ့ ကိုယ်တော့်မေတ္တာဟာလည်း ဘုန်းတော် ထင်ရှားခြင်းနဲ့သာ သင့်တော်မှာပါ။ ဒီသဘောကို ရှင်ပေါလုက ပြည့်ပြည့်စုံစုံ ဖော်ပြခဲ့ပြီးဖြစ်လို့၊ ကျွန်တော်တို့အတွက် . . . “ငါအသက်ရှင်သည့်အရာမှာ ခရစ်တော်ဖြစ်၏။” လို့ ဖြစ်သင့်ပါပြီ။
ရှင်ပေါလုရဲ့ စကားက အများထင်တာထက် နက်နဲပါတယ်။ အသက်တာရဲ့ ရည်ရွယ်ချက်နဲ့ အဓိကအလုပ်ဟာ ခရစ်တော်ဖြစ်တယ်လို့သာ မှတ်ယူတတ်ကြတယ်။ အဲဒီလို မဟုတ်ပါဘူး။ ရှင်ပေါလုရဲ့ အသက်သည်ပင်လျှင် ခရစ်တော် ဖြစ်နေတယ်။ ကိုယ်တော်သည် “အသက်”၊ “မှန်သောဘုရားသခင်” နဲ့ “ထာဝရအသက်” ဖြစ်တယ်။ (ယော ၁၄: ၆ ။ ၁ယော ၅: ၂၀) ရှေးသန့်ရှင်းသူတယောက်က “ထာဝရကာလမှာ စားသောက် အိပ်စက်ရသလို ယခုနေရတယ်” လို့ ဆိုတယ်။ သခင်ယေရှုသာလျှင် သူရဲ့ အသက်ရှုခြင်း၊ စိတ်ဝိညာဉ်၊ စိတ်နှလုံးနဲ့ အသက်လည်း ဖြစ်တယ်။ ဒါက  အစစ်အမှန် ပြောင်းလဲတဲ့ ခရစ်ယာန်ရဲ့ အသက်တာ အခြေအနေမှန်ပါပဲ။
ချစ်သောစာရှုသူ၊ အသက်ရှင်တဲ့အရာမှာ ခရစ်တော်ဖြစ်တယ်လို့ သင် အမှန်ပြောနိုင်ပြီလား။ ခရစ်တော်အတွက် အလုပ်တွေ လုပ်နေသလား။ အဲဒီလို အကန့်အသတ်နဲ့ နာခံ အလုပ်လုပ်နေသူတွေ ရှိတယ်။ ဒါပေမယ့် ဘုရားသခင် အလိုရှိတဲ့သူဆိုတာ ရှင်ပေါလုလို ခရစ်တော်အတွက် လုံးလုံး အသက်ရှင်မယ့်သူသာ ဖြစ်တယ်။ ဒါကသာ အပြည့်အဝ စစ်မှန်တဲ့ ခရစ်ယာန် အသက်တာဖြစ်တယ်။ မပူမအေး၊ စိတ်နှစ်ခွဖြစ်တဲ့၊ အားနည်းတဲ့ ခရစ်ယာန်အဖြစ်မျိုးနဲ့ ကင်းဝေးပါစေ။
ဆုတောင်း။            ။ အို ထာဝရဘုရား၊ ကိုယ်တော့်အတွက်သာ အသက်ရှင်ဖို့ရာ ကိုယ်ကို ဆက်သပါ၏။ ကိုယ်တော်အတွက် သွားဖို့ရာ စိတ်ပါလက်ပါ အသင့်ဖြစ်စေပါ။ အသက်စွန့်ရန်ပင် အသင့်ဖြစ်စေပါ။ ဘုန်းအသရေ ရှိသမျှဟာ ကိုယ်တော့်ဖို့ ဖြစ်ပါစေသော၊ အာမင်။

14
"My sister, my spouse." Song 4: 12
အသင်းတော်ကို  ချစ်သောခရစ်တော်
“ဘုရားသခင်သည် ငါတို့ကို ရှေးဦးစွာ ချစ်တော်မူသောကြောင့် ငါတို့သည်ဘုရားသခင်ကို ချစ်ကြ၏။” (၁ယော ၄: ၁၉)
သီချင်း ၄: ၈-၁၅။  ဧဖက် ၅: ၂၅-၃၂။
ကောင်းကင်စကားမှာတော့ အသင်းတော်ကို သခင်ယေရှုခရစ်တော်တည်းဟူသော သိုးသငယ်ရဲ့ ခင်ပွန်းလို့ ခေါ်တယ်။ (ဗျာ ၁၉: ရ၊ ၉) ကောင်းကင်ရှောလမုန်ဖြစ်တဲ့ ခရစ်တော်က သတိုးသမီး အသင်းတော်အပေါ်ထားတဲ့ ချစ်ခြင်းမေတ္တာ အားကြီးပုံကို လေ့လာကြည့်ပါ။
 ( က ) ငါ့  နှ  မ  ။          ။ သဘာဝအားဖြင် ့ဆက်နွယ်မှုကြောင့် နီးကပ်တော်စပ်သူ၊ စိတ်သဘော တိုက်ဆိုင်သူ၊ လူဇာတိခံခြင်းကြောင့် အသားထဲက အသား၊ အရိုးထဲက အရိုး ဖြစ်ရပြီ။ ရှေးကတည်းက သိကျွမ်းခဲ့သူ၊ ကလေးဘဝမှစ၍ ငါကြည့်ရှု့ ပြုစုခဲ့ရသူ၊ ငါ့ နှမ။
 ( ခ ) ငါ့ ခင် ပွန်း   ။           ။ သင်ဟာ ငါ့အရင်းနှီးဆုံးနဲ့ အနီးစပ်ဆုံးသူ၊ ငါချစ်သော အပေါင်းအဖေါ်၊ ငါ၏ကိုယ်၊ ကောင်းကင် လက်ထပ်ပဋ္ဋိညာဉ်နဲ့ တရားဝင် အကြင်မယားဖြစ်လာသူ၊ မိန်းမပျိုများစွာထဲမှ ငါရွေးကောက်ထားသူ၊ ငါ့မေတ္တာ လက်ရုံးတော်နဲ့ ပွေ့ဖက်ထားခံရသူ ငါ့ခင်ပွန်း။
ကြည့်ပါ။ “အမျိုးသားချင်း” ဟာ ကျွန်တော်တို့ရဲ့ နိမ့်ကျမှုအတွက် မရှက်ခဲ့ဘူး။ ကျွန်တော်တို့ကြောင့် သူဝမ်းမြောက်တာကိုလည်း မထိမ်ဝှက်ဘူး။ အသင်းတော်ကို ပိုင်ဆိုင်ရလို့ ဂုဏ်ယူ ဝမ်းမြောက်နေတဲ့ ကိုယ်တော်ပါတကား။ ရွေးကောက်ထားတဲ့ လူသားတွေထဲမှာ ပျော်မွေ့နေတယ်။ သိုးထိန်းကြီး ကိုယ်တော်က ကျွန်တော်တို့ကို လိုက်ရှာနေခဲ့တယ်။ “ . . . ပျောက်သောသူတို့ကို ရှာ၍ ကယ်တင်အံ့သောငှါ၊” ကြွလာခဲ့ရတယ်။ (လုကာ ၁၉: ၁၀) အကြောင်းက ကျွန်တော်တို့ကို ကိုယ်တော် ရှေးကတည်းက ပိုင်ဆိုင်လို့ ဖြစ်တယ်။
                မရယူနိုင်ဘူး။ မိတ်ဆွေဖြစ်ခွင့်ပင် မတောင်းခံနိုင်ဘူး။ အိုသခင်ယေရှုဘုရား၊ အသင်းတော်ဟာ အဲဒီလို ခံစားကာ ကြေနပ် ဝမ်းမြောက်နေပါစေ။ ကောင်းကင်သတိုးသားဖြစ်တဲ့ ချစ်သောခင်ပွန်း၊ ကျွန်တော်တို့ရဲ့ ထာဝရဦးခေါင်း၊ ကိုယ်တော်ကို ကျေးဇူးတင်ပါတယ်။  ငါ့နှမ၊ ငါ့ခင်ပွန်းလို့ ခေါ်ခွင့်ခံရဖို့ ကိုယ်တော်ခေါ်လို့ ကျေးဇူးတင်ပါတယ်။ အဲဒီ နာမည်နှစ်ခုနဲ့ ထာဝရ လုံခြုံစိတ်ချမှုကို ပေးသနားပါပြီ။ ကိုယ်တော်ထံမှ ဘယ်တော့မှ ခွဲခွာ မသွားစေတော့ဘူး။ ခွဲခွာလည်း မခွဲခွာရက်တော့ပါ။ အိုချစ်မိတ်ဆွေ ရိုသေမြတ်နိုးဖွယ် ကိုယ်တော့်မီးတောက်ထဲကို အမြန်ပြန်လာပါ။

15
 နံဝိညာဉ်နှင့်၎င်း၊ သစ္စာနှင့်၎င်း၊ ကိုးကွယ်ရမည် ---
"The iniquity of the holy things." Exodus 28:38
ထွက်မြောက်ရာ ၂၈: ၃၆ - ၃၈။  ယော ၄: ၂၁ - ၂၄။
“အို ထာဝရဘုရား၊ သန့်ရှင်းစေသမျှသော အရာတို့၌ပါသော အပြစ်တို့ကိုမြင်လာရန် အကျွန်ုပ် မျက်စိကို ဖွင့်တော်မူပါ” လို့ ပြောရင်း အစပြုကြပါစို့။ ဒီလို ဝမ်းနည်းဖွယ် အမြင်ဆန်းကို စူးစိုက်လေ့လာကြည့်ရင် စိတ်နှလုံး နှိမ့်ချလာဖို့ အကျိုးပြုပါတယ်။ ဝတ်ပြု ကိုးကွယ်နေတုန်း၊ ပြုမိတဲ့ အပြစ်တွေ၊ လျှို့ဝှက်တာ၊ အသက်မပါဘဲ ထုံးစံအရ ပါဝင်နေတာ၊ မပူမအေး ဖြစ်နေတာ၊ ရိုသေ ကိုင်းရှိုင်းမှုမရှိတာ၊ စိတ်ပျံ့လွင့်နေတာနဲ့ ဘုရားသခင်ကို မလေးစားတာ. . . စတာတွေဟာ သန့်ရှင်းတဲ့အရာတွေမှာ ပါတဲ့ အပြစ်တွေ ဖြစ်ပါတယ်။
ဒါလောက်နဲ့ မကပါဘူး။ သခင်ဘုရားအတွက် အမှုတော်ဆောင်ရာမှာလည်း ဟန်ဆောင်မှု၊ အတ္တ၊ ပေါ့ပေါ့ဆဆ နေထိုင်မှု၊ ညစ်ညူးခြင်း၊ ပျင်းရိခြင်း၊ မယုံကြည်ခြင်း . . .  စတဲ့ မစင်ကြယ်မှု များစွာလည်း ထပ်ဖြည့် ပါဝင်နေတယ်။ တဦးချင်း ဝတ်ပြုကိုးကွယ်ချိန်တွေမှာလည်း စိတ်မပါ့တပါ၊ အေးစက်စက်၊ မေ့ပြီး မလုပ်မိတာ၊ အိပ်ငိုက်တာနဲ့ အချည်းနှီး ဖြစ်နေတာတွေကြောင့် ငြင်းဆန် ပုန်ကန်တွေသာ ပိုပြီး ပွားများလာတယ်။ ဘုရားကျောင်းသွားသူ တချို့ဖြစ်စေ၊ အသင်းတော်အချို့ ဖြစ်စေ၊ ကျွန်တော်ပဲ ဖြစ်ဖြစ်၊ သန့်ရှင်းသောအရာတွေနဲ့ ဆိုင်တဲ့ အပြစ်တွေ အများကြီး ရှိပါလိမ့်မယ်။
အချို့ခရစ်ယာန်တွေရဲ့ ဝတ်ပြု ကိုးကွယ်ချိန်မှာ သူတို့စိတ်နှလုံးဟာ ပျင်းစရာ ဥယျာဉ်ကြီးနဲ့ တူနေမယ်။ ကျွန်တော့် စိတ်နှလုံး ဥယျာဉ်ထဲမှာ ချုံနွယ် ပိတ်ပေါင်းတွေ နှောက်ယှက် ကြီးစိုးနေရင် ဝမ်းနည်းစရာ ဖြစ်နေမှာပါ။ (သူတပါးကို မဆန်းစစ်ပါနဲ့ဦး။ ကိုယ့်အိမ်ထောင်မှာ မေတ္တာနဲ့ အစပြုကြပါစို့။) ဘုရားပေးတဲ့ စိတ်သဘောနဲ့ သန့်ရှင်းစွာ အစပြုကြစို့။ သန့်ရှင်းသော ဝိညာဉ်တော်မစမှုနဲ့ ဘုရားသခင့် ထံပါး တိုးဝင်ပြီး၊ ဂရုဏာတော်ကို တောင်းခံကြပါစို့။ နှောက်ယှက်တတ်တဲ့ ချုံနွယ် မှန်သမျှကို သခင်ဘုရားထံပါး ဝန်ခံခြင်းနဲ့ သုတ်သင် ရှင်းလင်းပစ်ရမယ်။
စိတ်သက်သာစရာကတော့ - ယဇ်ပုရောဟိတ်မင်းဟာ “ထာဝရဘုရားအား သန့်ရှင်းခြင်း” လို့ အက္ခရာတင်တဲ့ သင်းကျစ်ကို နဖူးမှာ ဆင်ပြီး၊ သန့်ရှင်းထားတဲ့ အရာတွေမှာ ပါတဲ့ အပြစ်ကို ဆောင်တယ်။ သခင်ခရစ်တော်က ကျွန်တော်တို့ အပြစ်တွေကိုဆောင်ကာ ကျွန်တော်တို့ မသန့်ရှင်းခြင်းကြောင့် မဟုတ်ဘဲ၊ ကိုယ်တော်၏ သန့်ရှင်းခြင်းကြောင့် ခမည်းတော် ဘုရားရှေ့တော်သို့ ဝင်ပြီး၊ ကိုယ်ကိုပြတော်မူပါတယ်။ ကြီးမြတ်လှတဲ့ ယဇ်ပုရောဟိတ်မင်းကို ယုံကြည်ခြင်းဖြင့် မြင်တွေ့ခွင့်ရနေတာဟာ ကျေးဇူးတော်ကြောင့်ပါ။
ဆင်ခြင်ရန်။           ။ ဘုရားသခင်သည် နံဝိညာဉ် ဖြစ်တော်မူ၏။ လူ၏ ကဲ့ရဲ့ပြစ်တင်ခြင်းကို ခံတော်မမူပေ။

16
 ကိုယ်တော်မေတ္တာသည် . . . သာ၍ကောင်းပါ၏…
"Thy love is better than wine." - Song 1:2
“စကားပြောကာမျှအားဖြင့်သာ မချစ်ဘဲ၊ စိတ်ပါကိုရောက် ဧကန်အမှန်ချစ်ကြကုန်အံ့။” ၁ယော ၃: ၁၈။
သီချင်း ၁: ၁-၁၇ ။ ၁ယော  ၄: ရ-၁၁ ၊ ၁၉။
သခင်ဘုရားနဲ့ မိတ်ဿဟာယဖွဲ့တာလောက် ယုံကြည်သူကို ဝမ်းမြောက်စေတဲ့အရာ မရှိပါ။ တခြားသူတွေ ဂရုဏာတော်ကို သာမန် ခံစားရတာထက်ပိုပြီး၊ ယုံကြည်သူက ကိုယ်တော်ကို နှစ်သက် ပျော်မွေ့နေတတ်တယ်။ ဆုကျေးဇူးတွေနဲ့ အမှုတော်မှာ ဝမ်းမြောက်နေတတ်တယ်။ ဒါပေမယ့် သခင်ဘုရား ကိုယ်တော်တိုင်အပေါ်မှာ  ဝမ်းမြောက်နေတာကို ဒီအရာတွေနဲ့ မနှိုင်းယှဉ်သာဘူး။ လောကဥယျာဉ်တွေက မပေးနိုင်တဲ့ ကောင်းကင် စပျစ်ရည်ကို ယုံကြည်သူက ကိုယ်တော်ထံမှ ရထားပြီ။ လောကမုန့်ဖိုတွေက လုပ်မပေးနိုင်တဲ့ ကောင်းကင်မုန့်ကိုလည်း ရထားပြီ။
ချစ်သောသခင်နဲ့ မိတ်ဿဟာယဖွဲ့ရတဲ့ ချိုမြိန်နှစ်သက်စရာ အရသာကို သင် ခံစားဖူးပြီလား။ ချစ်မိတ်ဆွေ- လောကီ ပျော်မွေ့ခြင်းထဲကနေ သခင်ယေရှုထံ လှည့်ပြန်ကြစို့။ ကောင်းကင်မန္နမုန့်ရဲ့ ဝမ်းမြောက်ခြင်း အစစ်ကို ခံစားရဖို့ အပေါ်ယံ လောကီအရာတွေကို  ပယ်ရှားကြစို့။ အဖျင်းဟာ စပါးနဲ့ ဘာမှမဆိုင်ဘူး။ သွေးပြီးသား စိန်နဲ့ အပယ်ဖြတ်စလည်း တခြားစီပဲ။ တဒင်္ဂအိပ်မက်နဲ့ ထာဝရ ဘုန်းအသရေလည်း ဘာမျှမဆိုင်ပါ။ လူ့လောကရဲ့ ပျော်စရာအကောင်းဆုံး အရာတွေပင်လျှင် သခင်ယေရှုရဲ့ အနိမ့်ဆုံး အခြေအနေနဲ့ မနှိုင်းသာပါဘူး။
လောကီပျော်မွေ့ခြင်းဟာ စိတ်ကျေနပ်မှု မရခင် ပျောက်လွင့်သွားတတ်တယ်။ မြင့်မြတ်သန့်ရှင်းလှတဲ့ ထာဝရ ဝမ်းမြောက်ခြင်းကတော့ ဖန်ဆင်းရှင် ဘုရားသခင်ထံမှသာ ခံစားရတယ်။ တနေ့မှာ... ပရဒိသုဘုံမှာရှိတဲ့ အသက်ပင်ကို ကိုယ်တော် ပြညွှန်ပေးသနားမယ်။ ဘုရားသခင်နဲ့ သိုးသငယ်တော်ရဲ့ ပလ္လင်တော်ထဲက ထွက်လာတဲ့ အသက်ရေစီးရာမြစ်မှ ကြည်လင်သန့်ရှင်းတဲ့ရေကို သောက်သုံးရမယ်။ ဒီ့ထက်မက ခံစားရဖို့ရာ သခင်ဘုရားကို ချစ်တဲ့သူတွေကို ဂတိတော် ပေးထားပါတယ်။
ဒါတွေအားလုံးဟာ ဘုရားသခင်ချစ်တဲ့သူတွေအတွက် အမွေဖြစ်ပါတယ်။ သခင်ယေရှုကို သင် ဘယ်လောက် ချစ်သလဲ.. မိတ်ဆွေ။ ယခုပင် စိတ်နှလုံးအကြွင်းမဲ့ ကိုယ်စွမ်း၊ ဉာဏ်စွမ်းရှိသမျှနဲ့ ကိုယ်တော်ကိုချစ်ပါ။ ကိုယ်တော့် ကျေးဇူးတော်ကို အထပ်ထပ်ချီးမွမ်းပါ။ အကြောင်းကတော့ ဘုရားသခင်က ရှေ့ဦးစွာ ချစ်တော်မူလို့ ကျွန်တော်တို့ ဘုရားသခင်ကို ချစ်ကြတယ်။ ဒီမျှမက ကိုယ်တော့်မေတ္တာက ပိုကောင်းလို့့် ဖြစ်ပါတယ်။
ဆုတောင်း ။          ။ သခင်၊ ကိုယ်တော့်ကို ပို ချစ်လာစေပါ။

17
ငါသည် သင်တို့၏ ဘုရားဖြစ်မည်. .
"I will be their God." - Jer 31: 33
“ဧမာနွေလအနက်ကား၊ ငါတို့နှင့်အတူ ရှိတော်မူသော ဘုရားသခင် ဟု ဆိုလိုသတည်း။” (မဿဲ ၁:  ၂၃)
ယေရမိ ၃၁: ၂၇ - ၃၄။ ဟေဗြဲ ၈: ၁၀ - ၁၃။
စိတ်ဆန္ဒရှိသမျှထက် ကိုယ့်ကို ကြေနပ်အားရစေမယ့် အရာတခုရှိပါတယ်။ အနတ္တတန်ခိုးရှင် ထာဝရဘုရားက . . . “ငါ ထာဝရဘုရားသည် ငါ၏ပညတ်တရားတို့ကို သင်တို့အတွင်းထဲသို့ သွင်းမည်။ သင်တို့ စိတ်နှလုံးပေါ်မှာ ရေးထားမည်။ ငါသည် သင်တို့၏ ဘုရားဖြစ်မည်။ သင်တို့သည်လည်း ငါ၏လူ ဖြစ်ကြလိမ့်မည်။” ဒီအချက်ဟာ လူတွေ တွေးသမျှ၊ လိုလားသမျှ ထက်သာ၍ ကြီးမားတဲ့ ဘုရားသခင်ရဲ့ ဂတိတော်ဖြစ်တယ်။ တောင်းတာထက် ပိုရလို့၊ ဒါဝိဒ်က …. “အကျွနု်ပ် ခွက်ဖလားသည် လျှံလျှက်ရှိပါ၏” လို့ ချီးမွမ်းခြင်းယဇ် ပူဇော်ခဲ့တယ်။
ခရစ်တော်၌ အလုံးစုံတို့ကို ပိုင်ဆိုင်ရပါပြီ။ တောင့်တတဲ့အရာနဲ့ လိုအင်ဆန္ဒ မှန်သမျှကို သခင်ဘုရားအားဖြင့်သာ ပြည့်စုံရတယ်။ ဘုရားသခင်ရဲ့ အတိုင်းထက် အလွန်ကြွယ်ဝမှုတွေက ဖြည့်စွမ်းပေးရုံမျှမက ထပ်လောင်းပေးနေတော့- “အကျွန်ုပ်ခွက်ဖလားသည် လျှံလျှက်ရှိပါ၏။”  “ငါသည် သင်၏ဘုရားဖြစ်မည်။” လို့ မိန့်တော်မူတော့ ကိုယ်တော်သာ ကျွန်တော်တို့ရဲ့ ဘုရားဖြစ်ရင် မပြည့်စုံဘဲ မနေတော့ဘူး။ ဘုရားသခင် ရှိနေမှတော့ ဘာမှ မလိုတော့ဘူး။ ကိုယ်တော် ချမ်းသာတာတွေက ကျွန်တော့်တို့ကို မကြေနပ်ဘဲ နေစေပါ့မလား။
မိတ်ဆွေ၊ ကောင်းကင်ဘုံကို တည်တော်မူတဲ့ ကိုယ်တော်က ကောင်းကင်နဲ့ လိုက်ဖက်တဲ့ ဂတိတော်ကို ပေးထားတယ်။ “ငါသည် သင်၏ဘုရားဖြစ်မည်။” ဆိုတဲ့ ဂတိတော်ကို တခြားအရာတွေက မယှဉ်နိုင်ဘူး။ နှစ်အထောင် အသောင်း ကြာပေမယ့်လည်း ဘုရားသခင်ရဲ့ ကောင်းကြီးမင်္ဂလာတွေကို သင် သုံးလို့ မကုန်ဘူး။ ထာဝရကာလမှာ ….. “ထာဝရဘုရား၏ တင့်တယ်ခြင်း အသရေတော်ကို ဖူးမြင်၍” ထာဝရ ကာလတလျှောက်လုံး ဗိမာန်တော်မှာ အမြဲ ပျော်နေရမှာပါ။ (ဆာလံ ၂၇: ၄)
“ငါသည် သင်၏ဘုရားဖြစ်မည်။” ဒီဂတိတော်ရဲ့ တိကျတဲ့ မြော်လင့်ခြင်းက ကောင်းကင်ဘုံကို ဒီကမ္ဘာပေါ် အရောက် ပို့ဆောင်ပေးတယ်။ ဂတိတော်ရဲ့ ကြွယ်ဝပြည့်စုံမှုတွေက ကောင်းကင်ဘုံကို ပိုပီပြင်လာစေတယ်။ ဂတိတော် အလင်းထဲမှာ နေ့စဉ် လျှောက်လှမ်းကြပါစို့။ လောက အနာဂတ် နေ့ရက်တွေအတွက် ကြိုတင် ကြံစည်စရာ မလိုတော့ဘူး။ မကြာမှီ ဂတိတော်ရှိတဲ့အတိုင်း တွေ့မြင်ရတော့မှာဖြစ်လို့ ကောင်းကင်သား၊ ဘုရင့်သားတော်တယောက် အနေနဲ့ အသက်ရှင်ပါ။ ကိုယ်တော်သည် ကျွန်တော်တို့ရဲ့ ဘုရားသခင်၊ ကျွန်တော်တို့ဟာ ကိုယ်တော်ရဲ့လူတွေ ဖြစ်ရပါတော့မယ်။
ဆုတောင်း။             ။ အို ထာဝရဘုရား၊ အဲဒီနေ့ မြန်မြန် ရောက်ပါစေ။

18
 ထာဝရဘုရား၏ အမှုတော်ကို ဝမ်းမြောက်စွာဆောင်ရွက်ကြလော့….
"Serve the Lord with gladness." - Psalms 100: 2
                           ဆာလံ  ၁ ၀ ၀ ။ ၁ကော ၁၅: ၅၈ ။
ဘုရားသခင်ကို ချစ်မြတ်နိုးသူရဲ့ လဏ္ခာတရပ်က အမှုတော်မြတ်ကို ရွှင်လန်းစွာ ဆောင်နေခြင်းပါပဲ။ မျက်နှာ ညှိုးညှိုးငယ်ငယ်နဲ့ အမှုတော်ဆောင်နေသူဟာ အမှုတော်ကို အမှန် ဆောင်ရွက်သူမဟုတ်ဘူး။ ရိုသေကိုင်းရှိုင်း ဟန်ပြနေပေမယ့် အသက်မပါဘူး။ ပလ္လင်တော်ကို ချီးမြှောက်ဖို့ ဘုရားသခင်က ကျွန်တွေ မလိုချင်ဘူး။ ကိုယ်တော်က ချစ်ခြင်းမေတ္တာအရှင်ဖြစ်တော့ အမှုတော်ဆောင်တိုင်း ဝမ်းမြောက်ခြင်းဝတ်လုံကို ဝတ်ဆင်ပြီး၊ ရှေ့တော်မှောက်မှာ ခစားရမယ်။ ကောင်းကင်တမန်တွေ မညဉ်းတွားဘူး။ သီချင်းကျူးအေးရင်း အမှုတော်ဆောင်ကြတယ်။
အမှုတော်ကို သင် ဘယ်လို ဆောင်ရွက်နေသလဲ။ အလိုအလျောက် လုပ်ဆောင်တာမဟုတ်၊ ရွှင်လန်းခြင်းမရှိတဲ့ လုပ်ဆောင်တာဟာ အမှုတော်ဆောင်တာ မဟုတ်ပါ။ အမှုတော် ဖျက်နေခြင်းသာ ဖြစ်ပါတယ်။ စိတ်နှလုံးကို သခင်ဘုရား ကြည့်ရှု့တဲ့အခါ၊ ချစ်လို့ အမှုတော်ဆောင်ခြင်းမဟုတ်ဘဲ၊ ခိုင်းလို့ ( သို့ ) သူတပါး တိုက်တွန်းလို့ လုပ်နေခဲ့ရင် ကျွန်တော်တို့ရဲ့ ပူဇော်သက္ကာကို ကိုယ်တော် ငြင်းလိမ့်မယ်။ ထာဝရဘုရား နှစ်သက်တဲ့ စေတနာစိတ်နဲ့တကွ အမှုတော်ဆောင်ခြင်းဆိုတာ အမှုတော်ကို ရွှင်လန်းစွာ ဆောင်ရွက်ခြင်း ဖြစ်ပါတယ်။ ဘယ်သူ တကယ် အလုပ်လုပ်တယ်၊ ဘယ်သူ ရွှင်လန်းစွာ စေတနာပါတယ်ဆိုတာ ကိုယ်တော်သိပါတယ်။
ထာဝရဘုရားမှာ ဆင်နွဲစရာ တိုက်ပွဲများစွာ ရှိနေတယ်။ ရှေ့တန်းစစ်မြေပြင်ကို အတင်း တွန်းပို့နေရသူဟာ မျိုးချစ်စိတ်ရှိသူ မဟုတ်ဘူး။ စူးရှ ထက်မြက်တဲ့ မျက်လုံး၊ တက်ကြွလူးလွန့်တဲ့ မျက်နှာနဲ့ စစ်ချီသီချင်းဆိုပြီး၊ စစ်တလင်းကို ချီတက်သူသာ မျိုးချစ်စိတ်ရှိကြောင်း အကောင်းဆုံး သက်သေပြနေသူဖြစ်တယ်။ ကိုယ့်စိတ် ရွှင်လန်းတာဟာ သူတပါးကိုလည်း အားတက်လာစေတယ်။ ကိုယ်တော်၌ ဝမ်းမြောက်ခြင်းသည် ခွန်အားဖြစ်စေသည်မဟုတ်လား။ ( နေဟမိ ၈: ၁၀ ) စိတ်ရွှင်လန်းခြင်းဟာ အခက်အခဲများစွာကိုလည်း ဖယ်ရှားပေးတယ်။ စိတ်ရွှင်လန်းခြင်းဟာ လှည်းဘီးအတွက် ဆီပမာ၊ မောပန်းသူအတွက် ရှုဆေးသဖွယ် ဖြစ်တယ်။ အရာရာ၌ ကျေးဇူးတော် ချီးမွမ်းခြင်းနှင့်တကွ ဆုတောင်း ပဌာနာပြုခြင်း ၊ ရွှင်လန်းခြင်းတို့အားဖြင့် ကြီးမားလေးလံတဲ့ ဝန်ထုပ်တွေ ပေါ့လာမှာပါ။ (ဖိလိပ္ပိ  ၄: ၆)
အထဲမှာ နာခံမှုရှိတာကို အမှုတော်မှာ ပျော်ပျော်ရွှင်ရွှင် လုပ်ဆောင်နေတာက သက်သေပြနေတယ်။
အမှုတော်ကို သင် ဘယ်လို ဆောင်ပါသလဲ။ ဝမ်းမြောက်စွာ ဆောင်နေသလား။ သို့မဟုတ် ဝမ်းနည်းစွာ ဆောင်နေသလား။ ကိုယ်တော်၌ ဝမ်းမြောက်ခြင်းဟာ ခွန်အားဖြစ်စေကြောင်း သတိရပါ။ ကျွန်တော်တို့ဟာ သခင်ကောင်း၊ အရှင်ကောင်းရဲ့ အမှုတော်ကို ဆောင်ရွက်နေသူတွေသာ ဖြစ်ပါတယ်။
 ဆင်ခြင်ရန် ။                   ။  အမှုတော်ဆောင်ဖို့ အချိန်ဟာ ယခုပင် ဖြစ်ပါတယ်။

19
 ဓမ္မသရဖူ
There is laid up for me a crown of righteousness. 2 Tim 4:8
ဆာလံ ၂၃။                  ၂တိ ၄: ၁ - ၈ ။
တချို့ယုံကြည်သူတွေက သံသယနဲ့ အသက်ရှင်ပြီး၊ မလိုအပ်ဘဲ ကြောက်တတ်ကြတယ်။ “ကောင်းကင်ဘုံကို ငါ ဘယ်တော့မှ မဝင်ရဘဲများနေမလား။ ငါကြောက်လိုက်တာ” လို့ သင် တွေးနေမိသလား။ မကြောက်ပါနဲ့။ ဘုရားသခင်ရဲ့ လူ မှန်သမျှ ဝင်စားရမှာပါ။ သန့်ရှင်းသူတယောက်က သူသေခါနီးမှာ . . . “အိမ်တော်သွားဖို့ ငါမကြောက်ဘူး။ ရှိသမျှကို ငါ့အရင် ပို့ထားနှင့်ပြီ။ ဘုရားသခင်ရဲ့လက်ဆောင်ဟာ ငါ့တံခါးလက်ကိုင်ပေါ်မှာ ရောက်နေပြီ။ ငါလည်း ဝင်စားဖို့ အသင့် ဖြစ်နေပြီ။” လို့ ဆိုတယ်။ ဂတိတော်မြတ်ကို ဒီလို ရိုးရိုးကလေး ယုံကြည်စွဲလန်းနေတဲ့အတွက် ကျေးဇူးတော် ချီးမွမ်းကြပါစို့။
“ဒါပေမယ့် ကောင်းကင်မှာ အမွေမရမှာတော့ မစိုးရိမ်ဘူးလား။” လို့ သူ့မိတ်ဆွေက မေးတော့ “ဟင့်အင်း၊ မစိုးရိမ်ပါဘူး။ ကောင်းကင်ဘုံမှာ ကောင်းကင်တမန် ဂါဗြေလ မဆောင်းနိုင်တဲ့ သရဖူတခုရှိတယ်။ တခြားဘယ်သူနဲ့မှလည်း မတန်ဘူး။ ကျွန်တော်နဲ့ပဲ တန်တယ်။ ရှင်ပေါလုနဲ့ မထိုက်တန်တဲ့ ပလ္လင်တခုလည်း ရှိသေးတယ်။ အဲဒီပလ္လင်က ကျွန်တော့်အတွက် ရည်ရွယ်ထားတာဆိုတော့ ကျွန်တော်ပဲရလိမ့်မယ်။” လို့ ဖြေတယ်။
အို ခရစ်ယာန်၊ သင့်အတွက် သိုထားသော အမွေအတွက် စိတ်ချပါ။ (၁ပေ ၁: ၄) ဝမ်းမြောက်စရာပါ။ ဒါပေမယ့် အမွေ ဆုံးရှုံးနိုင်သလား။ လုံးဝ မရှုံးနိုင်ဘူး။ ဘုရားသားအတွက် အမွေမရှုံးနိုင်ဘူး။ “နောက်ဆုံးသောကာလ၌ ထင်ရှားဖို့ရာ ပြင်ဆင်သော ကယ်တင်ခြင်းသို့ ရောက်စေမည့်အကြောင်း၊ ယုံကြည်ခြင်းအားဖြင့် ဘုရားသခင်၏ တန်ခိုးတော်သည်” ကျွန်တော်တို့ကို စောင့်ရှောက်ထား ပါတယ်။ (၁ပေ ၁: ၅) နှုတ်ကပတ်တော်က မရွေ့လျော့နိုင်ဘူး။ အစဉ်အမြဲ ယုံကြည် ကိုးစားနိုင်ပါတယ်။ ဒါကြောင့် “အထူးထူးအပြားပြားသော စုံစမ်းနှောက်ယှက်ခြင်းကို ခံရသော အကြောင်းရှိလျှင်၊. . . . ယခု ခဏခံရ၍၊ ဝမ်းနည်းသော်လည်း . . . . ရွှင်လန်းသော စိတ်ရှိကြ၏။” (၁ပေ ၁: ၆ - ရ)
ချစ်သော စာရှုသူ၊ ခမည်းတော်ရဲ့ သားမှန်ရင် သံသယမဖြစ်နဲ့။ အပြစ်တွေကို နောင်တရပြီး၊ တခြားသူကို မကိုးစားဘဲ၊ သခင်ယေရှုကိုသာ ယုံကြည်ကိုးစားရင်၊ ဘုရားသခင်ရဲ့ မိသားစုထဲမှာ ပါဝင်ရပြီ။ ကောင်းကင်မှာ နေရာရပြီ။ ဓမ္မသရဖူတလုံးလည်း သင့်အတွက် သိုထားပြီ။ သင့်အမွေကို ဘယ်သူမှ ယူမသွားနိုင်ဘူး။ အသွေးတော်နဲ့  ရွေးဝယ်ခံထားရတဲ့ ယုံကြည်သူတိုင်း အမွေအသီးသီး ရကြမှာပါ။ ဘုရားရှင် ဒီလို မြင်ချင်နေတာပါ။
ဆင်ခြင်ရန်။          ။ ရွေးကောက်ခံရသူတွေ ဆုံစည်းကြတဲ့အခါ ကောင်းကင်ဘုံမှာ ပလ္လင်လွတ် ရှိမှာမဟုတ်ပါ။

20
ငါသည် ကိုယ်ခန္ဓာ၌ ဘုရားသခင်ကို မြင်မည်။
"In my flesh shall I see God." Job 19: 26
 ယောဘ ၁၉: ၂၅ - ၂၇ ။ ၁ယော ၃: ၁ - ၃။
ယုံကြည်သူတွေ ထမြောက်မယ်ဆိုတာ သခင်ခရစ်တော် မပေါ်ထွန်းမှီ နှစ်ပေါင်း ၂,၀၀၀ ခန့်ကတည်းက ယောဘ ကြိုတင်သိခွင့်ရခဲ့တယ်။ ဘုရားသခင်ကို သူ ဘယ်လောက် အားကိုးတယ်ဆိုတာကို ဒုက္ခနေ့ရက်တွေတလျှောက် အပြင်းအထန် အစစ်ခံနေရချိန်မှာ ယုံကြည်ခြင်း၊ သက်သာခြင်းစကားကို ပရောဖက်ပြုနိုင်ဖို့ သန့်ရှင်းသောဝိညာဉ်တော်က အစွမ်းပေးခဲ့တယ်။ စိတ်ချမှုအပြည့်နဲ့ “ငါသည် ဘုရားသခင်ကို မြင်မည်။” လို့ ဆိုခဲ့တယ်။ ဒါဟာ ကောင်းကင်ဘုံရဲ့ အနှစ် အရသာ ဖြစ်သလို၊ ယုံကြည်သူတိုင်းရဲ့ ဝမ်းမြောက်ဖွယ် မြော်လင့်ခြင်းပဲ ဖြစ်ပါတယ်။
ယခုရှိနေသူတွေက ယုံကြည်ခြင်းအားဖြင့်သာ အထုံးအဖွဲ့တော်ထဲမှာ ဘုရားသခင်ကို ဖူးမြင်ကြရတယ်။ မိတ်ဿဟာယဖွဲ့ရင်းနဲ့ ဆုတောင်းရင်းနဲ့သာ ကိုယ်တော်ကို မြော်ကြည့်ရတယ်။ ကောင်းကင်ရောက်သူတွေကတော့  ကိုယ်တော်ဖြစ်သည့်အတိုင်းကို ဖူးမြင်ရပြီ။ ရွေးနှုတ်သောသခင့်နည်းတူ၊ သူတို့လည်းစုံလင်ကြပြီ။ ဂတိတော်က …..“ ငါတို့ရှိသမျှသည် ပြောင်းလဲခြင်းသို့ ရောက်ရကြမည်။”  (၁ကော ၁၅: ၅၂) “ကိုယ်တော် ထင်ရှား ပေါ်ထွန်းတော်မူသောအခါ၊ ငါတို့သည် ကိုယ်တော်နှင့် တူကြလတံ့ဟု ငါတို့သိကြ၏။” (၁ယော ၁၃: ၂)
ကိုယ်တော်နဲ့ တူကြမယ်။ ဒီထက်ပိုပြီး ဘာလိုဦးမလဲ။ ကိုယ်တော်ကိုလည်း မြင်ရဦးမှာမို့ တောင့်တစရာ တခြားမရှိတော့ဘူး။ ဒါဟာ ယုံကြည်သူရဲ့ မင်္ဂလာရှိသော မြော်လင့်ရာဖြစ်တယ်။ အထူးသဖြင့် ယခု နောက်ဆုံးသော ကာလရှိ ယုံကြည်သူတွေအတွက် မင်္ဂလာရှိသော မြော်လင့်ရာ ဖြစ်တယ်။ ပြောင်းလဲခြင်းသို့ရောက်ပြီး၊ သေခြင်းကို မကြံုရတော့ဘဲ ချီဆောင်ခံရတဲ့ ထူးမြတ်လှတဲ့ အဖြစ်အပျက်ကို တွေ့ကြုံ ခံစားရတော့မယ်။ (၁သက် ၄: ၁၆-၁၇) ရှင်ပေါလုလို မြော်လင့်ခြင်းနဲ့ “ငါတို့အား ပေါ်ထွန်းလတံ့သော ဘုန်းကိုထောက်သော်၊ ယခုမျက်မှောက်ကာလ၌ ခံရသော ဆင်းရဲဒုက္ခကို ပမာဏ မပြုထိုက်ဟု ငါသဘောရှိ၏။”  လို့ ပြောနိုင်ပြီလား။ (ရော ၈: ၁၈) ယောဘက ယုံကြည်ခြင်းအားဖြင့် အဲဒီအရာကို မြင်ခဲ့သလို၊ ဒါဝိဒ်ကလည်း “အကျွနု်ပ်မူကား၊ ဖြောင့်မတ်၍ မျက်နှာတော်ကို ဖူးမြင်ရပါလိမ့်မည်။ နိုးသောအခါ ပုံသဏ္ဍာန်တော်အားဖြင့် အကျွနု်ပ်အလို ပြည့်စုံရပါလိမ့်မည်။”  လို့ ကြိုမြင်ခဲ့တယ်။  “ဘုရားသခင်ကို မြင်မည်” ဆိုတဲ့ ဘုန်းအသရေဟာ ဘုရားသခင်ရဲ့ လူတွေကို စောင့်ကြိုနေတယ်။ အဲဒီနေ့အထိ အမှုတော်ဆောင်ကြပါစို့။
 ဆုတောင်း ။        ။ အံ့ဖွယ် ဂတိတော်တွေအပေါ် ယုံကြည်ခြင်း တိုးပွားလာစေပါ၊ သခင်ဘုရား။

21
 မြေ နှင့် မျိုးစေ့
"These have no root." Luke 8: 13.
ဆာလံ ၁။ လုကာ ၈: ၉ - ၁၈။
အို ငါ့ဝိညာဉ်၊ နှုတ်ကပတ်တော်အားဖြင့် ကိုယ်ကိုကိုယ် ပြန်ဆန်းစစ်ပါ။ တရားစကားကို ဝမ်းမြောက်စွာ ခံယူတယ်။ စိတ်လှုပ်ရှားတယ်။ စိတ်စွဲလန်းတယ်။ ဒါပေမယ့် တရားစကားကို ကြားတာက တပိုင်း၊ သခင်ယေရှုကို စိတ်ဝိညာဉ်ထဲ ခံယူတာက တပိုင်းဖြစ်တယ်။ အကြီးအကျယ် စိတ်လှုပ်ရှားတာက မာကြောတဲ့ နှလုံးသားထဲမှာလည်း မကြာခဏ ဖြစ်တတ်ပါတယ်။ စိတ်စွဲလန်းတာဟာ အစဉ် တည်မြဲတဲ့အရာ မဟုတ်ပါဘူး။
မြေဆီနည်းတဲ့ ကျောက်ပေါ်မှာ ကျတဲ့ မျိုးစေ့ဟာ အမြစ်ထွက်ပေမယ့်၊ အောက်ကို အမြစ်ဆက်ထိုးဖို့ မဖြစ်နိုင်ဘူး။ အထက်ကို အပင် ခဏလောက် ကြီးလာပေမယ့်၊ အမြစ်ကို ပြုစုမယ့် အစိုဓါတ်မရှိတော့၊ ညှိုးနွမ်းရတယ်။ အဲဒီလို ဖြစ်နေသလား။ အတွင်းမှာ အသက်မပါဘဲ၊ ကိုယ်ခန္ဓာမှာသာ ဟန်ပြ ဖြစ်နေသလား။ သန်သန်မာမာ ကြီးထွားတယ်ဆိုတာ အထက်ရော၊ အောက်ပါ ဖြစ်ရတယ်။ အပြင်ပိုင်း ရိုသေကိုင်းရှိုင်းတာဟာ အတွင်းသဘော သစ္စာရှိတာနဲ့ သခင်ဘုရားကို ချစ်ခြင်းမှာ အမြစ်တည် ရပါတယ်။
ခရစ်ယာန် အပြုအမူဟာ ဘုရားသခင်ရဲ့ ကျေးဇူးတော်ကြောင့် စိတ်နှလုံးရဲ့ နူးညံ့သိမ်မွေ့မှုကို ရောင်ပြန်ဟပ် နေရမယ်။ ဝိညာဉ် ကြီးထွားဖို့လည်း မြေဩဇာကျွေးနေရမယ်။ ကျိုးပဲ့ကြေမွခြင်း မရှိ၊ ကျောက်သားလို မာကြောတဲ့၊  မသန့်ရှင်းတဲ့ စိတ်နှလုံးဟာ ဘုရားသခင်ရဲ့ တရားစကားမျိုးစေ့ကို ရှင်သန်ကြီးထွားခွင့် မပြုဘူး။ အပြင်ပိုင်း ဘုရားဝတ် မွေ့လျော်တာ အလျင်အမြန် ကြီးထွားနေရင် အတွင်းမှာပါ ကြီးထွားသလား။ သန့်ရှင်းသော ဝိညာဉ်တော်ရဲ့ အတွင်း လုပ်ဆောင်မှု ရှိသလားလို့ စိုးရိမ်စွာနဲ့ အရေးတကြီး မေးစရာရှိလာပါတယ်။
စိတ်နှလုံးထဲမှာ ဘုရားသခင်ရဲ့ စကားတော်ကောင်းသောမျိုးစေ့ဟာ သန့်ရှင်းသောဝိညာဉ်တော်ရဲ့ လုံလောက်တဲ့ မစမှုခံရမှ ရှင်သန်ကြီးထွားလာမယ်၊ အဆုံးမှာ အသီးသီးလာမယ်။ ဘုရားသခင်ရဲ့ ဝိညာဉ်တော်ကသာ စိတ်နှလုံးမြေသား ကြီးထွားလာဖို့ ခံယူတတ်တဲ့သဘော၊ အစိုဓါတ်နဲ့ မြေဩဇာတွေကို ပြုပြင်ပေးနိုင်တယ်။ ဝိညာဉ်တော် ရေလောင်းပေးမှ၊ မြေပြုပြင်ပေးမှသာ ညှင်းဆဲခြင်းနဲ့ လှောင်ပြောင်ခြင်း၊ လေပြင်းမုန်တိုင်းတွေ၊ စုံစမ်းနှောက်ယှက်ခြင်း အပူဒဏ်တွေကို ကြံ့ကြံ့ ခံရပ်နိုင်လိမ့်မယ်။ မျိုးစေ့ကောင်းအတွက် မြေကောင်းကောင်း ဖြစ်နေဖို့ လိုပါတယ်။
ဆုတောင်း။             ။ ကောင်းသောမျိုးစေ့ကြဲသူ အဘ၊ အကျွနု်ပ်စိတ်နှလုံးမြေကို ထွန်ယက်ပြီး၊ အထဲမှာ သမ္မာတရားကို အောင်မြင် ဖြစ်ထွန်းစေတော်မူပါ။

22
 ငါတို့အဖို့  ဆုတောင်းသောသူ
"I have prayed for thee." Luke 22: 32.
တရားဟော ၃၃: ၂၆ ၊ ၂၇ ။ လုကာ ၂၂:၂၄ - ၃၄
ရွေးနှုတ်တဲ့သခင်က မခြားမလပ် ဆုတောင်းပေးနေတာဟာ သိပ်အားရစရာကောင်းတဲ့ အချက်ဖြစ်ပါတယ်။ ကျွန်တော်တို့ ဆုတောင်းချိန်မှာ၊ ကိုယ်တော် တောင်းပန်ပေးနေတယ်။ ကျွန်တော်တို့ ဆုမတောင်းမိတဲ့ အချိန်မှာလည်း ကိုယ်တော် မမေ့ပါဘူး။။ ကျွန်တော်တို့ရဲ့ အခက်အခဲကို ဆက်လက် ဆောင်ရွက်ပေးနေတယ်။ ဒါကြောင့် လူတယောက်ဟာ သခင်ယေရှုအားဖြင့် ဘုရားသခင်အထံတော်ကို ချဉ်းကပ်တယ်။ “ထိုသူတို့၏ အမှုကို ကိုယ်တော်သည်စောင့်လျှက်၊ ကာလအစဉ် အသက်ရှင်သောကြောင့်၊ သူတို့ကို အစဉ် ကယ်တင်ခြင်းငှါ တတ်နိုင်တော်မူ၏။“ (ဟေဗြဲ ရး၂၅ ) အဲဒီလို ကိုယ်တော် စောင့်ထိန်းပေးနေလို့ လုံခြုံမှု အပြည့်ရှိပါတယ်။
ဒီအချက်ဟာ သခင်ဘုရား လုပ်နေတဲ့ အလုပ်တွေရဲ့ တစ်စိတ်တပိုင်း ဖြစ်ပါတယ်။ မစမှုလိုနေသူတွေက ဘုရားစကား ခဏခဏ ကြားရဖို့ လိုတယ်၊ ဒုက္ခရောက်နေသူတွေ၊ စွန့်ပစ်ခံရပြီလို့ ခံစားနေရသူတွေ၊ ကြိုးစား အလုပ် လုပ်နေတဲ့ သန့်ရှင်းသူတွေနဲ့၊ စိတ်ပျက်အားလျော့နေသူတွေကို စိတ်သက်သာရာရစေဖို့လည်း လိုအပ်နေပါတယ်။
ကိုယ်တော်က ပေတရုကို “ရှိမုန်၊ ရှိမုန်၊ ဂျုံဆန်ကို ဆန်ခါနှင့် ချသကဲ့သို့၊ စာတန်သည် သင်တို့ကို ချရမည့်အကြောင်း အခွင့်တောင်းသည်ဖြစ်၍ . . . . ”  ဒီနေရာမှာ တွေ့ကြုံလာတော့မယ့် မာရ်နတ်ရဲ့ နှောက်ယှက် တိုက်ခိုက်မှုတွေကို ကြိုတင်သတိပေးတော်မူတာကို တွေ့ရတယ်။ “ . . . . သင်၏ ယုံကြည်သော စိတ်မပျက်စေခြင်းငှါ ငါသည် သင့်အဖို့ ဆုတောင်းလေပြီ။”
ဟာလေလုယာ။ မမြင်ရတဲ့ ဘေးအန္တရာယ်နဲ့ တိုက်ခိုက်မှုတွေကို ဆုတောင်းပြီး၊ ကာကွယ်ပေးတဲ့ ကယ်တင်ရှင်ပါလား။ အခုအချိန်မှာ ဘုရားသခင်ရဲ့ လင်္ကျာတော်ဘက် အလွန်မြင့်မြတ်တဲ့ နေရာမှာထိုင်ပြီး၊ ကျွန်တော်တို့ အတွက် မခြားမလပ် ဆုတောင်းပေးနေတယ်။ ယုံကြည်သူ စိတ်မပျက်ဖို့လည်း ဆုတောင်းပေးနေတယ်။ ငြိမ်သက်စွာ မနေဘဲ၊ သံချက်ရာကိုဆောင်ပြီး၊ ခမည်းတော်ရှေ့မှာ ကျွန်တော်တို့အတွက် တောင်းပန်ပေးနေလို့ ကျေးဇူးတော် ချီးမွမ်း သင့်ပါတယ်။ ပေတရုကိစ္စမှာ ကယ်တင်ရှင်က စာတန်ကို လက်ဦးမှု ရထားတာတွေ့ရတယ်။ လှည့်စားတတ်တဲ့ ရန်သူရဲ့ဆန္ဒဟာ သစ်ရွက်အောက်မှာ ရှိလောက်အောင်ပင် သေးငယ်နေပါစေ။ ကိုယ်တော် စစ်ဆေးတော်မူတယ်။
ဒီနှစ်တွေထဲမှာ ကိုယ့်ရဲ့ ယုံကြည်ခြင်း တည်မြဲနေတာကို အံ့ဩမိသလား။ ကိုယ်တော်က ကျွန်တော်တို့ အခြေအနေကို စောင့်ကြည့်ပြီး၊ အမြဲ ဆုတောင်းပေးနေလို့ ဖြစ်ပါတယ်။ (ရောမ ၈: ၃၄)
ဆုတောင်း ။             ။ သခင်ယေရှုဘုရား၊ မမြင်ရတဲ့ ရန်သူဘေးမှ တောင်းပန်ပေးလို့၊ သူတို့ရဲ့ အဓမ္မအကြံကို တားဆီးပြီး၊ မြူဆွယ်တဲ့ ထောင်ချောက်တွေနဲ့ သူတို့ကို ပြန်တွေ့စေလို့ ကျေးဇူးတင်ပါတယ်။

23
 သင်တို့သည်လည်း ခရစ်တော်အဘို့ဖြစ်ကြ၏. .
"Ye are Christ's." 1 Cor 3: 23.
ဆာလံ ၁၁၆။  ၁ ကော ၃: ၁၆ -၂၃
ရှင်ပေါလုပြောတဲ့ “သင်တို့သည်လည်း၊ ခရစ်တော်အဖို့ ဖြစ်ကြ၏။”  ဆိုတဲ့ အချက်ကို သတိရ ဆင်ခြင်ကြပါစို့။ ကျွန်တော်တို့ ကိုယ်ကိုကိုယ် မပိုင်ကြဘူး။ ကြီးမြတ်တဲ့ ဘုရားသခင်၊ ကယ်တင်ရှင် ယေရှုခရစ်ကသာ ပိုင်တယ်။
ပေးသနားတော်မူခြင်းအားဖြင့် ။            ။ ခမည်းတော်က ကျွန်တော်တို့အား သားတော်ကို ပေးတယ်။ သားတော်ကြောင့် ကျွန်တော်တို့ဟာ ကိုယ်တော်ရဲ့ လူဖြစ်လာရတယ်။
ဝယ်ယူတော်မူခြင်းအားဖြင့် ။             ။ ကျွန်တော်တို့ကို ရွေးနှုတ်ဖို့ အဖိုးအခအဖြစ် ကာရာနီ၊ လက်ဝါးကားတိုင်မှာ အသွေးတော် သွန်းလောင်းပေးခဲ့လို့ ကိုယ်တော်လူတွေ ဖြစ်လာကြတယ်။
ဆက်ကပ်မှုအားဖြင့် ။            ။ ကိုယ်ကိုကိုယ် ဆက်ကပ်ခြင်းအားဖြင့်လည်း ကိုယ်တော်ရဲ့ လူတွေ ဖြစ်လာတယ်။
တော်စပ်မှုအားဖြင့် ။           ။ နာမတော်ကို စွဲကိုင်လို့ ကိုယ်တော်ရဲ့ ညီနဲ့၊ အမွေဆက်ခံတဲ့ ကိုယ်တော်ရဲ့ လူတွေ ဖြစ်လာကြတယ်။
ချစ်သောစာရှုသူ၊ သင့်ကို သခင်ခရစ်တော်က ပိုင်ကြောင်း လောကီသားတွေကို ကြိုးစားပြသပါ။ အပြစ် သွေးဆောင်လာတိုင်း၊ ကျွန်တော်က ခရစ်တော်အတွက်ဖြစ်လို့ “အပြစ်ကြီးသော ဤအမှုကို မပြုနိုင်ပါ။”  လို့ တုန့်ပြန်ပါ။ ဒုစရိုက်ကြောင့် ရမယ့် စည်းစိမ်တွေ၊ သင့်ရှေ့မှာ ပုံထားပေမယ့်၊ လက်နှင့်မျှ မတို့နဲ့။ အန္တရာယ် အခက်အခဲတွေ ကြုံနေသလား။ တည်ကြည်မြဲမြံပါ။ သင်ဟာ ခရစ်တော်အတွက် ဖြစ်တယ်မဟုတ်လား။ သင့်ကို ဝန်းရံနေတဲ့ အရာတွေဟာ အချည်းအနှီးဖြစ်ပြီး၊ သင့်ကို ဘယ်လိုမှ မလုပ်နိုင်ဘူး။ “ငါဟာ ခရစ်တော်အဘို့ ဖြစ်တဲ့အတွက်၊ ငါဟာ သခင်ရဲ့ အမှုတော်ဆောင်သာ ဖြစ်ရမယ်။” လို့ ပြောလိုက်ပါ။ ကိုယ်တော်အတွက် အမှုစောင့်ကြပါစို့။
လောကီသီချင်းများရဲ့ ဆွဲဆောင်မှုကို ခံရတဲ့အခါ - “လောကရဲ့ မြူးကြွတဲ့ သီချင်းတွေက ငါ့ကို မဖမ်းစားနိုင်ဘူး။ ငါ့ကို ခရစ်တော်ဘုရားကသာ ပိုင်တယ်။” လို့ ပြောလိုက်ပါ။ သခင်ဘုရားအတွက် လုပ်ဆောင်စရာ များစွာရှိနေပါတယ်။ အမှုတော်အတွက် ခေါ်တဲ့အခါ ထိမ်ဝှက်မထားဘဲ အပ်ပေးရမှာပါ။ ခရစ်တော် သင့်ကို အောင်ခဲ့ပြီ။ သင်ဟာ ခရစ်တော်အဖို့ ဖြစ်တဲ့အတွက်၊ ကိုယ်တော် အလိုရှိသမျှ သင်ပေးရမယ်။ စကားပြောခြင်း၊ ကျင့်ကြံပြုမူခြင်း၊ ပေါင်းသင်းဆက်ဆံခြင်းနဲ့ အသက်တာ တခုလုံးဟာ သခင်ဘုရားအတွက် ဖြစ်ပါစေ။ သင့်ကို ကိုယ်တော် ပိုင်ပါတယ်။
သင့်ကို တွေ့မြင်သမျှသူတွေကို သင်ဟာ လောကီဆန်သူမဟုတ်။ ခရစ်တော်အဘို့သာ ဖြစ်ကြောင်းသိစေဖို့၊ အရာရာ၌ ကောင်းကင်ရနံ့သဖွယ် ဖြစ်နေပါစေ။ ကောင်းသော အကျင့်ကျင့်ခြင်း၊ ကိုယ်အကျိုးမရှာဘဲ သူတပါးကိုချစ်ခြင်း၊ ကိုယ်တော်ရဲ့ သန့်ရှင်းခြင်းကို ယူတင်ဝတ်ဆောင်ခြင်းအားဖြင့် ကျွန်တော်တို့ဟာ ခရစ်တော်အဘို့ဖြစ်တာကို အများ သိကြပါစေသော။
ဆင်ခြင်ရန်။                ။ လောကမှာ နေရပေမယ့် လောကီသား မဟုတ်ပါ။
ဆုတောင်း။                ။ အို ထာဝရဘုရား၊ အစဉ် သစ္စာရှိရန် မစတော်မူပါ။

24
 တောင်ထိပ်၌ တည်သောမြို့
"I have yet to speak on God's behalf." - Job 36: 2
ယောဘ ၃၆: ၁-၃ ။  မဿဲ ၅: ၁၃-၁၈
ခရစ်ယာန်ဆိုတာ အကျင့်သီလ ထင်ပေါ်ဖို့ မကြိုးစားသင့်ဘူး။ ကိုယ်စိတ်အားကြီးတာကိုလည်း သူတပါး သတိထားလာအောင် မဆွဲဆောင်သင့်ဘူး။ တချိန်တည်းမှာပဲ၊ သူတပါးအကျိုးအတွက် ကိုယ့်တတ်တာ သိတာတွေကို လျှိုထားခြင်း ဟာလည်း အပြစ်ရှိပါတယ်။ ခရစ်ယာန်ဆိုတာ ချောက်ထဲက ရွာ မဟုတ်ဘူး။ တောင်းအောက်က မီးခွက် မဟုတ်ဘူး။ တောင်ထိပ်မှာ တည်တဲ့မြို့လို၊ မီးခုံပေါ်က ဆီမီးလို၊  အလင်းကို ရပ်နီးရပ်ဝေးမှ မြင်ရကြပါစေသော။
ဆိတ်ဆိတ်နေရချိန်နဲ့ ထိမ်ဝှက်ရချိန်တွေ ရှိတတ်ပါတယ်။ ဒါပေမယ့် ဒီအချက်ကို ကိုင်ပြီး ယုံကြည်သူအနေနဲ့ ခရစ်ယာန် သမ္မာတရားကို အချင်းချင်း မဝေငှဘဲထားရင်၊ တခြားသူတွေကို အပြစ်ပြုရုံသာမက၊ ဘုရားသခင်ကိုလည်း ပြစ်မှားရာရောက်ပါတယ်။ စိုးရိမ်သောကနဲ့ စကားနည်းတဲ့အကျင့်တွေကြောင့် ကိုယ့်ရဲ့ အလင်းကို အရောင် မမှိန်ပါစေနဲ့။ အသင်းတော်ကို ကိုယ့်ရဲ့ အသုံးမဝင်တဲ့ အရာတွေ မပေးပါနဲ့။
ကိုယ်တော်က သင့်အတွက် မရှက်ခဲ့ဘူး။ သင်က သက်သေခံမယ့် နှုတ်ကို ဘာကြောင့် ကြောက်ရွံ့ခြင်း တံဆိပ် ခပ်နှိပ်ထားသလဲ။ တံပိုးခရာလို ကျယ်ကျယ်မြည်တဲ့ ပါးစပ်မရှိရင်လည်း၊ မပီတဲ့ နှုတ်ကိုပဲ အသုံးချလိုက်ပါ။ သင့်ကို တရားပလ္လင်မှာ ဟောရမယ်လို့ မဆိုလိုဘူး။ လူတွေကို ရင်ဆိုင်ခိုင်းခြင်းသာ ဖြစ်တယ်။ ပေတရုနဲ့ ယောဟန်ကတော့ “ငါ၌ ရွှေငွေမရှိ။ ရှိသည့်အရာကို သင့်အား ငါပေးမည်။”  လို့ ဆိုကြတယ်။ (တမန်တော် ၃: ၆)
သင့်အနေနဲ့ တောင်ထိပ်ပေါ်လည်း မတက်နိုင်။ တရားဟောဖို့ ပလ္လင်ပေါ်လည်း မတက်နိုင်ဘဲ ဖြစ်ချင်ဖြစ်မယ်။ ဒါပေမယ့် ရှုခါရေတွင်းမှ ရှမာရိမိန်းမလိုလူတွေ အများကြီး ရှိပါတယ်။ (ယော ၄: ၄-၁၄) ကယ်တင်ရှင်အကြောင်း ပြောဖို့ အိမ်၊ အလုပ်ခွင်တွေမှာ အခွင့်အခါ ပေါပါတယ်။ သခင်ဘုရားပေးတဲ့ အသက်ရေကို တခြားသူတွေကိုလည်း ဝေငှ ပေးပါ။
ကိုယ်ကူညီရမယ့် သူတွေရဲ့ လိုအပ်မှုအတွက် ဆုတောင်းပါ။ အစွမ်းအစကို ဝှက်မထားနဲ့။ ပညာရှိစွာ ပြုမူခြင်းဖြင့် သခင်ဘုရားကို မြည်းစမ်းလာစေပါ။ ကိုယ်သက်သေခံတဲ့အတွက် ကိုယ်လည်း ခွန်အားရသလို၊ သန့်ရှင်းသူတွေကိုလည်း ဝမ်းမြောက်စေတယ်။ အပြစ်သားတွေကို ကောင်းကြီး ဝေမျှနေတာ ဖြစ်သလို၊ ကယ်တင်ရှင်ကို ချီးမြောက်တာလည်း ဖြစ်တယ်။ သင်ဟာ တောင်ထိပ်ပေါ်မှာ တည်တဲ့ ဘုရားသခင်ရဲ့ မြို့တော်ဖြစ်ပါတယ်။
ဆင်ခြင်ရန် ။             ။ စကားအတဲ့ ကလေးတွေဟာ မိဘဝမ်းနည်းစရာအကြောင်း ဖြစ်တယ်။
ဆုတောင်း ။             ။ ကိုယ်တော့်ဘုန်းတော်အတွက် အကျွန်ုပ်ကို နှုတ်လျှာ သွက်လက်စေပါ။

25
ထာဝရဘုရားသည် သင်ပြုသောအမှုကိုဖျက်တော်မူပြီ . .
"Jehoshaphat made ships of Tharshish to go to Ophir for gold: but they went not; for the ships were broken at Ezion-geber." - 1 Kings 22: 48.
၆ရာ ၂၀: ၃၁ -၃၇။ မဿဲ ရး ၂၁ -၂၇
ရှောလမုန်ရဲ့သင်္ဘောတွေ ဘေးကင်းစွာ ပြန်ရောက်ပေမယ့်၊ ယောရှဖက်ရဲ့သင်္ဘောတွေကတော့ ရွှေရှိရာကို ဘယ်တော့မှ မရောက်တော့ဘူး။ နေရာတူ၊ လုပ်ငန်းတူပေမယ့် တယောက်ကို မစပြီး၊ တယောက်ကိုတော့ စိတ်ပျက်စေတယ်။ ဒါပေမယ့် အားလုံးကိုအစိုးရတဲ့ အရှင်ဟာ တရားပြီး၊ အစဉ်ကောင်းမြတ်တော်မူတယ်။ ပညာနဲ့လည်း ပြည့်စုံတယ်။ ဒါကြောင့် အောင်မြင်မှုအတွက် ကျေးဇူးတော်ချီးမွမ်းသလို၊ ဆုံးရှုံးမှုအတွက်လည်း ကိုယ်တော်ကို ကောင်းကြီးပေးရမယ်။ သူတပါး အောင်မြင်ရင် မနာလို မဖြစ်နဲ့၊ ကိုယ် ဆုံးရှုံးရင်လည်း မညည်းတွားနဲ့။ အကြံအစည်တွေ စိတ်ပျက်လက်ပျက် အဆုံးသတ်ရပေမယ့်၊ ဘုရားအမြင်မှာတော့ ကျွန်တော်တို့အတွက် တန်ဖိုးရှိတဲ့ ဖြစ်ရပ်တခုပါ။
ယောရှဖက် ဘာကြောင့် ဆုံးရှုံးရသလဲလို့ အံ့ဩနေသလား။ ဒီအမေးအတွက် အဖြေဟာ ဘုရားသားတွေ ဒုက္ခ တွေ့ကြုံရတဲ့ အကြောင်းရင်းမှာ ပါတယ်။ ယောရှဖက်ဟာ ဒုစရိုက်ပြုတဲ့ မိသားစုနဲ့ မိသဟာဖွဲ့တယ်။ ထာဝရဘုရားက ပရောဖက်တဦးကို စေလွှတ်ပြီး၊  “မင်းကြီးသည် အာခဇိနှင့် ပေါင်းဘော်သောကြောင့်၊ ထာဝရဘုရားသည်၊ မင်းကြီး ပြုသောအမှုကို ဖျက်တော်ပြီ။” လို့ သတိပေးတယ်။ (၃ ရာ ၂၂: ၄၉) မှာ တွေ့ရတဲ့အတိုင်း ယောရှဖက်ဟာ အလွန် အဓမ္မအမှုပြုတဲ့ ရှင်ဘုရင်ရဲ့ ကျွန်တွေကို မိမိကျွန်တွေနဲ့အတူ သင်္ဘောစီးခွင့်ပြုတာကြောင့် ထာဝရဘုရားက ယောရှဖက်ကို ဆုံးမတယ်။
ဒီဖြစ်ရပ်အားဖြင့် ထာဝရဘုရား သွန်သင်နေပါတယ်။ ဘုရားသားတွေကို သတိပေး တားမြစ်ထားတဲ့၊ “မယုံကြည်သူနှင့် တွဲဖက်၍ ဆန့်ကျင်ဘက်ဖြစ်သော ထမ်းဘိုးကိုမထမ်းရ” ဆိုသည့် စကားတော်ကို ယောရှဖက် နားမထောင်ခဲ့ဘူး။ (၂ကော ၆: ၁၃ - ၁၈) မယုံကြည်သူနဲ့ အိမ်ထောင်ပြုခြင်း၊ စီးပွားဖက် လုပ်ဆောင်ခြင်း၊ သူတို့အကြံအစည်ထဲမှာ ပါဝင်လုပ်ဆောင်လို့ လူအများရဲ့ အသက်တာဟာ သနားစရာ ကောင်းတယ်။ နောက်တော်သို့ လုံးလုံးလိုက်ကာ၊ ညှိုးနွမ်း ညစ်စွန်းခြင်းကင်းစွာ၊ အပြစ်သားတွေထံမှ သီးခြားနေပြီး၊ သခင်ယေရှုကို သစ္စာရှိစွာ ချစ်ကြပါစို့။ ဒီလို နေဖို့ ခက်သလား။ သီးခြားမနေရင် ယောရှဖက်လမ်းအတိုင်း လိုက်ရလိမ့်မယ်။  အဆုံးမှာလည်း ဝမ်းနည်းစွာနဲ့ “ထာဝရဘုရားသည် သင်ပြုသောအမှုကို ဖျက်တော်မူပြီ” လို့ အပြောခံရလိမ့်မယ်။
ဆင်ခြင်ရန်။         ။ သူတပါးအမှားကနေ သင်ခန်းစာယူရင်၊ တန်ဖိုးအနည်းဆုံး၊ ဒုက္ခ အကင်းဆုံးဖြစ်တယ်။

26
 ရေကူးတဲ့ ပုဆိန်
"The iron did swim." 2 Kings 6: 6.
၄ရာ ၆: ၁-၇။ မဿဲ ၁၇: ၂၄-၂၇။
ယော်ဒန်မြစ်ထဲ ပုဆိန်ကျသွားပြီ။ မြော်လင့်စရာ လုံးဝမရှိဘူးလို့ ထင်စရာပါ။ ဒီပုဆိန်က ငှါးထားတဲ့ ပုဆိန်။ ဧလိရှဲရဲ့ ပရောဖက်တွေအဖို့ ထာဝရဘုရားရဲ့ နာမတော်အတွက်လည်း ပြောစရာဖြစ်လာပြီ။ ဒါပေမယ့် လူ့ဒုက္ခဟာ ဘုရားအတွက် အခွင့်အခါကောင်း ဖြစ်ပါတယ်။ ဘုရားသခင်ဟာ လောကဓါတ်ရဲ့အရှင်၊ အရာအားလုံးကို ဖန်ဆင်းတဲ့ သခင်ဖြစ်တော်မူတယ်။ ကိုယ်တော်တပါးတည်းသာလျှင် မြေဆွဲအားကို ဆန့်ကျင်ပြီး၊ ပုဆိန်ကို ပေါလောပေါ်စေနိုင်တယ်။ “ဘုရားသခင်သည် ခပ်သိမ်းသောအမှုတို့ကို တတ်နိုင်တော်မူသည်။” ဆိုတဲ့ စကားတော်ကို သတိရကြပါစို့။ (မာကု ၁၀: ၂၇)
ခရစ်ယာန်တယောက်၊ သူ့အစွမ်းနဲ့ မမျှတဲ့ တာဝန်တခုကို ရင်ဆိုင်ခဲ့ရတယ်။ ကြိုးစားလုပ်ဖို့ ကြံစည်တာကိုပဲ သူတပါး လှောင်ပြောင်စရာဖြစ်ခဲ့တယ်။ ဒါပေမယ့် သူက ဂရုမထားဘူး။ ထာဝရဘုရားကို ယုံကြည်ခြင်းအားဖြင့် မနိုင်ဝန်ကို ထမ်းပြခဲ့တယ်။ သူရဲ့ ယုံကြည်ခြင်းကို ဘုရားသခင်ချီးမြောက်ပြီး၊မမြော်လင့်တဲ့မ,စမှုကို ပေးသနားခဲ့တယ်။ “ပုဆိန် ပေါလောပေါ်ပြီပေါ့။” တခြားတယောက်မှာလည်း ဝမ်းနည်းစရာ ဆင်းရဲကြပ်တည်းမှုနဲ့ ကြံုရတယ်။ အပေါင်းအသင်းတွေက ပစ်သွားပြီ။ ဒါပေမယ့်လည်း အစဉ်မစတော်မူတဲ့ ဘုရားသခင်ထံ ယုံကြည် တိုးဝင်တဲ့အခါ ဒုက္ခတွေ လွင့်ပျောက်သွားတယ်။ ခြေလှမ်းသစ်တွေ တိုးချဲ့လာနိုင်တယ်။ “ပုဆိန် ပေါလောပေါ်ပြီပေါ့။”
တတိယအဖြစ်အပျက်တခုက ကိုယ်ကျင့်တရား ကျူးလွန်တဲ့ ဝမ်းနည်းဖွယ် ဖြစ်ရပ်တခုပါ။ အမျိုးမျိုး အပြစ်တင်ပြောဆို၊ သတိပေး၊ ဆွဲဆောင်၊ တောင်းပန်ပေမယ့် မရ။ လူဟောင်းအာဒံဟာ လူငယ်လေး "မက်လင်သွန်" Melancthon အပေါ်မှာ အားကြီးလွန်းပါတယ်။ စကား နားမထောင်သူမို့ စိတ်လည်လာမှာ မဟုတ်ဘူးလို့ ထင်ရတယ်။ ကြေကွဲစွာ ဆုတောင်းလို့၊ အပြင်းအထန် တောင်းပန်လို့ ကောင်းကြီးပေးတဲ့အဖြေကို ရလာတယ်။ နောက်ဆုံးမှာ မာကျောတဲ့ နှလုံးသား နူးညံ့လာပြီး၊ “ပုဆိန်ပေါလော ပေါ်လာတယ်။” (မက်လင်သွန်ဟာ နောက်ပိုင်းမှာ မာတင်လူသာရဲ့ လုပ်ဆောင်ဖက်နဲ့ ပထမဦးဆုံး ပရိုတက်စတင့် ဓမ္မပညာရှင် ဖြစ်လာပါတယ်။ - ဘာသာပြန်သူ)
ဘယ်လိုဝန်ထုပ်တွေကို လက်လျော့ထားနေသလဲ။ ပရောဖက်တွေရဲ့ ဘုရားသခင်ထံ ယူလာပါ။ ချန်မထားနဲ့။ သန့်ရှင်းသူတွေကို မစဖို့ရာ ဘုရားသခင်အသက်ရှင်ပါတယ်။ ကောင်းကင်ဗိုလ်ခြေအရှင် ထာဝရဘုရားကိုသာ ကိုးစားပါ။ သခင်ယေရှုရဲ့မြတ်နာမကို ဆုတောင်းရင်၊ဘုရားသခင်ပြတဲ့ အံ့ဖွယ်တန်ခိုးတော်တွေကို မြင်ရလိမ့်မယ်။ ယုံကြည်စွာနဲ့ တိုးဝင်ချဉ်းကပ်ပါ။ ဘုန်းတော်ထင်ရှားလာပြီး၊ “ပုဆိန်ပေါလောပေါ်ပြန်ပြီ” ဆိုတဲ့ အဖြစ်ကို ကြုံရလိမ့်မယ်။ ဘုရားသခင်ဟာ အံ့ဩဖွယ်တွေကို ပြုတော်မူတဲ့ဘုရားပါ။
ဆင်ခြင်ရန် ။  ။ ဘုရားသခင် မတတ်နိုင်တဲ့ အရာမရှိပါ။

27
 ကယ်တင်ခြင်းငှါ တန်ခိုးကြီးသောထာဝရဘုရား
ဟေရှာယ ၆၃: ၁။ ရောမ ၁: ၁၆ - ၃၂။
"Mighty to save." - Isa 63:1.
“ကယ်တင်ခြင်းငှါ” ဆိုတဲ့ ဝေါဟာရအားဖြင့် ကယ်တင်ခြင်း အမှုတော်ကြီး တခုလုံးကို ရှေ့မဆွသန့်ရှင်းတဲ့ အလိုတော်ကနေ၊ စုံလင်တဲ့သန့်ရှင်းခြင်းသို့ ရောက်သည့်တိုင်အောင် နားလည်ခွင့်ရနိုင်တယ်။ ခရစ်တော်ဘုရားဟာ နောင်တရသူကို ကယ်တင်ဖို့ တန်ခိုးကြီးရုံမျှမက၊ နောင်တရလာအောင်လည်း တတ်နိုင်တယ်။ ယုံကြည်သူကို ကောင်းကင်သို့တိုင် ပို့ဆောင်တော်မူတယ်။ လူတွေကို နှလုံးသားအသစ် ပေးဖို့၊ ယုံကြည်ခြင်းနဲ့ သူတို့အထဲမှာ အလုပ်လုပ်ဖို့၊ သန့်ရှင်းခြင်းကို မုန်းတဲ့သူတွေပင်လျှင် အဲဒီတရားကို ချစ်တတ်လာဖို့၊ ကျောခိုင်းစွန့်ခွာသူတွေကို ရှေ့တော်မှောက် ဒူးထောက် လာစေဖို့၊ ကိုယ်တော် တန်ခိုးကြီးတော်မူတယ်။
ဘုရားသခင်ပြုခဲ့သမျှတွေမှာ ဘုရားတန်ခိုးတော်ကို သိမြင်ခွင့် ရနိုင်တယ်။ ယုံကြည်သူရဲ့ အသက်တာသည်ပင်လျှင်၊ တန်ခိုးကြီးတဲ့ ဘုရားသခင် ပြုတော်မူတဲ့ အံ့ဩဘွယ် နမိတ်လက္ခဏာတွေပဲ ဖြစ်တယ်။ ကိုယ်တော့်လူတွေကို သန့်ရှင်းစေဖို့၊ သန့်ရှင်းခြင်းကို စောင်မမြဲမြံစေဖို့ တန်ခိုးကြီးတော်မူတယ်။ ဒါထက်မက သူတို့ခံစားရတဲ့ ထာဝရကယ်တင်ခြင်းကို ကောင်းကင်မှာ ပြည့်စုံစေတဲ့တိုင်အောင် သူတို့ကို တည်ကြည်ခိုင်ခံ့စေလိမ့်မယ်။ ခရစ်တော်ရဲ့ ကယ်တင်တဲ့ တန်ခိုးတော်ဟာ ယုံကြည်သူဖြစ်ဖို့ ကြိုးစားတာမျိုး၊ ကိုယ်ကိုကိုယ် ဆက်လက်စောင့်ထိန်းဖို့ ပစ်ထားတာမျိုး မဟုတ်ဘူး။ ဒါပေမယ့် ကောင်းတဲ့အမှုကို ပြုစ ပြုတော်မူတဲ့ကိုယ်တော်ဟာ အဆုံးတိုင်အောင်ပြီးစီးလျှက် ပြုတော်မူပါလိမ့်မယ်။ ( ဖိလိပ္ပိ ၁: ၆) ကယ်တင်ရှင်ဟာ ကယ်တင်ဖို့ရာတန်ခိုးကြီးပါတယ်။
သေနေတဲ့ ဝိညာဉ်ထဲကို အသက်သွင်းပေးမယ်၊ အဲဒီအသက်မြဲမြံအောင် မစတော်မူမယ်။ ပြုမိတဲ့ အပြစ်တွေကြားမှာပဲ အသက်ကို ခွန်အားနဲ့ ပြည့်နေစေမယ်။ ကျေးဇူးတော်နဲ့ သန့်ရှင်းခြင်းမှာ ဆက်လက် ကြီးပွားစေမယ်။ နောက်ဆုံး ဒီကမ္ဘာမှ ခွါပြီး၊ ဘုန်းတော်ဝင်စားချိန် စုံလင်သည်အထိ ပြုတော်မူသမျှကို ဆင်ခြင်ကြည့်ပါ။ ဒီလိုပြုနိုင်ရုံမက ဒီထက်မကပြုတော်မူဖို့ ဘုရားသခင် တန်ခိုးကြီးပါတယ်။ တယောက်ယောက်အတွက် သင် ဆုတောင်းနေသလား။ စိတ်ပျက်မသွားနဲ့။ လက်မလျှော့နဲ့။ ထာဝရဘုရားက ကယ်တင်ဖို့ တန်ခိုးကြီးတယ်။ တန်ခိုးတော် လက်ရုံးအပေါ်မှာ ခိုလှုံကိုးစားပါ။ ပြဿနာတွေက နှောက်ယှက်နေသလား။ မစိုးရိမ်ပါနဲ့။ ကိုယ်တော့်ကျေးဇူးဟာ သင့်အဖို့ လောက်ပါတယ်။ ကယ်တင်စပြုဖို့၊ ဆက်လက်ပြုစုဖို့၊ နောက်ဆုံးစုံလင်ခြင်းသို့ ရောက်ဖို့၊ ထာဝရဘုရားတန်ခိုးကြီးပါတယ်။ တန်ခိုးတော်ကြီးမားကြောင်း အကောင်းဆုံးသက်သေကတော့ သင့်ကို ကယ်တင်ခဲ့တာပဲ ဖြစ်ပါတယ်။ ဒီထက်မက လူအများကြီးကို ကယ်တင်ဖို့လည်း ကိုယ်တော်မှာ ကြီးမားတဲ့ တန်ခိုးတော်ရှိပါတယ်။
မေးခွန်း။      ။ ထာဝရဘုရား မတတ်နိုင်သောအရာရှိသလား။
ဆုတောင်း။     ။ အားလျော့စိတ်ပျက်ခြင်းမရှိဘဲ၊ ကိုယ်တော်ကိုကိုးစားဖို့ ယုံကြည်ခြင်းကိုတိုးပွားစေပါ အဘ။

28
 ထာဝရဘုရားထံသို့ . . . အော်ဟစ်သောအခါ . .
ဆာလံ ၃။ မဿဲ ၁၄: ၂၂ - ၃၃။
"Beginning to sink, he cried, saying, Lord, save me." - Matt 14: 30.
“နစ်မြုပ်ချိန်ဟာ ဆုတောင်းချိန် ဖြစ်တယ်။”
သခင်ဘုရားရဲ့ ကျွန်တွေအတွက် နစ်မြုပ်ချိန်ဟာဆုတောင်းချိန်ပါပဲ။ ပေတရုဟာ အန္တရာယ်ခရီးကို လှေစီးထွက်ခဲ့တယ်။ ဆုမတောင်းဘူး။ နစ်မြုပ်စပြုတော့ အန္တရာယ်က သူ့ကို ဘုရားထံ ဆုတောင်းလာစေတယ်။ စိတ်နဲ့ကိုယ်မှာ ဝေဒနာကြံုရင် အလိုလို ဆုတောင်းချင်လာတယ်။ အစာရှာတဲ့ မြေခွေးက ဘေးလွတ်ရာ တွင်းထဲ ပြေးဝင်တတ်သလို၊ ငှက်ကလေးတွေက တောအုပ်ထဲကို ပျံသန်းသွားတတ်တယ်။ ဒီလိုပဲ၊ ယုံကြည်သူလည်း စုံစမ်းခြင်းခံရတဲ့အခါ ကောင်းကင်ဘုံရဲ့ ကွယ်ကာရာဌာနဖြစ်တဲ့ ကျေးဇူးတော်ပလ္လင်ရင်းကို တိုးဝင်ချဉ်းကပ်ရတယ်။
“တိုတိုဆုတောင်းတာဟာအကောင်းဆုံး ဖြစ်တယ်။”
ပေတရု ဆုတောင်းရာမှာ စကားလုံး (၃) လုံးပဲ ပါတယ်။ ဒါပေမယ့် သူ့ကိစ္စအတွက် လုံလောက်ပါတယ်။ ထိရောက်တဲ့ဆုတောင်းခြင်းရဲ့ လျှို့ဝှက်ချက်က ရှည်ရှည် မတောင်းနဲ့။ ခွန်အားပါဖို့ပဲ လိုတယ်။ လိုချင်တာကိုပဲ စိတ်စွဲလန်းတာဟာ ဆု တိုတိုတောင်းတတ်ဖို့ သင်ပေးတဲ့ဆရာဖြစ်တယ်။ ဆုတောင်းရာမှာ မာနမပါတဲ့၊ အသင့်လျော်အကောင်းမြတ်ဆုံး စကားတွေသာ ဖြစ်ရမယ်။ ဆုတောင်းရင် စကားထပ်နေတာဟာ အလကားပဲ။ ဖွဲနဲ့ တူတယ်။ အဖိုးတန်အရာမှန်သမျှဟာ သေးငယ်တတ်တယ်။ ရှည်လျားတဲ့ ဆုတောင်းတွေကို ပေတရုတောင်းသလို (၃) - ခွန်း လောက်နဲ့ တောင်းလို့ရတယ်။ သာသနာပလူတွေလို အချည်းနှီးသောစကားနဲ့ အထပ်ထပ်တောင်းတာကို ရှောင်ပါ။ စကားများပေမယ့် ဘာမှ မရဘူး။ (မဿဲ ၆း ရ) လူမှာ အခက်ကြံုချိန်ဟာ ဘုရားသခင်အတွက် အခွင့်သာချိန် ဖြစ်တယ်။
ကယ်ဖို့ ဆုတောင်းသံကို သခင်ယေရှုက နားတော်နဲ့ ချက်ချင်းကြားတယ်။ နားတော်နဲ့ စိတ်နှလုံးတော်က တွဲဖက် ညီတယ်။ လက်တော်က မနှေးဘူး။ “ထာဝရဘုရားသည် ပဌာနာပြုသောသူအပေါင်း၊ သစ္စာနှင့်တကွ ပဌာနာပြုသောသူ အပေါင်းတို့၏ အနီးအပါး၌ရှိတော်မူ၏။” (ဆာလံ ၁၄၅: ၁၈ -၁၉) ဒုက္ခမြစ်ရေတွေကြားမှာ နစ်မြုပ်လုနီးပါး ဖြစ်နေသလား။ ရုန်းကန်နေရတဲ့ အသက်တာ မုန်တိုင်းတွေကြောင့် စိတ်ညစ်နေသလား။ လောကဒဏ်ကို အလူးအလဲ ခံစားနေရသလား။ ပြင်းထန်တဲ့ လှိုင်းနဲ့ လေတွေထံကနေ မျက်စိလွှဲပြီး၊ ဘုရားသခင်ကိုသာစေ့စေ့မြှော်ကြည့်ပါ။ ကိုယ်တော်သင့်အနီးနားမှာပဲ ရှိပါတယ်။ ကိုယ်တော် အနီးမှာ ရှိနေရင်ဘာမှမဆုံးရှုံးတော့ဘူး။ ကိုယ်တော်ကို အော်ဟစ်ရင် အလျှင်အမြန် အဖြေပေးတယ်။ “ထာဝရဘုရား၏ကျေးဇူးတော်ကြောင့် ချမ်းသာရပါ၏။”
ဆုတောင်း။     ။အချိန်ရှိသည်ဖြစ်စေ၊ မရှိသည်ဖြစ်စေ၊ ကြိုးစားဆုတောင်းဖို့ရာ မစတော်မူပါ။ ထာဝရဘုရား။

29
 ဂတိတော်အတိုင်း …. ပြုတော်မူပါ။
၂ရာ ရး ၁၈ -၂၉။  ၂ကော ၁: ၂၀ - ၂၂။
"Do as thou hast said." 2 Sam 7: 25.
ဘုရားဂတိတော်မှန်သမျှဟာ စက္ကူစုတ်လို လွင့်ပစ်လိုက်ရတယ်လို့ မရှိဘူး။ သုံးစေချင်လို့ ပေးထားတာပါ။ ဘုရားရဲ့ရွှေဆိုတာ ကပ်စေးနဲ့တဲ့လူရဲ့ အိပ်ကပ်ထဲက ပိုက်ဆံလို မဟုတ်ဘူး။ လူတွေသုံးဖို့ သွန်းလောင်းတဲ့ ဒင်္ဂါးပြားပါ၊ ဂတိတော်ပေးဟာ ကောင်းကြီးခံစားရဖို့ပါ။ ဂတိတော်တွေကို ထောက်ပြပြောလာတာလောက် ဘုရားသခင် နှစ်သက်တဲ့ တခြားအရာ  မရှိပါဘူး။ သားသမီးတွေက “အို၊ ထာဝရဘုရား မိန့်တော်မူသည့်အတိုင်း ပြုတော်မူပါ။” လို့ ပြောတာကို ဘုရားသခင် ကြားချင်တယ်။ ဂတိတော်ကို တောင်းခံတာဟာ ဘုရားဘုန်းတော် ထင်ရှားစေတာ ဖြစ်တယ်။
ဂတိတော်အတိုင်း ကောင်းကြီး မပေးနိုင်အောင် ဘုရားသခင် ဆင်းရဲတယ်လို့ ထင်နေသလား။ ဒါမှမဟုတ် သန့်ရှင်းခြင်းတွေ သက်ရောက်လာဖို့ ဘုရားသခင်မှာ သန့်ရှင်းခြင်း နဲနေတယ်လို့ ထင်သလား။ ဒါမှမဟုတ် သင့်အပြစ်များ ဆေးကြောဖို့ စင်ကြယ်ခြင်း နဲနေတယ်လို့ ထင်နေသလား။ ဒီလို မဖြစ်နိုင်ပါဘူး။ မိန့်တော်မူတာက  . . . “လာကြ၊ တရားစီရင်ကြကုန်အံ့။ သင်တို့အပြစ်သည် နီသောအဆင်းရှိသော်လည်း၊ မိုဃ်းပွင့်ကဲ့သို့ ဖြူလိမ့်မည်။” (ဟေရှာ ၁: ၁၈) နှုတ်ကပတ်တော်ကို ကိုင်စွဲပါ။ ကိုယ်တော်ဟာ သစ္စာနဲ့ ပြည့်စုံတယ်။ ဟုတ်မှန်တော်မူတယ်။
ခွင့်လွှတ်ခြင်းဂတိတော်ကို ယုံကြည်စွာ ကိုင်စွဲပါ။ ကျေးဇူးတော်ပလ္လင်ရင်းကို တိုးဝင်ချဉ်းကပ်ပြီး၊ “ကို်ယ်တော့် ဂတိတော်ရှိပါတယ်။ ဂတိတော်အတိုင်း ပြုတော်မူပါ။” လို့ ဆုတောင်းရင်၊ ဘုရားသခင် နှစ်သက်ပါတယ်။ ဂတိတော်တွေကို ပစ်ပယ်ရင် (သို့) သံသယဖြစ်ရင် ဘုရားကို ကဲ့ရဲ့တာပဲ။ ဒါပေမယ့် ကျေးဇူးတော်ပလ္လင်ရင်းကို အမြန် ချဉ်းကပ်ပြီးတော့ . . . “အို၊ ထာဝရဘုရား၊ အကျွန်ုပ်သည် ကိုယ်တော်၏ ဂတိတော်ကို ခံထိုက်သောသူ မဟုတ်ပါ။ သို့သော်လည်း ကိုယ်တော်သည် ထိုသို့မိန့်တော်မူပါပြီ။” လို့ ဆုတောင်းရင် လိုတာတွေကို ပေးသနားပါလိမ့်မယ်။
ဘုရားသခင်ဟာ ဘဏ်သူဌေးတဦးလိုပါပဲ။ ဘဏ်ချက်လက်မှတ်တွေ လက်ခံရတာ၊ ထုတ်ပေးရတာ ပျော်တယ်။ ချက်လက်မှတ်နဲ့ ငွေထုတ်သလို၊ ကိုယ်တော်ထံမှ ဆုထုတ်ယူကြစို့။
ဂတိတော်က မှိုမတက်ဘူး။ သံချေး မတက်ဘူး။ ဂတိတော်ကို ဆွဲထုတ်။ ရဲရဲဝံ့ဝံ့ တောင်း။ ဒါက ဘုရားသခင်အတွက် ပြသနာ မဟုတ်ဘူး။ တောင်းလိုက်စမ်းပါ။ ပေးချင်နေတာ။ တောင်းတာထက်ကို ပေးချင်နေတာ။
နေက အလင်းပေးရလို့ ပင်ပန်းမသွားဘူး။ စမ်းချောင်းကလည်း စီးဆင်းရလို့ မမောဘူး။ ဒီလိုပဲ၊ ဘုရားသခင်ကလည်း ဂတိအတိုင်း ပေးသနားရလို့ မမောပန်းပါဘူး။ ကဲ- ပလ္လင်တော်နားချဉ်းကပ်ပြီး "ဂတိတော်အတိုင်း ပေးသနားတော်မူပါ" လို့ ဆုတောင်းလိုက်စမ်းပါ။

30
 အကျွန်ုပ်မူကား ပဌာနာပြုလျှက်နေပါ၏။
ဆာလံ ၁၀၉: ၁ -  ၄။ ၂၁ - ၃၁။ မဿဲ ရ: ရ - ၁၁။
“But I give myself unto prayer.” – Psalms. 109: 4.
လိမ်ညာတဲ့ လျှာတွေက ဒါဝိဒ်ကို သိက္ခါ ချဖို့ အလုပ်ရှုပ်နေကြပေမယ့်၊ ဒါဝိဒ်က ကိုယ်ကိုကိုယ် မကာကွယ်ဘူး။ ပိုမြင့်တဲ့ အထက်ရုံးတော်ကိုပဲ အမှုတွဲတင်တယ်။ ဘုရင်မင်းမြတ်ထံ အသနားခံတယ်။ ရန်သူရဲ့ အမုန်စကားကို အကောင်းဆုံး တုန့်ပြန်နည်းက ဆုတောင်းခြင်း ဖြစ်တယ်။ ဆာလံဆရာဒါဝိဒ်က စိတ်နှလုံးအကြွင်းမဲ့၊ ဉာဏ်စွမ်းရှိသမျှ၊ ခွန်အားရှိသမျှနဲ့ ဆုတောင်းတယ်။ ဧသောထံ ပြန်လာတဲ့ ယာကုပ်လိုပဲ ဆုတောင်းခြင်းမှာ လုံးထွေးနေခဲ့တယ်။ ဒါကြောင့် ကျွန်တော်တို့လည်း ကျေးဇူးတော် ပလ္လင်ရင်းမှာ ဆုတောင်းနေသင့်ပါတယ်။
သတိပြုဖို့က - ဆုတောင်းချက် အများစုက အကျိုး မရကြဘူး။ ဘာကြောင့်လဲ။ ကိုယ့်အတွက် မပါလို့ပါ။ အရိပ်ဆိုတာ ဝတ္ထုစစ်မဟုတ်လို့၊ အစွမ်းမရှိဘူး။ ကိုယ့်အတွက်မပါပဲ ဆုတောင်းရင် ဘာအကျိုးမှ မရှိဘူး။ ဆုတောင်းတာတွေကို ပြန်လည် ဆန်းစစ်ကြစို့။ ဆုတောင်းတဲ့အခါ စိတ်နှလုံးကြေကွဲစွာ၊ စိတ်ထက်သန်စွာ၊ ဆန္ဒပြင်းပြစွာ၊ မေတ္တာစိတ်ထားနဲ့၊ သခင်ဘုရားထံမှာ တောင်းလေ့ရှိသလား။
ကောင်းကင်တံခါးတွေကို မီးစွဲစေမယ့် အမြောက်လို ပြင်းပြတဲ့ ဆုတောင်းခြင်းဟာ ကောင်းကင်တံခါးတွေကို် အမြန်ပွင့်စေလိမ့်မယ်။ ဆုတောင်းတဲ့အခါ မကြာခဏ စိတ်ပျံ့လွင့်တတ်တယ်။ အတွေးလွန်တတ်သလို၊ အဓိက အချက်ကိုလည်း စိတ်မစွဲလန်းတတ်ဘူး။ စိတ်နှလုံးက ပြဒါးလို စီးဆင်း လှည့်ပတ်နေတတ်တယ်။ ကောင်းကင်တံခါးကို ချိန်ရွယ်မယ့် အမြောက်လို ညီညွတ်မှုတန်ခိုးလည်း မရှိဘူး။ ရည်ရွယ်ချက် ပျောက်နေတတ်တယ်။ အကျိုးမခံစားရဘူးဆိုရင် ဆုတောင်းတာ အလကားပေါ့။  ဘုရားသခင်ကိုလည်း စိတ်နာစေတယ်။
ဆုတောင်း ပဌာနာပြုလျှက်နေခြင်း ဆိုတာက အဆက်မပြတ် စွဲစွဲမြဲမြဲ ဆုတောင်းခြင်းကို ဆိုလိုတယ်။ ဒါဝိဒ် ဆုတောင်းရင် တခါတည်း အော်ပြီး၊ လက်လျှော့သွားတာမျိုး မဟုတ်ဘူး။ ကောင်းကြီး မရမချင်း အော်ဟစ် တောင်းဆို နေတယ်။ တာဝန်အရ ထုံးစံသဘောမျိုး မတောင်းသင့်ဘူး။ စိတ်အားကြီးစွာ နေ့တိုင်း လေးလေးနက်နက် တောင်းရမယ်။ ပလ္လင်တော်ရဲ့ သန့်ရှင်းတဲ့အရပ်ကို စိတ်စွဲလန်းပြီး၊ အားမလျှော့ဘဲ ဆုတောင်းကြပါစို့။ ဆုတောင်းတတ်အောင် သွန်သင်ပေးတော်မူပါ။ အို ထာဝရဘုရား။
ဆင်ခြင်ရန်။             ။ အာရုံမစိုက်ဘဲ ဆုတောင်းတာဟာ လက်ထဲမှာ အရုပ်တရုပ်ကိုင်ကာ ကစားနေတဲ့ ရှင်ဘုရင်ရှေ့မှာ အသနားခံနေတာနဲ့ တူပါတယ်။

31
 . . . ငါ့ကို မစတော်မူသည်ဖြစ်၍. . .
ဟေရှာ ၄၁: ၁ - ၁၄။ ဟေဗြဲ ၁၃: ၁ - ၈။
“I will help thee, saith the Lord.” – Isa. 41: 14.
စိတ်ချမှုဖြစ်စေမယ့် ကျေးဇူးတော်နဲ့ ကြွယ်ဝတဲ့ စကားတော်တွေ ထာဝရဘုရားထံမှာ အများကြီး ရှိပါတယ်။ ငါ မ, စမယ် လို့ မိန့်တော်မူတယ်။ ဘယ်လို ပြဿနာတွေ ကြံုနေရသလဲ။ ထာဝရဘုရား မတတ်နိုင်တဲ့အရာ ရှိသလား။ ဘုရားသခင် ပြုတော်မူသမျှကို ဆင်ခြင်ကြည့်ရင်. . . မိန့်တော်မူသံကို ဒီလို ကြားရလိမ့်မယ်။ “ငါဟာ သင်တို့ကို ငါ့အသွေးနဲ့ ဝယ်ပြီးတော့၊ သင်တို့အတွက် ဘာကြောင့် ငါ အသေခံခဲ့သလဲ။ ကြီးတဲ့အမှုကို ငါပြုခဲ့တာ မှန်ရင်၊ ငယ်တဲ့အမှုကို မပြုဘဲနေမလား။”  ရှင်ပေါလုက- “မိမိသားတော်ရင်းကို မနှမြောဘဲ၊ ငါတို့ရှိသမျှ အဘို့အလို့ငှါ စွန့်တော်မူသောသူသည် သားတော်နှင့်တကွ ခပ်သိမ်းသောအရာတို့ကို ငါတို့အားမပေးဘဲ အဘယ်သို့နေတော်မူမည်နည်း။” (ရောမ ၈: ၃၂) မ,မစဘဲ ကိုယ်တော်မနေပါ။
မစတော်မူခြင်းဟာ ဘုရားသခင်ရဲ့ ချစ်ခြင်းကြီးမားတဲ့ စိတ်နှလုံးတော်မှ လာတယ်။ ကျွန်တော်တို့ကို ဤကမ္ဘာမတည်မရှိမှီတည်းက ရွေးကောက်တော်မူတယ်။ ပဋ္ဋိညာဉ်ထဲမှာ ကျွန်တော်တို့ကို ထည့်သွင်းခဲ့တယ်။ သားတော်မြတ်ကလည်း ဘုန်းအသရေကို စွန့်ပြီး၊ ကျွန်တော်တို့အတွက် လူဇာတိကို ခံယူတယ်။ ကျွန်တော်တို့အတွက် ကာရာနီမှာ အသက်စွန့်တယ်။ ဒါဆိုရင််၊ အခုပဲ ကျွန်တော်တို့ကို ကိုယ်တော် မ,စတော်မူလိမ့်မယ်။ ကိစ္စတခုတည်း အတွက်ပင် အကြိမ် အထောင်အသောင်းလောက် မ,စဖို့ လိုနေရင်လည်း ကိုယ်တော်မငြင်းဘူး။ လိုတဲ့အရာဟာ ကိုယ်တော် ပေးမယ့်အရာနဲ့ နှိုင်းရင် ဘာမှမဟုတ်ဘူး။ ကိုယ်တော် မတတ်နိုင်တဲ့အရာ မရှိဘူး။ ယုံကြည်ခြင်း အားနည်းတဲ့သူ၊ မစိုးရိမ်ပါနဲ့။ သံသယဖြစ်လာတိုင်း၊ “သင့်ကို ငါ မ, စမည်”  ဆိုတဲ့ ဂတိတော်ကို သတိရ အောက်မေ့ပါ။ ဂတိတော်ဟာ ဘယ်အခါမှ အချည်းနှီး ဖြစ်မသွားဘူး။
နောက်ဆုံးအနေနဲ့- မ,စ ကူမတဲ့ သခင်အကြောင်းကို ဆင်ခြင်ကြစို့။ “သင့်ကိုပြုစုစေခြင်းငှါ၊ ဘုန်းအာနုဘော်တော် နှင့် ပြည့်စုံလျှက်၊ မိုဃ်းကောင်းကင်ကို စီးတော်မူသော ယေရှုရုန်အမျိုး၏ ဘုရားသခင်နှင့် တူသောသူမရှိ။ ရှေးဦးစွာသော ဘုရားသခင်သည် သင်ခိုလုံရာဖြစ်၍၊ နိစ္စထာဝရလက်ရုံးတော်ဖြင့် သင့်ကို ထောက်မတော်မူ၏။” (တရားဟော ၃၃: ၂၆ - ၂၇) ကဲ - လုံလောက်ပြီလား။ ကောင်းကင်တကာတို့ရဲ့ အထွဋ္ဋ်မှာ စိုးစံနေတဲ့ ထာဝရဘုရားသခင်ရဲ့ အနန္တ တန်ခိုးတော်ထက် ပိုကြီးတဲ့ ခွန်အားကို လိုချင်နေသေးသလား။  “ထာဝရဘုရားသည် အစဉ်အမြဲ တည်တော်မူသော ဘုရားသခင် ဖြစ်တော်မူကြောင်းကို၎င်း၊ မြေကြီးစွန်းတိုင်အောင် ဖန်ဆင်းတော်မူသော အရှင် ဖြစ်ကြောင်းကို၎င်း၊ မောတော်မူခြင်း၊ ပင်ပန်းတော်မူခြင်းမရှိ။ စစ်၍မကုန်နိုင်သောဉာဏ်နှင့် ပြည့်စုံတော်မူကြောင်း ကို၎င်း၊ သင်သည် မသိမကြားဘူးသလော။” (ဟေရှာ ၄၀: ၂၈) အဲဒီ ဘုရားသခင်က “သင့်ကိုငါမစမည်” လို့ မိန့်တော်မူတာကြောင့် ယုံကြည်ခြင်းနဲ့ “ထာဝရဘုရားသည် ငါ့ကိုမစတော်မူသည်။” လို့ တုန့်ပြန်ကြပါစို့။
မေးခွန်း။            ။ထာဝရဘုရား မတတ်နိုင်သောအမှု တစုံတခုရှိသလော။ (ကမ္ဘာ ၁၈: ၁၄)

32
ခရစ်တော်သာ  အသေခံပေးခဲ့သူ
ဒံယေလ ၉: ၂၅ - ၂၇။  ရောမ ၅: ၈ - ၁၂၊ ၁၉ - ၂၁။
“The Messiah shall be cut off, but not for himself.” – Dan. 9: 26.
“ထိုသခင်မှတပါး အဘယ်သူမျှ ကယ်တင်ခြင်းအမှုကို မတတ်နိုင်။ ထိုသခင်၏ နာမတော်မှတပါး ငါတို့ကို ကယ်တင်နိုင်သော နာမတစုံတခုမျှ ကောင်းကင်အောက်လူတို့တွင် မပေါ်မရှိ။” (တမန် ၄: ၁၁ -၁၂) ထိုသခင်၏ နာမတော်သည် မင်္ဂလာရှိစေသတည်း။
ထိုသခင်မှာ ဗီဇအပြစ် မရှိဘူး။ ညစ်စွန်းတဲ့ ဒုစရိုက်ကိုလည်း မပြု။ ကိုယ်တော်မှာ အပြစ် လုံးဝမရှိ။ ဒါကြောင့် သေခြင်းတရားက ကိုယ်တော်ကို အစိုးမရနိုင်ဘူး။ ကိုယ်တော့်အသက်ကို ဘယ်သူမှ တရားသဖြင့် ယူမရနိုင်သလို၊ အဓမ္မ အနိုင်အထက်ပြုပြီး မသတ်နိုင်ဘူး။ ကောင်းသောသိုးထိန်းက . . . “ကိုယ်အလိုအလျောက် ငါစွန့်၏။”  လို့ မိန့်တော်မူတယ်။ “ကိုယ်အသက်ကို စွန့်ခြင်း မေတ္တာထက် သာ၍ ကြီးမြတ်သောမေတ္တာသည် (ခရစ်တော်မှတပါး) အဘယ်သူ၌ မျှမရှိ။” (ယော ၁၅: ၁၃)
ဘုရားသခင်က ကျွန်တော်တို့ရဲ့ အပြစ်ဖြေစရာအကြောင်းဖြစ်စေဖို့၊ သားတော်ကို စေလွှတ်ခဲ့တယ်။ (၁ယော၄: ၁၀) အဲဒီမှာ တခါတည်းနဲ့ အပြီး အပြစ်ဖြေပေးခြင်း (atonement) ဆိုတဲ့ ဘုရားသခင်ရဲ့ မေတ္တာတော်ကို မြင်တွေ့ရတယ်။ အပြစ်ပြုသူက - လူ၊ ဝေဒနာခံစားရသူက - ဖန်ဆင်းရှင်ဘုရား။ တရားတော်ကိုလည်း ကျွန်တော်တို့ လွန်ကျူးတယ်။ ဒါပေမယ့် ဝမ်းသာစရာအကြောင်းကို ခရစ်တော်၌ တွေ့ရတယ်။ ကျွန်တော်တို့ အပြစ်တွေကို ဖယ်ရှားဖို့အတွက် မျက်ရည် စီးကြောင်းတွေက မတိုက်စားနိုင်ဘူး။ တောင်ပုံရာပုံ အလှူငွေတွေကလည်း မကွယ်ကာနိုင်ဘူး။ သခင်ယေရှုရဲ့ အသွေးတော်မှတပါး ဘယ်အရာကမှ ဖြေလွှတ်မပေးနိုင်ဘူး။
ကာရာနီမှာ အပြစ်တွေကို တခါတည်း သယ်ဆောင်သွားရလို့၊ အမျက်တော် သက်ရောက်ကာ ချက်ချင်း စွန့်ပစ်ခံခဲ့ရတယ်။ လူအတွက် ဘုရားက တခါတည်း အပြီးအပိုင် အသေခံပေးတယ်။ လူစားထိုးပေးတဲ့ ဘုရားသခင်ရဲ့ ဉာဏ်တော်ကို အံ့ဘွယ် တွေ့မြင်ရတယ်။ ဘုရားသခင်ရှေ့တော်မှာ ကုသိုလ်ရအောင်လုပ်တဲ့ လူ့နည်းလမ်းတွေ မလိုတော့ဘူး။ ကိုယ်ကိုကိုယ် အပြစ်ဒဏ်ပေးဖို့၊ စိတ်နောင်ကြဉ်အောင် ဆုံးမဖို့၊ ဘုရားဖူးသွားဖို့တို့ မလိုတော့ဘူး။ ကျွန်တော်တို့ရဲ့ အပြစ်ကြွေးရှိသမျှကို ဘုရားသခင်ရဲ့ သိုးသငယ်က အကြေအလည် ပေးဆပ်ပြီးပါပြီ။ ကားတိုင်ထက်မှာ ကိုယ်တော် ပြောခဲ့တဲ့စကားက . . . . အ - မှု - ပြီး - ပြီ ။
ချစ်သောစာရှုသူ၊ သင့်ကိုယ်စား အသွေးသွန်းလောင်းခဲ့တဲ့ ကယ်တင်ရှင်ကို မြင်ပြီလား။ သင့်အပြစ် တခုစီတိုင်းကို သင့်ကိုယ်စား သယ်ဆောင်သွားတဲ့ ဘုရားသခင်ရဲ့ သားတော်ရင်းကို မြော်ကြည့်ပါ။ တခြားတယောက်ကို မဟုတ်ဘူး။ ယဇ်ပုရောဟိတ်ကို မဟုတ်ဘူး။ သင်းအုပ်ဆရာကို မဟုတ်ဘူး။ မာရိကိုလည်း မဟုတ်ဘူး။ ရုပ်ထု လှလှကလေးတွေ ကိုလည်း မဟုတ်ဘူး။ ကိုယ်တော်ကိုသာ မြော်ကြည့်ပါ။ သခင်ယေရှုကိုသာ မြှော်ကြည့်ပါ။ သင့်အတွက် ဘယ်သူမှ အသေမခံခဲ့ဘူး။ ကိုယ်တော်သာ သင့်အတွက် အသေခံခဲ့တယ်။ ကျွန်တော်တို့ရဲ့ ကယ်တင်ရှင်နဲ့ ကြီးမြတ်တဲ့ ဘုရားသခင် ယေရှုခရစ်သာ အသေခံခဲ့တယ်။
ဘုရားသခင်၏ခေါ်ဖိတ်သံ . . .
“မြေကြီးစွန်းသားအပေါင်းတို့၊ ငါ့ကို မြှော်ကြည့်၍၊ ကယ်တင်ခြင်းကျေးဇူးကို ခံကြလော့။ ငါသည် ဘုရားသခင်ဖြစ်၏။ ငါမှတပါး အခြားသောဘုရားမရှိ။” (ဟေရှာယ ၄၅: ၂၂)။